Anade ( XIX ) n.11 Novembar 2016

ULTIN NUMAR

08/11/2016

    Vie pe gnot, daspò lungje malatie, al è vignût a mancjâ il creadôr, la ment e il cûr di chest gjornâl. Si impensarìn di Lui in ogni moment che nus vignarà intes mans un scrit in marilenghe e di Lui o ricuardarìn la grande voie di fâ e di stramanâ a ducj lis nestri lidrîs Furlanis che lu an compagnât fintremai che al à vût flât. Mandi Renzo

Mario Linussio

Anade ( XIX ) n.10 Otubar 2016

Puestis Italianis S.p.A. - Spedizion in a.p. - D.L. 353/2003 (conv. in L. 27/02/2004 n°46) art.1, comma 2, NE/UD

Periodic-mensîl di informazion e culture sul cont de minorance celtiche

dai Ladins de Furlanie. Edizion par cure de associazion “Union Scritôrs Furlans”

Referendum Costituzionâl

“bisugne dî di NO!”

Cun cheste riforme il nestri Statût di autonomie speciâl al è in grivi pericul

   Se tu tu disis che al è miôr di dî “No” tal prossim Referendum Costituzionâl, tu riscjis di vignî definît un nimì de Patrie (taliane). E se il “No” al ves in fin di vinci, al sucedarà il cjadaldiaul, il montafin, un ribalton come chel dal 1511 in Friûl, la disgracie e la miserie. Peraule dal premier Matteo Renzi, de ministre pas riformis Boschi, de nestre benvolude president Serracchiani, spuinde ideologjiche fondamentâl pal Matteo nazionâl. Pecjât che al lôr imbroi, aes lôr mâl contadis bausiis, aes lôr trabossignis nissun plui nol crodi. Al vendi ridi, se no vaî, aes resintis cjapadis di posizion sun chest cont dal sindic di Udin, Furio Honsell, convertît ae partesanarie dal “Si”. Ce che no si fâs par rivâ a cuistâsi une poltrone di sest pal a vignî.

    Sintît cheste sul cont dal Referendum Costituzionâl. Se tu fevelis mâl de riforme Renzi-Boschi, se tu invidis i citadins a votâ “No” tal prossim referendum e tu lu fasis a traviers facebook, al po capitâti di jessi fermât. Al è sucedût a un dai juriscj plui cognossûts, Paolo Maddalena. Judiç costituzionâl dal 2002 al 2011.

     Maddalena (80 agns) al è stât ancje vice president de Cort Costituzionâl. Cumò al è impegnât sul front dal “NO” al referendum, cussì come tancj altris costituzionaliscj. Al à firmât plui di un apel cuintri la riforme Renzi-Boschi, in particolâr chel promovût di Onida, firmât ancje da 11 ex presidents de Consulte in chescj dîs di campagne eletorâl e dispès invidâts intai dibatiments.

   Di pôc, de mitât di Lui, Maddalena al à vierte une pagjine facebook dedicade a chescj argoments e le à clamade “Meti in vore la Costituzion”, che e à cognossût un vêr e propri boom di visitis, soredut cun doi post. Il prin dai 10 di Avost, a coment de “innomenade” teorie de ministre Boschi. Teorie che e proviôt che cui che al invide a votâ “No” tal Referendum Costituzionâl “nol rispiete il lavôr dal parlament”. A dî la veretât “Il Parlament al varès di sei al servizi dal popul e so rapresentant. Al è evident, partant, che il rapresentât al à il dirit-dovê di controlâ la ativitât dal prin. Di simpri il referendum al è ritignût un at sovran dal popul, une ativitât dal dut libare di cualsisei condizionament”, al à juste apont rimarcât Maddalena.

     Pôcs dîs daspò, ai 13 di Avost, Maddalena al à decidût di rispuindi a une rieste di articui publicâts de stampe de Ingletiere, ducj une vore preocupâts di une eventuâl vitorie dal “No”. Il so post al merte di jessi ripuartât: “Secont l’autorevul “Financial Times” la vitorie dal “No” al referendum costituzionâl al podarès produsi efiets disastrôs su la nestre economie. Al sta di fat, invezit, che il nestri referendum nol è la Brixit e nol po produsi nissun efiet economic. Duncje si trate di une grande buzare. Se po si volès cjapâ sul seri cheste afermazion no si podarès dineâ che al rapresente une menace pe libertât di vôt dai talians garantide dal articul 48 de Costituzion, dulà che si proviôt che “il vôt al è personâl e avuâl, libar e segret”. Al sarès inalore confermât, e evident, che la riforme e zove dome ae finance come al è stât domandât da une letare de agjenzie finanziarie J.P. Morgan, e no ai interès dal popul talian. Une altre valide reson partant par votâ di “No” cun assolude convinzion, nonostant il cidinôr sul argoment de bande dai nestris orghins istituzionâi”.

     Chest ultin post al è stât viodût di passe 20 mil personis. La pagjine di Maddalena e à scomençât a jessi cognossude. Probabilmentri ancje masse, pes regulis di facebook, pai siei algoritmis o par cui sa cualis altris resons. No si sa parcè che al gjestôr de pagjine (Maddalena) e sedi rivade une curte retifiche che e pandeve: “Ti è stât slaifât, in maniere temporanie, di publicâ intai grups”. In sumis un bloc dal sigûr divignût de grande popolaritât de pagjine. Popolaritât che e stave dant un grant fastidi ai menadôrs dai palaçs di Rome.

     Cundut achel la pagjine “Meti in vore la Costituzion” si po continuâ al visitâle e si puedin ancje lei i gnûfs post di Maddalena. Che cussì al à comentât cheste “curiose” situazion: “O soi sorprendût, facebook no mi à displeât lis resons di cheste sospension e o speri che la cuestion e vegni risolvude in maniere definitive”. “Sul reâl contignût de riforme, al zonte in fin, nus vegnin contadis une vore di bausiis. Secont la ministre Boschi, fintremai, la vitorie dal “Sì” al judarès il nestri paîs a scombati il terorisim. A ’nd è di ce impegnâsi in maniere ferbint par displeâ ben lis resons dal “No” parcè che la riforme costituzionâl no zove, gran, al interès dai citadins talians”. Soredut a chei dal Friûl-V.J. che a viodin sot atac e in grivi pericul il lôr statût di autonomie speciâl. Renzi sun chest cont al à lis ideis une vore claris, cun buine pâs dai nestris soçans dem di chenti.

     Renzi-Boschi-Serrachiani, cheste e sarès la vuestre democrazie... e par fortune che o sês di çampe. Naturalmentri si fâs par mût di dî, usance Riedo Pup! (tarvos)

Ladins dal Friûl pag.2 – Otubar 2016

DAL TIMÂF A LA LIVENCE

Martin Luther par un cristianisim crei in Europe

Ai 31 di Otubar il pape al sarà a Lund, in Svezie, par celebrâ lis 95 tesis dal teolic todesc

    Pe tradizion luterane ai 31 di Otubar dal 1517, juste za fa cinccent agns, Martin Luther (Martin Lutero) al picjave su la puarte de catedrâl di Wittemburg lis famosis 95 tesis. Altris fonts a sostegnin che a fâ chest at di sfide viers il pape di Rome, cence che l’autôr indi savès nuie, a sedin invezit stâs impen i students dal teolic todesc: i zovins confradis dal Ordin Agostianian dai convents di Dresde, Naustadt, Orla, Erfurt e Gotha. Doprâ lis puartis des glesiis, e des universitâts, par slargjâ la cognossince di dutrinis e leçs al jere a chei timps dal dut normâl. Cundut achel, di cualsisei che al sedi stât fat chel at, al ven dut câs considerât il moment dulà che si invià la riforme protestant.

   Par celebrâle, ai 31 di Otubar cu ven il pape (di Rome) al cjaparà part a une cerimonie parie fra la Glesie Catoliche e la Federazion luterane mondiâl lant a Lund, in Svezie. Ma parcè cheste sielte ise colade su Lund, une tra lis plui antighis ma no tra lis plui impuartantis des 13 diocesis luteranis dal Paîs? E parcè in Svezie dulà che i catolics a son circje 137 mil di lôr? Chê svedese e je stade la prime Glesie Luterane che, tal 2000, e à rinunziât al status juridic di “Glesie di Stât”. Secont lis statistichis uficiâls tal 201 4, ancje se il 64,6 par cent dai citadins svedês si declare “luteran”, dome il 2 par cent al frecuente cuntune cierte regolaritât lis celebrazions in glesie la domenie. Tant par parafrasâ Roberto Rossellini, se pape Francesc al cirive une “Europe cristiane dal an zero” a Lund in Svezie, dal sigûr la cjatarà. Cheste volte nol varà di lâ a lei sfueis picjâts su lis puartis des glesiis, ma al cjaparà par man il libri preparât de Federazion luterane mondiâl e des Conferencis episcopâls catolichis dai Paîs interessâts titulât “Preiere comun”.

    Un libri liturgjic darest une vore doprât intes rispetivis comunitâts par preâ pal “rindiment di graziis, il pintiment e l’impegn ae testemoneance comun, al fin di esprimi i dons de Riforme e domandâ perdon pes division che indi son divignudis par vie des disputis teologjichis”.

     Catolics e Luterans si son bielzà scambiâts impuartant documents di dutrine, come la “Declarazion parie su la Dutrine de Justificazion” dal 1999 e “Dal conflit ae comunion” dal 2013. Inmò, ai 19 di Zenâr stât in Vatican il pape al à ricevude une delegazion de Glesie Luterane de Finlandie, vuidade di une femine, Jirja Askola, vescul di Helsinki. Daspò la udience i partecipants a son lâts jù inte Basiliche par assisti ae messe e par cjapâ part ae comunion. In sumis un acjadiment di grande impuartance su la strade no facil de riconciliazion des Glesie cristianis de Europe, vuê plui che mai in dificoltât di front ae presince simpri maiôr di comunitâts leadis ae de pratiche de religjon musulmane, dispès secont interpretazions estremistis. Cussì Martin Luther, e lis sôs tesis, a son tornâts plui che mai di atualitât.

      Fi di contadins Martin Luther al nassè a Eisleben, tal Land de Sassonie-Anhalt dal dì vuê ai 10 di Novembar dal 1483. L’ambient dulà che al cressè al jere catolic e sevêr, al pont che inte fede dai gjenitôrs e jentrave une component di superstizion popolâr auride soredut dal paganisim gjermanic.

     Tal 1497 Luther al frecuentà la scuele di latin a Magdenburg, alì dai Fradis de vite comun, une associazion religjose di origjine medievâl. Pe volontât dal pari si iscrivè po ae universitât di Erfurt (1501), dulà che al cuistà il titul di “Baccalaureus artium”. Al fo inte biblioteche di chest istitût che al podè lei pe prime volte la Bibie. Un acjadiment straordenari dal mês di Lui dal 1505 al segnà il so a vignî: aes puartis di Stotterheim, une vile de Sassonie, si cjatà butât par tiere par colpe di une saete intant di un temporâl. Inalore al imprometè a Sante Ane che se si fos salvât al sarès lât frari. Ai 17 di Lui dal 1505, a vincjedoi agns, al jentrà tal convent agostinian di Erfurt, dulà che al aprofondì i scrits di San Pauli e Sant Agostin. Achì, tal 1507, al vignì ordenât ancje predi.

     Il studi de Bibie, la preiere e la meditazion lu judarin a pervignî a un intindiment diviers di cemût che Diu al considere i pecjadôrs. Di achì, e divignì la idee che il fervôr di Diu e sedi une cjosse che si puedi vuadagnâ, cundut achel e ven concedude par clemence a chei che a manifestin fede. Inte teologjie di S. Pauli in fats l’apuestul al sosten che se no o varìn fede o sarìn justificâts di Diu pai merits di nestri signôr Jesus Crist. Diu, e dome lui, nus darà la gracie e la salvece.

    I ponts di fonde de dutrine luterane a son: a) la salvece no si oten fasint buinis azions; si oten dome vint fede in Diu; b) l’om al fâs azions buinis par vie che al è justificât de gracie di Diu: nol è justificât par colpe des buinis azions; c) cualsisedi al pues, iluminât di Diu, svilupâ la cognossince des “Sacris Scrituris”; d) par comprendi lis “Sacris Scrituri” no covente la mediazion di papis e conceis: e baste la gracie divine e une cognossince complete des stessis; e) negazion de infalibilitât dal pape; f) i sacraments a son ridots al batisim e ae eucarestie, i unics, secont Luther, che si à iniment inte Sacre Scriture; g) par ricevi la gracie divine no covente la mediazion dal clericam istituzionalizât (predis, vescui e ce): tra l’om e Diu a ’nd è un contat diret. Al è evident che posizions come chestis a vevin metût in grande dificoltât la “barache papaline di Rome”, dulà che tra ecès, scandui e incoerencis dotrinâls si stave ridusin il cristianisim a une sorte supermarcjât “dal sacri” une vore indecent.

     Un altri aspiet une vore impuartant de azion di Martin Luther al rivuarde il fat che al va considerât il pari de lenghe todescje moderne, par vie che al sielzè di tradusi la Bibie inte lenghe de sô int. Par podêlu fâ intune Gjermanie sminuçade in cetancj stâts e dialets al creà un gnûf lengaç, fasint riferiment al dialet de Gjermanie centrâl inricjît dal lengaç popolâr. In chest “gnûf todesc” e vignì stampade la Bibie che e ve cussì une simpri plui slargjade difusion. La sô traduzion de Bibie, fate intant che al jere logât in segret intune fuartece par scuindisi dai sicaris dal pape che lu stavin cirint in dute la Gjermanie, e ve un sucès cetant grant, indi forin stampadis miârs di copiis, cifaris grandonis considerât il fat che il 90 par cent de popolazion no saveve inmò lei. La Bibie e deventà cussì un libri popolâr e ancje la leterature indi aprofità.

    Martin Luhter al è muart tal 1546 a Eisleben, il paîs de sô nassince. Inmò vuê centenârs di milions di personis, in dut il mont, si professin aderents ai siei insegnaments. Il contribût che al de tal creâ un mût gnûf di vivi il cristianisim, che al consist inte indipendence de Glesie istituzionâl al è stât dabon grant. L’Europe di vuê, cetant disorientade e ae ricercje de proprie identitât, e à dabon bisugne di chest spirt libar e crei. (renzo balzan)

Ladins dal Friûl pag.3 - Otubar 2016

CRONICHIS DI CHENTI

Cjargne in zenoglon... ma i siei predis a tasin

Intant a Tumieç a podaressin riva 300 “richiedenti asilo”, ma nissun proteste

Tumieç - Vicende faliment CoopCa. Paiaments inviâts pai ex dipendents dai vê di vê in retrat di 8,9 milions. Lis disposizions dal Tribunâl di Udin a va indenant secont i timps concuardâts. Paiâts i creditôrs privilegjâts, - o sei spargnadôrs e i furnidôrs - nol restarà nuie. Ma almancul al è stât predisponûts il paiament des retribuzions e dal Tfr (tratament di fin rapuart). Se lis cjossis a saran fatis in maniere corete, si presum di podê concludi il paimint di ducj i privilegjâts. I dipendents, dut câs, a saran ducj paiâts. Tal complès i creditôrs privilegjâts a incassaran ae fin dal concuardât 30,7 milions di euros, pôc mancul di 9 a coventaran par saldâ i conts cui lavoradôrs.

    Tal plan di concuardât presentât ai 17 di Març stât, CoopCa e sotliniave di vê in caric 637 dipendents a timp determinât, plui doi cun rapuart interinâl. A dut Mai, dai 639 dipendents, 86 lavoradôrs a vevin cjatât un gnûf puest di vore. Cussì la Regjon, intune cul Comun di Tumieç, e à inviât un protocol di colaborazion cu la societât Umana par cirî di cjatâ-creâ des pussibilitât di lavôr sul teritori pai dipendents restâts disocupâts. I socis a restaran invezit a sut. Par cumò no’nd è, gran, licuiditât. Naturalmentri lis operazions che e je daûr a davuelzi Alleanza 3.0 no centrin a fat cul concuardât. Il riferiment al è ae donazion che la grande cooperative nazionâl e à decidût di fâ viers i socis spargnadôrs, tornantjur indaûr la mitât dai credits in vê di vê (circje 29,6 milions di euros) viers la cooperative cjargnele falide. Cheste operazion, cemût che al jere stât imprometût, e je stade inviade ae fin dal mês di Avost stât. I bêçs a vignaran dât in trê ratis e dentri doi agns.

     Si à dite dal disastri economic creât in Cjargne dal faliment de storiche CoopCa, sedi sul plan ocupazionâl che dal volan economic. A chest bisugne zontâ in chest 2016 i faliments di impuartantis realtâts come la imprese Tomat di Tumieç e la aziende pe produzion di prefabricâts lamelârs par grandis infrastruturis, la Stratex di Sudri. In dificoltât grande al è naturalmentri ancje il cumierç, massime tal cjâf lûc Tumieç, dulà che une buteghe sì e chê altre no e risulte sierade. E nancje il turisim nol va cui sa ce ben, cun dut che lis velinis di palaç a voressin dânus di intindi che no je vere. Darest il spielis di cheste degradade situazion la cjatìn a Darte e inte gjestion des sôs “storichis” Termis. In sumis no son timps d’aur pe mont furlane, che e va indenant a pierdi simpri plui servizis: Tribunâl, Catastic, Agjenzie-Agemont, casarmis (dentri chest mês di Otubar de casarme Cantore di Tumieç a saran lâts vie i ultins alpins, dai cuatricent che a jerin, viers Vençon e Remanzâs), servizi di puestis, scuelis, gjestion direte des propris aghis, servizi Internent une vore scjadint, Sanitât simpri plui penalizade, tant che a son simpri di plui i malâts cjargnei che a scugnin cori jù a tal ospedâl di Udin par podê fâsi curâ.

     A cheste situazion di crisi economiche e sociâl no podeve no corispuindi une crisi demografiche. La Cjargne e la mont furlane a continuin a pierdi cussì abitants in maniere impreteribil. A continuin a pierdi soredut abitants zovins, inscuelâts e laureâts, che a van inalgò a cirî un lavôr e la pussibilitât di realizâsi inte cariere e tal podê meti adun une famee. Intai prins mês di chest 2016 a son restâts intai 28 comuns de Cjargne mancul di 37 mil abitâts: il numar plui bas di simpri. Une situazion che no jere mai sucedude, nancje in timp di vuere. La implosion e je sot i vôi di ducj.

     Ma la politiche e va dilunc a dâ rispuestis che no zovin, e va indenant a butâ fum intai vôi, a contâ dome bausiis, a fâ dome impromission cence tignince. Si sperave che, vint la president Serracchiani tignudis lis deleghis pai problemis de mont, la situazion e ves podût puartâ dai vantaçs. Nuie di fâ, la delusion e je stade no grande, ma grandone, come che e je stade grande la delusion viers il sindic di Tumieç, fedêl yes man de president, che fint cumò nol à produsût nuie di concret, se no chel di meti in vore i ordins che i rivin dai palaçs di Triest. Il fat po che al sedi stât nomenât ancje president de gnove UTI (che e à cjapât il puest de viere Comunitât di Mont) nus da inmò in plui di pinsirâ.

     O sin aromai intes mans di Sant Ilario, protetôr de Cjargne, ma no dai siei predis che di masse timp in ca a tasin e no si fasin plui sintî. Massime chei de canoniche dal cjâf lûc, ritignûts dai ponts di riferiment. Cualchidun, sun chest cont, al dîs che a tasin parcè che al è convenient tasê par vie che il sindic Brollo al è il nevôt dal arcivescul emerit di Udin, Pieri Brollo, che al loghe juste apont a Tumieç. Altris, plui maliziôs, a pensin invezit che e sedi di mieç la anuâl “Mostre artistiche di Dieç”, che cence il fondamentâl contribût economic de Regjon e varès bielzà sierât, e inalore metisi cuintri la Serracchiani e l’assessôr Torrenti al devente une vore discomut.

Ma lis robis une volte no lavin dabon cussì. Ur ricuardin, a chei de canoniche di Tumieç, che in Cjargne e je nassude “Glesie Furlane” e la Clape Culturâl “Cjargnei Cence Dius”, che a vevin come ponts di riferiment, e animadôrs, predis come pre Checo Placerean, pre Antoni Beline, pre Josef Cjargnel, pre Laurinç Dentesant, pre Pieri Degan. Predis di cûr e di passion che a àn simpri scombatût pe Cjargne, pe mont furlane e pe lôr int. Tornait a scoltâ lis predicjis che a fasevin il dì de Sense, intun Plan de Vincule incolm di int, sot vie la Plêf Mari di San Pieri, al sarès inmò dut ce imparâ.

    Inte ultime grande cunvigne sui problemis de mont, organizade a Tumieç (Cine Teatri David) de Arcidiocesi di Udin e dal vescul Battisti (Zenâr 1987), intes conclusions si po lei: 1) “Nol è pussibil assisti di rassegnâts al spopolâmint des Zonis di mont cence fâsi des domandis che a scugnin coinvolzi i podês a ducj i livei: politics sociâi e eclesiâi: ogni dì si siere une cjase, ogni dì un paîs al continue a murî. 2) I abitants des Zonis di mont a àn di vignî fûr de secolâr situazion di fatalisim, che ju puartâts a considerâ come scontade cheste situazion di emargjinazion, cence alternativis la strade de emigrazion: volê vivi in maniere dignitose in chestis Zonis dal Friûl al un dirit sacrisant e no une concession, scuasit sfuarçade, di cualchidun. Al è impuartant che i abitants di chestis Zonis a difindin cun cûr e dignitât i lôr valôrs, la lôr culture, la lôr storie e a savedin parâ cun dute la lôr braure la lôr identitât, lis lôr carateristichis e la lôr origjinalitât a traviers un impegn passionât che al devente determinant: masse dispès a son restâts sotans e cidins di front a dituarts di ogni sorte”. President Serracchiani, sindic Brollo, bonsignôr Agnul Zanello siino tornâts indaûr di 23 agns?

     Ultime perle: Radio Rai Triest, intun telegjornâl de fin dal mês di Avost stât, nus à informâts che inte caserme Cantore di Tumieç, a pene disvuedade dai alpins, a podaressin rivâ, e jessi logâts, 300 profugos “richiedenti asilo”. E inmò une volte nissun proteste! La Cjargne Fidelis e sotane e rive a gloti aromai di dut e di plui! (mateu di prun)

Ladins dal Friûl pag.4 – Otubar 2016

D O C U M E N T S

Ricostruzion dal Friûl – Un model restât cence parêi

Une riflession su la ricostruzion di meti in vore daspò il taramot tal Apenin Centrâl

    Taramot! Ai 23 di Avost al è tornât il taramot! Cheste volte a sei interessade dal disastri e je stade une aree dal Apenin Centrâl, tra Lazio, Marchis, Abruç e Molise. Paîs di mont, vieris, che no son rivât a resisti aes fuartis scossis. I muarts a son stâts uns 300, plui di tresinte ancje i ferîts. Passât il timp de emergjence za si fevele di ricostruzion, ma i interogatîfs a son cetancj. Il teritori di mont al compliche ogni cjosse. A coventaran sieltis claris e determinazion tal metilis in vore, invezit fint cumò e impere la cjacare. Ducj a san dut, e invezit no san proprite nuie. Mancul bardele e plui concretece. In chestis discussions, aspiet scontât, si à plui voltis vût iniment il “Model Friûl”, o sei l’unic esempli in Italie di ricostruzion puartade insom in maniere positive.

    In rivuart us proponin une riflession, cetant interessante, di Paolo Medeossi publicade sul “Messaggero Veneto” dai 26 di Avost. Il test origjinâl al è stât voltât par furlan par cure de redazion.

     Come intun vencul mai finît o tornìn a viodi lis imagjinis che o cognossin, o scoltin peraulis za sintudis, e torne la angosse in chest Paîs biel e crevadiç, cun borcs vieris rimpinâts sù pes monts, cressûts su teritoris tra i plui sismics dal mont. O vivin cence acuarzisi in piçui univiers pericolôs, ma la nature e à lis sôs cadencis e i siei rituâi, vierons e impreteribii. Nô furlans o cognossin dut chest, vintlu vivût su la nestre piel. E cumò o cjalìn sconciertâts lis imagjinis di cjasis sdrumadis, dulà che si olme purpûr cualchidune che, no si sa parcè, e à invezit rezût. A semein braçs disperâts che si jevin viers il cîl ae ricercje di jutori.

    Nô o savìn cheste storie, chest dolôr che al sgjave inte anime e tal cjâf, cence lassâti mai, nancje cuant che si pense che dut al sedi finît. Invezit nol è cussì. Il Friûl cu lis ongulis, cun dincj, cun capacitât politiche e inteletuâl straordenarie, al è jessût dal sprofont in dîs agns di assolude dedizion, dal 1976 al 1986, dade di timp che e segne il grant romanç coletîf di cheste Regjon dal Nûfcent. I dâts a son cetant clârs: 74.006 cjasis comedadis, 16.276 tornadis a fâ sù gnovis su 18 mil sdrumadis. Tra chestis cifaris dal scomençâ e finî al è pussibil cjapâ dentri une vicende fintremai cumò contade a tocs, a cjapitui, a fragments, secont il pont di viste e la esperience personâl di cui che la conte. Al mancje invezit un afresc complessîf che al tegni cont di dut, al di là de sodisfazion e dal complasiment pal risultât finâl. Cun sintesi, la interie operazion e ven clamade “Model Friûl”.

    Il prin a doprâ cheste definizion come titul di un libri al fo l’architet Luciano Di Sopra. A lui il president de Regjon, Toni Comelli, si jere indreçât par vê une stime precise dai dams che e tignìs dut câs cont purpûr dai intervents di riparazion cun sistemis anti-sismics. Di front a une cifare che e jere grandone, il Stât al rispuindè in maniere adeguade rindint disponibil un ordin di 16 miliarts di liris e decentrant i podês ae Regjon stesse dulà che intant si jere rivâts a un pat tra maiorance e oposizion.

      Il “Model Friûl” al è restât cualchi cjosse di unic, forsit di utopistic e dificil di rivâ a copiâ, parcè che ogni disastri, purpûr inte someance dai senaris, al rapresente in fonts une storie specifiche. Storie condizionade dal lûc dulà che al è sucedût, des popolazions interessadis, da variabilis leadis a stradis, modalitâts dai socors, ete, sisteme di comunicazions. Par chestis resons la ricostruzion scomençade achì di nô tal 1976 (vuidade di Toni Comelli) e je inmò un fat a se inte tribulade odissee taliane a traviers i diviers flagjei de nature. E fo une rinassite nassude in maniere imediade, fint dal mês di Mai dal 1976, cuant che la int tra lis maseriis e decidè che i paîs a vevin di jessi tornâts a tirâ sù dulà che a jerin e cemût che a jerin. Une frase avuâl e je stade pronunciade îr (25 di Avost 2016 n.d.r.) dal sindic di Arquata, un dai comuns plui tibiâts dal taramot. Il “dulà che al jere e cemût che al jere”, secont une condividude volontât popolâr, al è il pont di fonde de partence, ma al domande sacrificis grandons e un spirt di iniziative plui fuart di dut.

      I furlans indi forin bogns, za fa cuarante agns. Il tiessût sociâl al jere dal sigûr salt parcè che il front operatîf principâl al vignì rapresentât dai tecnics, des impresis, dai muradôrs, ma soredut des 90 mil fameis taramotadis, che si tirarin sù daurman lis maniis, inte union e cooperazion. Al fo il lôr spirt a garantî il sucès di leçs purpûr gnovis e validis fatis buinis dai politics. La vere ricostruzion e scomençà a inviâsi un an daspò dal taramot cuant che la int, lade a logâ intes cjasis prefabricadis daspò vê passât l’Unvier a Grau e Lignan, e tornà a vivi intai propris paîs.

     Il prin Istât dal 1976, inmò no dal dut contât in ducj i siei aspiets, al fo une vore dûr, dentri vie des tendis. Il scuintri tra cui che al domandave une soluzion concrete, cui che vignint di Rome al imprometeve lis cjasis subite e cui che in maniere concrete al proviodeve timps luncs, al rivà ae massime tension. Cundut achel lis fuartis scossis di Setembar a consearin di cedi e di acetâ che si stralozàs viers la cueste, in cualchi maniere a vê fiducie. Che ai fin no vignì tradide, gran. Chest al sucedè in Friûl. Câs unic, cemût che si à vût iniment denant trat, intune Italie che, a scjadencis periodichis, e sa di scugnî paidî un montafin e di scugnî tornâ a scomençâ dal in prin. Epûr la nature e je simpri la stesse e e à cetante memorie, dal sigûr plui di chê dai oms. (paolo medeossi)

______________________________________________________________________________________

    Gragnel di sperance: Agrimes di cûrs a’ lavin / pulvin di maseries / e i “fûcs” sdrumâz, pai Muarz / son vares sigjelades. / E dîs čondars penz di sangloz / a’ solcin prâz di disperazion / ta vite vuarfine e clopadice. / A’ si scolte la tiere / ch’a trime di fiere mortâl; îr, mari fedele e amorôse, / cumò nus fâs poure. / Enfre i grums dai claps al mene / a coves verdes il sarturc: / gragnel di sperance. (Gjeme Nodâl Chiapolino – Da “Âgrimes di cûrs” - Ed. Canova-Trevîs 1982)

_____________________________________________________________________________________

Ladins dal Friûl pag.5 – Otubar 2016

JOSEF MARCHET: I GRANCJ OMS DAL FRIÛL

Jeroni Aleandro: al contrastà lis tesis di Martin Luther

Inteletuâl protagonist de vite tra i secui diesim cuart e diesim cuint

   Furlan si cualificave di bessôl Jeroni Aleandro e tâl lu clamarin tancj siei contemporanis, si ben che al fos natîf di Mote, citadele che e sta a cjaval de Livence, o sei sul confin fisic dal Friûl cul Venit. Partant no sarà cjosse fûr di scuare meti dentri la sô figure inte galarie dai Furlans innomenâts.

     Par vie che al ve une part di prin plan intes controversiis buridis fûr de riforme di Luther (Martin Lutero), il so non al ven fûr di frecuent inte storie di chel moviment massime tra i scritôrs todescs. Plui di ducj si mostrin acanîts cuintri di lui l’Hutten, il Bartht, il Boxrn, che lu disin fi di un judeu, o di un cjaradôr. Lui invezit, intune difese di se stes cuintri l’Ultrich von Hutten si sarès proclamât fi di antîcs marchês de Istrie: il che al po jessi ancje vêr, par vie che il marchesât – no la Marcje – de Istrie e vignive conferide ancje in forme anuâl, par bêçs, a siôrs di chenti o ben forescj. Dal diplome di Carli V, che i concedè di meti tal so steme zentilizi la acuile imperiâl, al risulte che so pari si clamave Francesc e di une letare di Pauli Maurizio (stampadôr) al a semee che al fos un miedi e un filosof mentri la mari di Jeroni e jere impen une Bartolomea di Antonello Bonfiglio, di Vignesie.

     Jeroni al nassè ai 13 di Fevrâr dal 1840. Al cressè a Mote fint a tredis agns po al fo mandât a studiâ a Vignesie, prime alì di un tâl Benedetto Brugnolo, po alì di Petronillo di Rimini. Ma, jessintsi inmalât, al tornà a cjase par podêsi rimeti. Vuarît al le ae scuele di Pauli Amalteo a Pordenon. Dut câs tal mês di Mai dal 1496 al jere une altre volte a Vignesie. Dilunc il carnevâl dal 1497, si cjatave in famee, cuant che e murì sô mari. Vint metût al mûr il vieri maestri dal paîs intune dispute publiche, al vignì invidât a cjapâ il so puest cuntun bon stipendi. So pari lu obleà a acetâ e, par vie che al voleve continuâ i siei studis, al cjolè in cjase un ciert Danêl di Padue, che al varès vût di insegnai la lenghe greghe e che invezit i jemplà il çurviel di bagulis astrologjichis.

     Un barbe, de bande di sô mari, i proviodè ancje un maestri di ebreu, il spagnûl Mosè Perez di Leon, che in cjase di Aleandro si convertì al cristianisim. Di chest al semee che lui al ves imparade la lenghe cussì ben di fâ nassi la liende, acolzude dai nimîs, che al fos fi di ebreus. Dut cas intai siei diaris, scrits in trê lenghis, si incuintrin nome des rari fraris par ebraic. Ma a son masse e masse disferìntes lis sôs ocupazions e lis sôs vicendis che si davuelzerin tra il 1499 e il 1501.. Si sarès laureât in teologjie e filosofie. Al sarès stât cjolt sù dal Murano come maestri di ebraic di Sebastiano Priuli, arcivescul di Nicosie. Al varès tignût lezions su lis “Tuscolane” di Ciceron a un grup di nobii students. Al varès scrits libris di prose e poesie, che Jacopo di Purcie i domandave di podê viodi. In fin si sarès stabilît a Padue clamât di Angelo Leonino, vescul di Todi e nunzi apostolic alì dal guvier venit.

Intant, intai prins dîs dal 1501, al murive so pari par vie des conseguencis paididis intant de incursion dai turcs dal 1499. Simpri in chel an, forsit su segnalazion dal Leonino, il pape Alessandri VI al varès invidât l’Aleandro a Rome, destinantlu al ufici di segretari dal duche Valentino: ancje il Seckendorf, in polemiche cuintri di lui, lu acuse di jessi stât segretari dai Borgia. Ma di chest, intes sôs notazions autobiografichis no si cjate olme. Ma tal 1502 al murive Alessandri VI e il Valentino al scugnì sindilâsi.

     Inte Vierte dal 1508 e sclopà la vuere tra Vignesie e l’Imperadôr Massimilian. In chê volte la famee dal Aleandro e fo bandide di Mote dal guvier venit, co e devi jessisi metude de bande de nobiltât furlane insoferent al domini venit. Jeroni al le cussì a parâsi a Parìs, in France, dulà che al rivà ai 4 di Jugn. Cun cheste vicende e scomence une altre, impuartante dade de sô ativitât: chê dedicade al insegnament che e comprent circje sîs agns e che i procurà une innomine cetant slargjade.

   Tal  1514  al  lassà  la universitât e l’insegnament par metisi al servizi di Everart von der Marck, princip vescul di Liegi. Parie dal gnûf protetôr al tornà a Parìs l’an daspò pe incoronazion dal gnûf re Francesc I, e al passà l’Istât in cheste citât. Po al vignì mandât a Rome. Tal timp che venti jù al stave fasint i siei intrics a favôr dal vescul di Liegi, l’Aleandro al scugnì tratâ ancje cul gardenâl Giulio De Medici, cusìn dal segretari di stât dal pape Leon X. Cheste amistât i zovà, parcè che il gardenâl i domandà di deventâ so segretari. E al fo juste par intercession dal stes gardenâl che al podè otignî, tal 1518, che il guvier di Vignesie al gjavàs il bant cuintri i siei di famee, e i concedès i bêçs che a coventavin par podê comedâ lis lôr possessions in Friûl.

      Ma nol durà a lunc nancje in cheste incarghe. Muart l’an daspò (1519) l’Imperadôr Massimilian, i sucedeve intai teritoris sometûts ai Asburgs, e tal titul imperiâl, il nevôt Carli, che al jere bielzà re di Spagne. Dilunc l’Istât daspò (Lui 1520) il pape al nomenà siei nunzis apostolics ae cort di Carli V – in chê volte in Flandrie – Martin Caracciolo e l’Aleandro, chest ultin cu la incarghe particolâr di ocupâsi de condane di Martin Luther e de repression dal moviment ereticâl.

   L’Aleandro al rivà ae cort dal imperadôr ai 26 di Setembar, al le cun lui a Aquisgrane, dulà che al fo incoronât Imperadôr de Gjermanie, po a Colonie, in fin inte grande diete di Worms. La diete si vierzè ai 27 di Zenâr dal 1521. In chê assemblee al fevelà par trê oris, ai 13 di Fevrâr, ma nol rivà a evitâ che Luther, za scomunicât e scjampât par pôre di vignî copât, al vignìs clamât di persone a fâ valê lis sôs resons. Vadì che il document dal pape di Rome al fos sotponût a un gnûf esam e a altris discussions. Par altri a Worms l’Aleandro al de prove di grande pazienzie, cûr e indurance, al fasè apel a dutis lis sôs dotazions di sagacitât e di culture, ma nol podè istès rivâ a vêle vinte e cussì e le in strucs gran part de sô fondamentâl mission.

     Al murì a Rome sul scomençâ dal 1542 e al fo sepulît a S. Grisogono, ma po al vignì traspuartât a Mote secont lis disposizions lassadis tal testament. Josef Marchet – test tirât fûr da “Il Friuli: uomini e tempi” - ridusût e voltât par furlan par cure de redazion)

_____________________________________________________________________________________

Ladins dal Friûl pag.6 – Otubar 2016

DAI FATS E DE CULTURE

DES TIERIS LADINIS

Lis premiazions dal concors “Mendranze ’n poejia”

E à vinçût la lenghe provençâl: il secont puest lu à cuistât la lenghe furlane

Col / Cuel S. Luzie (Bl) – Al è rivât insom sabide stade, 10 di Setembar, inte sale dai congrès di Reba/Arabba, cu la premiazion dai vincidôrs de novesime edizion, il concors nazionâl di poesie pes lenghis minoritariis “Mendranze ’n poejia” / “Minorancis in poesie” pe edizion 2015/2016 (il concors al è bienâl).

    Cheste manifestazion e je stade ideade tal 2005 de maestre Teresa Pezzei, in chê volte assessôr dal comun di La Plì de Fodom, cu la intenzion di tignî vivis lis minorancis di lenghe tuteladis de leç 482. La smire che e saborave Teresa Pezzei e jere chê di unî il sintiment identitari des comunitâts minoritariis e condividi la voie di fâ cognossi e valorizâ la proprie lenghe cu la passion pe poesie, forme leterarie dificil di componi ma che e da un valôr a ogni peraule scrite, un sens a ogni viers, e che e inricjîs il lengaç e il patrimoni culturâl di ogni minorance di lenghe.

    Daûr la regjie di Zuanpauli Soratroi, la referent ae culture dal comun di La Plì, Michela Lezuo, e à fat i onôrs di cjase, cun daûr Luca Agostini, dean dal Istitût Ladin “Cesa de Jan”, organizadôr de manifestazion.

    A cheste edizion a àn cjapât part 44 poetis, par un totâl di 146 oparis in concors. Lis minorancis di lenghe presints a jerin il ladin dolomitan, il furlan, il sardegnûl il grêc, il franc-provençâl, il cimbri, l’arbëreschë, il sloven, l’ocitan e il gjermanic (antîc alt todesc). Il president dal Istitût “Cesa di Jan”, rivant insom al propri intervent al à ringraziât i components de zurie dal concors pal lavôr davuelt. La zurie e jere cussì componude: president Domenico Morelli, e po Marzia Caria, Lilia Slomp Ferrari, Andrea Nicolussi Golo, Giuliana Bellodis e Lucia Trusgnach.

    La cunvigne e je stade legrade des cjançons de Piçule Corâl “Col di Lana”, direzude des maestris Luigina Dorigo e Reica Roilo. Inmò, dilunc la serade al è stât ancje presentât il video “La stria dal Sas de Stria”, realizât de classe 5° de Scuele Mezane di La Plì de Fodom dilunc l’an scolastic 2015/2016.

      A chest pont Zuanpauli Soratroi al à clamât sul palc i arlêfs des scuelis che a son stât premiâts inte sezion risiervade ae prose, consegnantjur il diplome e une litografie realizade in acuarel, opare di G. Troiano. Il presentadôr al à inmò ricuardât che aes scuelis ur larà purpûr un premi in bêçs, cemût che al jere proviodût dal regolament.

    Il tierç premi, pe sezion prose, al è lât a Sebastianus Pintus de tierce classe de Scuele Secondarie di Florianas (Sassari) che al à proponût par sardegnûl (Grascia Deledda – Grazia Deledda). Il secont premi al è lât impen ae classe IV de scuele Primarie di Pantianis e Merêt di Tombe, che e fâs riferiment al Comprensîf di Basilian e Sedean (Udin), che e à proponût par furlan “I mistîrs dal Tiliment - I mestieri del Tagliamento”. In fin, il prin classificât inte categorie al è stât l’arlêf Loris Mochor de classe V de Scuele Primarie “P. Tomazic” di Trebician, che e fâs riferiment al Comprensîf di Opicine (Triest), cu la opare par sloven dal titul: “Mark carovnice in caronbi kamen” - “Il buio, le streghe e la pietra magica”.

     Simpri par chel che al inten lis scuelis, pe sezion poesie, e à vinçût il tierç premi la classe I/b de Scuele Secondarie di prin grât di Auronzo di Cjadovri (Belun), cu la poesie “Monte Piana”, par ladin inte varietât di Auronzo. Il secont premi lu à cuistât impen l’arlêf Louren Giraudo de l’Escolo de Sanctio Lucio di Gambero Scuro (Cuneo), che par provençâl al à scrite la poesie “L’estabi” - “La stalla”. La arleve Lidia Arru de classe III de Scuele Mezane di Florianus (Sassari), che e fâs riferiment al Comprensîf “Antonio Gramsci” di Florianus, cu la la poesie “No b’est est pius” - “Non c’è più”, par sardegnûl, e à vinçût il prin premi.

     La serade e je rivade insom cu la premiazion dai autôrs maiôrs des poesiis che a àn vinçût. In premi l’aromai innomenade “Naghena da mont”, riproduzion, in edizion uniche, dal garoful salvadi di mont, opare de dite di oresinerie“Mastro 7” di Trent.

Il tierç premi al è stât consegnât a Andreina Trusgnach cu la poesie “Zivljenje – La vita”, par sloven. Il secont premi al è stât dât a Viviana Mattiussi, cu la poesie “Lenga di cjera” - Lingua di terra”, par furlan. Il prin premi al è stât in fin assegnât a Anneto Arneodo, cu la poesie “Outourn – Autunno”, par provençâl. Cheste la motivazion: “Cun viers incisîfs e malibiants la imagjine dal Autun si intortee intun paisaç che al riclame lis pineladis di Segantini”.

     Come che al jere sucedût pes passadis edizion, la lenghe ladine dal Friûl si è fate onôr ancje in cheste edizion dal concors riservât aes minorancis di lenghe. Minorancis simpri plui emargjinadis e dismenteadis, che dome la passion di pôcs e, soredut, la leterature in poesie e in prose, a rivin a daur la sgrimie par podê resisti e podê tramandâ cussì ai propris fruts la lenghe e lis tradizion dal timp passât, che no je dome memorie cence un dret, ma radiis par podê programâ e puartâ indenant miôr il presint, simpri plui dificil e complicât. Viôt il resint fenomen epocâl de imigrazion foreste che nus sta interessant come un burlaç, che no sin rivât inmò a capî, e a cjatâ la fate dai problemis che al sta impreteribilmentri puartantsi daûr.

     Un graziis i va inalore al Istitût Ladin “Cesa de Jan”, che al va dilunc a proponi chest concors par unî lis minorancis “cu la scuse” de leterature, par unî simpri di plui i Ladins des Dolomitis, dal Friûl e dal Grison de Svuizare. La culture e paie simpri e e fâs dal ben. Lis vueris, lis bombis e i svindics a puartin dome muarts, distruzion e asse tra la int, tra i popui. Fasìn in mût che la culture e copi la vuere cussì a tasaran par simpri lis armis. (edelweiß)

_____________________________________________________________________________________________________________________________________________________________

Ladins dal Friûl pag.7 - Otubar 2016

INTAI PRÂTS DE CULTURE FURLANE

Memoreant Siro Angeli: poete maiôr de nestre tiere

A son bielzà passâts 25 agns che nus a lassâts e nol è just dismenteâlu

Cesclans di Cjavaç – Za fa vincjecinc agns, ai 22 di Avost dal 1991, al murive a Tumieç a 78 agns Siro Angeli, une tra lis vôs plui altis dal Nûfcent leterari furlan e talian. Chest scritôr libar, che al à savût variâ la sô ativitât intai diviers cjamps, di Cesclans, il sô piçul paîs di nassince al rivà a lâ sù su la sene leterarie, teatrâl e fintremai televisive di une Italie che nancje no saveve dulà che e jere la Cjargne, che tancj a poderin scuvierzi propite a traviers lis imagjinis di Angeli, che al interpretave la part di Barba Zef tal film che al puartave come titul juste chest non.

     Par un curiôs mecanisim de societât mediatiche, inte memorie dai stes furlans Siro Angeli al è plui cognossût par cheste part di atôr se no pe sô slargjade ativitât di autôr di tescj pal teatri, senegjatôr, poete e romanzîr. Emigrant inteletuâl bielzà di zovin al partì de sô Cjargne (ognun cui pòuc, cui tant – al tradisc. Jò j ai fat la mê part – scomenzât da pizzul -, cun mê mari e il gno paîs) al scrivè. Daspò i studis al liceu Stellini di Udin, al fo selezionât par lâ a frecuentâ la Scuele Normâl Superiôr di Pise, come un altri grant scritôr furlan: chel Carli Sgorlon che daspò la muart di Angeli al proponè di titulai il Teatri Gnûf di Udin sostignint che “Angeli al è un scritôr dulà il popul furlan al po verementri spieglâsi e tornâ a cjatâsi, parcè che al è un autôr che al condivît ad in plen l’incussient coletîf dai furlans”. Ma titulazions no ’nd è stadis, ni a Udin e ni a Tumieç, dulà che si podeve dedicai almancul la Biblioteche Civiche.

     Ai numerôs lavôrs pal teatri e oparis in viers, al zontà la ativitât di critic pal cine e pal teatri par cuotidians e rivistis, e al lavorà in Rai dal 1955 par passe vincj agns come vicediretôr dal tierç programe e condiretôr dai servizis di prose radiofonics. Biografie e poesie si incrosarin in lui ae ocasion de pierdite de prime femine Liliana, che i dedicà il cjançonîr “La ultima libertà” (1962). Al fo un colp une vore dûr e dome tancj agns daspò, tal 1978, Angeli si tornà a maridâ cu la poete Alida Airighi, par lâ a logâ a Zurì, in Svuizare. Cundut che al jere lontan, al vivè simpri il leam cul Friûl in maniere passionade: e il taramot dal 1976 al invià in lui la vene poetiche par furlan in racueltis poetichis sugjestivis come “L’aga dal Tajament” (1976) e “Barba Zef e jo” (1985).

    La formazion culturâl di Siro Angeli e risintì dai inflùs des principâls corints leterariis dal Nûfcent, come il crepuscolarisim e l’ermetisim. Cemût che si à vût iniment denant trat al podè frecuentâ la Scuele Normâl Superiôr di Pise dulà che al fo arlêf di Attilio Momigliano e Luigi Russo. Cun Russo si laureà tal 1939 cuntune tesi sul teatri di Agnolo Fiorenzuola. Dilunc i agns Trente al cognossè e al strenzè amicizie cui poetis Giorgio Caproni e Alfonso Gatto, cul pitôr Renato Gottuso e cul fi di Luigi Pirandello, Stefano.

   Tal 1937 si screà come poete cu la racolte “Il fiume” che e vignì recenside in maniere favorevul di Diego Valeri, dutun in chel al metè in sene il so prin drame teatrâl, “La casa”, che al rapresentà il prin tassel de cussì clamade “Trilogjie cjargnele” che e sarà completade da “Mio fratello ciliegio” e “Dentro di noi”. La sô ativitât di autôr di dramis e fo preseade di Silvio D’Amico, che tal secont daspò vuere lu clamà a colaborâ ae redazion de “Enciclopedia dello Spettacolo”.

    A partî dai agns Sessante al intensificà la sô produzion poetiche, une vore preseade de critiche par vie che al savè coniugâ la rigorose tradizion classiche e umanistiche, che e rapresentave une part fondamentâl de sô formazion culturâl, a un profont interès pes corints che a diferenziarin la poesie taliane dal Nûfcent, prime fra dutis l’ermetisim. Tal 1976 al vincè il “Premi Nazionâl Leterari Pise” pe sezion poesie. (von zercläre)

_____________________________________________________________________________________________________________________________________________

Siro Angeli e la lenghe mari

     Scuasit in cidin, il non di Siro Angeli al è tornât a comparî in diviersis publicazions furlanis e ducj a pandin l’augûr che la sô no sedi une presince episodiche e casuâl, par vie che cheste presince e à credenziâls prestigjosis intai siei viers e tal so teatri, scrits par talian si ben, ma spieli fedêl di situazions e spirts cetant furlans. La sô trilogjie teatrâl, cjapade adun sot il titul “Gente di Carnia”, e reste une testemoneance impuartante, che si lei ore presint cun comozion, cun dut che a sedin mudâts i timps e lis prospetivis.

     Cun “altre vôs” al torne il poete ae sô tiere, ae ricercje dal timp pierdût, scuasit a volê tornâ a costruîsi des radrîs, a volê tornâ a vuadagnâsi une identitât a traviers lis memoriis. Ogni sô poesie e je come une lum impiade sot il ritrat dai siei di cjase, che a no son plui: la mari, il pari, il barba Agnul, i nonos... E par vie che inte sô cjase des memoriis no si po jentrâ cul cjapiel sul cjâf, chestis poesiis a son semplicis, voludis di pueste semplicis (ma ricjis di une gracie savinte). A son traviersadis di un lancûr dolint, une maluserie segantiniane, a semearessin a voltis fintremai dominadis di un ciert fatalisim che si lee ae rinuncie, ma po il suspîr al cuiste l’aspiet incuietant dai sintiments di colpe: il poete al à bandonât la sô tiere e al è come se al ves tradît la mari; cumò la sô cjase e je il ream dai ragns e alte e cres la jerbe tal so bearç. Se lui al torne, si sint “forest”: nissun lu acuse, se no la sô vôs interiôr. Lui al à disertât e no ’nd è pâs, se no tornant a scomençâ dal in prin: e velu tornâ a percori inte sô lenghe mari i motîfs che a jerin bielzà jentrâts intes sôs tematichis par talian. La sô anime si lave inte aghe frescje de sô lenghe: ogni poesie e devente un particule di memorie che i vierç la comunion cui siei muarts e e torne a dai la sô umanitât ad in plen. (Test tirât fûr de “Antologjie de Leterature Furlane” / II Edizion – B. Chiurlo e A. Ciceri – Edizions Aquilee / Tumieç 1976)

______________________________________________________________________________________

Ladins dal Friûl pag.8 – Otubar 2016

SCRITÔRS E LIBRIS IN MARILENGHE

Pre Zaneto: un tra i maiôr poetis popolârs dal Nûfcent

Al à publicât su la“Vite Catoliche” lis sôs rimis par plui di un cuart di secul

     Za fa cualchi mês al è jessût un gnûf libri, curât di Serena Fogolini e publicât par cure de Vite Catoliche (che si è zovade dal sostegn de Provincie di Udin, dal comun di Porpêt, de Filologjiche e dal Cirf ), che al à par titul “Don Giovanni Schiff (1872/1947) - Pre Zaneto, poete dal popul”, Pasian di Prât 2016, pp.206.

     Pre Zaneto, o sei Zuan Schiff, nassût tal 1872 a Porpêt e muart a Percût tal 1947, dal sigûr al pues sei considerâ un tra i plui popolârs poetis furlans dal prin Nûfcent. Al è stât plevan di Percût ma, plui dal ministeri pastorâl, i plaseve poetâ par furlan scrivint poesiis umoristichis satirichis sul custum e lis betincis dal timp. Li sôs composizions a vevin dispès une conclusion di critiche moralistiche. Ve par esempli ce che al scriveve: “Maladete ostarie! Al diseve Renzo tal libri imortâl/ di Manzoni, parcè li si disgrade/ l’omp fin sot di qualunque nemâl/ c’al bêf sôl quanche al sint la bisugne”. (Vite Catoliche – 3 Dicembar 1944).

    Ogni setemane e par passe un cuart di secul prime de ultime vuere, al mandave une sô poesie ae “Vite Catoliche”, il setemanâl publicât de arcidiocesi di Udin, e i letôrs aromai lu cognossevin e a lavin daurman a leile parcè che lis sôs rimis a pituravin i costums (ancje politics) dal timp secont l’antîc sproc di De Santeul ,”Castigat ridendo mores”. Ae stesse maniere pre Zaneto al cirive ancje di corezi lis malegraciis dai siei parochians predicjant simpri par furlan e doprant la arme de satare legre. O podìn in cheste maniere dî che tal timp dal fassio in Friûl cheste e je stade la uniche oposizion, su la cjarte stampade, a un regjim grubian e arogant. Tant che a un ciert pont, daspò des minacis fisichis, la federazion dal fassio di Udin e olsà a lâ alì dal vescul a protestâ, otegniint la proibizion par pre Zaneto di poetâ par furlan.

    La proibizion dal furlan e ve une rispueste dibot comiche, parcè che pre Zaneto al zirà l’ostacul scrivint in cheste maniere: “ci cimiavano le stele e la luna pal loro boro ci lusiva...” che e jere une maniere umoristiche di doprâ il furlan menant pal boro i sorestants. Cuant che tal 1943 al è colât il regjim fassist e e je vignude a mancjâ ancje la improibizion dal scrivi par furlan, propit su “Vite Catoliche” pre Zaneto al invidave ducj i letôrs a tornâ a saludâ cul “mandi”, come che si veve simpri fat in Friûl. Sun chest cont o podìn inalore dî che no dome, pai fassiscj, lis poesiis par furlan di Zaneto a jerin sintudis come un pericul cuintri la italianitât di chestis tieris, ma la stesse lenghe furlane pai menadôrs nazionaliscj di Rome e rapresentave un ostacul, pericolôs, tal imponi la italianitât al Friûl. Une azion che, magari cussì no, e je continuade ancje daspò la colade dal fassio, e e je presint inmò in dì di vuê, ancje cu la poie dal gnûfs media. Baste dome ricuardâ che il ricognossiment dai ladins furlans come minorance, e il furlan come lenghe, cemût che par altri e proviodeve la gnove Costituzion republicane al articul 6, al è rivât dome tal 1999 cu la leç 482. Une leç che par altri no je mai stade aplicade ad in plen, co e je stade disvuedade an par an des risorsis finanziariis che a coventin par fâle funzionâ.

    “Chest poete – al à sotliniât Faggin – nol à vût la innomine che al varès mertât a bon dirit”. Ancje Pasolini lu à laudat pe sô “fuarce espressive elementâr” tant di rivâ a includilu inte sô antologjie “Poesia dialettale del Novecento” dal 1952. E lauts a Zaneto i son rivadis ancje di Zuan Franc D’Aronco che lu à metût dentri intes sôs antologjiis.

     Inte sô presentazion, inte jentrade dal volum curât de brave Serena Fogolini, Pieri Fontanin president de Provincie di Udin, al scrîf: “Chest prin curât ritrat di Pre Zaneto nus presente une personaç pardabon carismatic, impegnât plui che inte divulgazion de peraule di Diu, inte valorizazion de sô tiere, dal so popul e de sô lenghe. Une azion che e viôt protagonist un predi, une altre testemoneance dal impegn impuartant de Glesie Furlane inte difese de identitât locâl.

     Se cualchi trat de sô vite al è vignût fûr in maniere clare, dute inmò di studiâ e je la sô produzion poetiche siore e pôc indagade. Un aprofondiment plui che dovût che al zovarès cence dubi a insiorâ il studi dal patrimoni leterari dal Friûl”.

La schede: S. Fogolini (par cure di), “Don Giovanni Schiff (1872-1947) – Pre Zaneto, poete dal popul”, Ed. “La Vite Catoliche”, Pasian di Prât 2016, pp.206 .

_______________________________________________________________________________________________

“Ladins dal Friûl” Diretôr responsabil : Renzo Balzan - Reg. Tribunâl di Tumieç n. 123 dai 09.03.98

Redazion : 33028 Tierç di Tumieç - V. Dandolo16 / tel. 0433/43696 / e-mail : ladinsdalfriul@gmail.com

F.I.P. (fotocopiât in propi) a Tierç di Tumieç (Ud) V. Dandolo 12 pes - Edizions “Union Scritôrs Furlans”.

La publicazion e ven spedide es Bibliotechis dal Friûl, es Istituzions Culturâls Ladinis des provinciis di Bolsan, Trent e Belun, e a ducj chei che a mandin la lôr libare contribuzion doprant il C.C. bancjari nr.19162 dal “Banco di Brescia” (Filiâl di Tumieç) - codiç IBAN: IT50H 03500 64320 0000000 19162

Chest gjornâl inte sô version online si lu cjate tal sît : http://ladinsdalfriul.blogspot.it

Publicât cul sostegn de Provincie di Udin – L.R.24/2006 art.26

Anade ( XIX ) n.9 Setembar 2016

Periodic-mensîl di informazion e culture sul cont de minorance celtiche

dai Ladins de Furlanie. Edizion par cure de associazion “Union Scritôrs Furlans”

Un Friûl cence Provinciis e cence identitât

… e colp di man di Rome sul eletrodot Udin Ovest-Redipùie

    Rome, 19 di Lui 2016, date storiche, par ledrôs. il Senât, in seconde leture al à fat bon il gnûf Statût dal Friûl-Vignesie Julie e cence nissune modifiche al test inviât a Montecitorio di Palaç Madama. Il pont di fonde dal gnûf Statût al proviôt la butade jù des Provinciis e al trasforme cussì il Fvg inte prime realtât in Italie che e met de bande i ents intermedis.

    Cun grande sodisfazion dal president Debora Serracchiani (daspò lis bastonadis cjapadis intes intes resintis votazions comunâls e inmò cûr di lâ sui gjornâi a fâ muse di ridi n.d.r.!) il Senât al à aduncje aprovade la butade jù dal Ent Provincie dal Statût dal Friûl-Vignesie Julie. In rivuart l’art. 2, come 1, al recita (ve): “la Regjon e comprent i teritoris des atuâls provinciis di Gurize e di Udin e dai comuns di Triest, Duin-Aurisine, Montrupin, Mugle, San Dorlì e Sgonigo” (elenc dai Comuns che probabilmentri al diven dal fat che al moment de fate buine dal Statût, tal 1963, si jere in spiete de definizion su la assegnazion definitive de Zone A ae Italie e de zone B ae Jugoslavie).

    Aduncje, butadis jù lis cuatri Provinciis (Udin, Gurize, Pordenon e Triest, ents di aree slargjade a elezion popolâr direte) che a esistevin di 150 agns in ca, a son stadis istituidis 18 (disevot) Unions teritoriâls intercomunâls di secont grât, di aree une vore ridote, vâl a dî che ae fin, o varìn 14 (cutuardis) ents public teritoriâi in plui, cun dute la burocrazie conseguent.

    La Uti juliane di Triest e corispuint in pratiche ae Provincie di cumò e partant si bute jù un ent e si indi cree un gnûf al so puest. L’Austrie e veve concedût tal 1848 un statût speciâl ae Citât di Triest, che e deventà, dutun in chel, Citât e Provincie. Il so Consei al fo insiemit comunâl e provinciâl e i siei membris a jerin conseîrs comunâi e deputâts provinciâi, esercitant une autonomie une vore slargjade. E cheste grande autonomie e podarà tornâ une altre volte cu la Citât metropolitane che al sta domandant il senatôr Russo (prevision metude dentri, dal rest, tal gnûf Statût). Pas daspò pas, si rivarà a chest risultât, ancje se il Consei regjonâl al à fate finte di sei contrari, naturalmentri par cumò.

     No si à capît invezit se dome pe za Provincie di Pordenon al vignarà instituît il Circondari. Partant la Regjon e varès di comprendi i Comuns des za Provinciis di Udin e Gurize, lis Uti, la Citât metropolitane di Triest e il Circondari di Pordenon. Nô sotans, becs e bastonâts, no vin il dirit di savê lis veris intenzions dal guvier regjonâl. L’assessôr Panotin, che al è tant precîs, in chest câs la sta fasint il furbat.

    Al è evident che in cheste maniere il Friûl al è destinât a disparî. Al restarà dome une denominazion gjeografiche-storiche, e dut chest al è daûr a sucedi graziis ae debeltât dai nestris parlamentârs e dai conseîrs regjonâi, che a son stâts elezûts pe plui part in Friûl, che, intes intervistis sui gjornâi, a àn purpûr il cûr di laudâsi de butade jù des Provinciis furlanis. Ce che no si fâs par salvâ il cûl e la poltrone!

   Simpri sul cont des Uti, e dai presumûts sparagns, bisugne purpûr sclarî che chescj 14 ents locâi gnûfs a varan bisugne di une sede (cun conseguents coscj di manutenzion straordenarie e ordenarie, lûs riscjaldament e v.i.), un gnûf confenon, une gnove cjarte intestade; magari di cualchi segretari gjenerâl (no ducj a lavorin dibat). Al sarès interessant savê se de bande de Regjon al sedi stât fat un calcul de spese, juste par da di viodi che si sta verementri sparagnant.

    Daspò chel dai 19 di Lui un altri colp di man al è rivât sù di Rome ai prins di Avost simpri a dam dal Friûl: Il guvier Renzi, ai 10 di Avost, al à dât l’ok parcè che a vadin indenant i lavôrs di completament dal eletrodot Udin Ovest-Redipùie. In rivuart il Consei dai ministris al à deliberât in merit al procediment proponût dal ministri dal Ambient. La deliberazion e permet al procediment di lâ indenant inte realizazion dal implant, che al jere stât blocât dal Consei di Stât par resons di impat ambientâl.

   Nol covente dî che o sin in presince di une sfuarçadure, di une arogance, di une imposizion che e va cuintri ogni regule e rispiet des prerogativis democratichis. I ents locâi interessâts, lis associazions ambientalistis, i parons dai terens interessât no contin nuie. Al è di ce sgrisulâsi a viodi cemût che o stin sbrissant simpri di plui intun autoritarisim che nol concêt plui spazis di critiche e di dissens.

    E impere aromai la veline complasint. Il Friûl nol po ridusisi a tasê e a gloti ce che i conte il Messaggero Veneto daûr di ce che i pandin i uficis stampe de Regjon. Il Friûl al scugne reagjî, sul esempli di ce che al sta fasint Aldevis Tibaldi cul so indurant “Comitât pe Vite dal Friûl Rurâl”. Il Friûl al à di jessi bon di meti in vore une strategjie di contrast ae cubie Panontin-Serracchiani prime che dut si ridusi intune maserie. La maserie di un Friûl che nol po acetâ di murî! (tarvos)

Ladins dal Friûl pag.2 - Setembar 2016

DAL TIMÂF A LA LIVENCE

I profugos e il pericul dal terosisim

La menace jihadiste e je aromai a 200 chilometris dal Friûl

    “A un ciert pont si varà une diaspore di teroriscj de Sirie cemût che no la vin mai viodude prime”. L’alarmi rivât al congrès Usa de bande dal numar un dal Fbi James Comey nol sorprent lis intelligence europeanis che di un pieç in ca a stant metint in vore impuartantis risorsis, umanis e economichis, par cirî di tignî sot control i spostaments di miârs di combatents che di dut il mont a son svolâts in Sirie e in Irak par sostignî il standart dal Califât islamic.

    Di cuant che al è scomençât il conflit, secont diviersis stimis, circje 30 mil personis a saressin rivadis in Sirie e in Irak, divignintti di plui di cent nazions: il 60% dal Medi Orient (cun Arabie Saudide e Gjordanie in teste) e dal Nord Afriche (principalmentri de Tunisie e dal Maroc), mentri 5 mil a saressin chei partîts de Europe.

   Cetancj di lôr a son muarts in bataie o ben a son tornâts intai Paîs di divignince, dispès confondûts tra i profugos dai barcjons, e il lôr numar, stant ae stimis furnidis il mês di Jugn stât dal maiorent de Cia John Brenan, al è comprendût tra i 18 e i 22 mil. Man man che l’Isis al ziruche sul teren, chescj sogjets a tentaran di rientrâ intai lôr Paîs fasint di fat “aumentâ simpri di plui” la pussibilitât di atacs come chei di Parìs e di Bruxelles.

    Altri fenomen che al scugne metinus in alarmi al è chel des feminis europeanis che a sielzin di lâ a unîsi ai teroriscj dal Califât in Sirie e in Irak. Il dât al ven fûr da un rapuart dal Europol sul terorisim, dulà che si ven a savê che circje il 40% dal totâl dai “fighters” che si stime partîts de Olande a son feminis, mentri de Finlandie e de Gjermanie a son il 20%.

    I numars a vegnin descrits in aument ancje de Svuizare, Belgjiche e Ingletiere. “La lôr funzion – al ment in vuaite Europol - e podarès cambiâ in a vignî, cun conseguencis su la nature e l’impat des operazion che l’Isis al è daûr a planificâ in Europe”. Lis podarès, in fats, doprâ come kamikaze co a àn plui facilitât di podê sghindâ i contrascj e i controi. In conclusion la lote al terôr e va dilunc, e e sarà lungje. O cognossarìn altris atentâts e altris moments di dificoltât, ma ae fin si podarà vinci, unîts e determinâts, come i teroriscj, plui dai teroriscj, che no son bogns di prometi altri che muart e miserie.

    Par chel che al inten il Friûl, par cumò al reste une tiere di passaç e di riorganizazion ma al è evident che la gjestion dai profugos (richiedenti asilo n.d.r.) cussì come che e ven fate no funzione gran. Cun chestis soluzions, massime tal contest di Udin, no si po lâ indenant, al di là des predicjis de Caritas, dal prefet, dal assessôr Torrenti e de president Serracchiani.

    Dut câs par nô a ’nd è altris, cetant plui preocupantis considerazions di fâ: Bihac in Bosgne, a uns 200 chilometris dal Friûl, Kacanik e Pristine in Kossôf, Novi Pazar e Sjenica tal Sangjacât serbian, Cumanovo in Macedonie. E je cheste la mape dulà che al è daûr a inlidrisâsi l’estremisim islamic intai Balcans .

   In Kossôf, Bosgne, Sangjacât (a Misdì de Serbie, sul confin cul Monteneri), sul scomençâ dai agns Novante si à vude la vignude di mujaheddin, finanziâts de Arabie Saudide, une realtât che e à zovât che fâ cressi di numar i musulmans wahabîts, il grup plui radicâl, persuadûts che a son nimîs dal islam ducj chei che no pratichin ae letare il Corano. La vignude di cheste corint integraliste e je stade leade ae vuere di Bosgne, cuant che miârs di volontaris arabics islamics a deciderin di vignî a combati a flanc dai musulmans bosniacs. I americans in chê volte a àn sierât i voi, fasint finte di nuie, e naturalmentri sbaliant inmò.

   Finide la vuere, su invît de sorestanzie locâl, tancj a lassarin il Paîs, ma altris a restarin. A fâ slargjâ intai Balcans il wabisim a son stâts i grancj finanziaments e la propagande inviuladis des associazions colegadis ae Arabie Saudide. Fonts no uficiâls a pandin che a saressin almancul 150 i integraliscj partîts de Bosgne par lâ a combati in Sirie e in Irak.

   Cu la ricostruzion de Bosgne daspò de vuere si à vude ancje la nassince di numerosis organizazions umanitariis prudeladis dai Paîs islamics, dal Alt comitât saudît de fondazion, ae Al-Haramain, fint ae Societât pe rinassite dal patrimoni islamic. Chestis associazions a àn puartât, in cheste part de Europe, ae presince di un islam gnûf, leât al wahabisim, visibil soredut a Bihac, Teslic, Zeppe. La enclâf dal Isis plui dongje di nô e je chê di Bihac, dulà che e je une part dal teritori che lis autoritâts bognachis no controlin, lûcs dulà che pulizie no si riscje a jentrâ.

    In Kossôf, a Karanik, l’iman Florin Nezir al è stât dongje a Ilir Berisha e Jetmir Kycyku, ducj i doi arestâts par terorisim, ma il so plui grant sostenidôr al è Lavdrim Muhaxheri, albanês, vuê un dai maiorents dal Isis, famôs par jessisi fat fotografâ intant che al taiave il cjâf dai presonîrs in Sirie. A Karacanik a operavin liberementri dôs organizazions islamichis radicâls e dome di alì tal 2014 siet oms a son partîts par combati pal stât islamic. Lis organizazions a son stadis po sieradis dome parcè che, tal 2014, il Parlament di Pristina, su pression dal guvier american di Obama, al à fate buine une leç cuintri i foreign fighters.

    Inte comunitât musulmane dal Misdì de Serbie, tal Sangjocât e inte regjon a maiôr presince albanese di Presevo e Bujanovac, al da di fastidiâ il costant aument de presince religjose integraliste. Sun chest cont si fevele di 30, 50 combatents serbians musulmans in Sirie e Irak. Tal Sangjocât il wahabisim si è inlidrisât ae mitât dai agns Novente e al sta cirint di slargjâsi, e cjapâ pît, in ducj i Paîs dai contors.

    A Kumanovo, in Macedonie, a son resints i scuintris tra miliziis islamichis e pulizais, cun diviers muarts. Pe pulizie i islamics a son jentrâts tal Paîs de Albanie e dal Kossôf e a ’nd è provis che i components des miliziis a fossin int ben preparade par combati, e par organizâ azions teroristichis.

   Dai Balcans par rivâ in Sirie vuê al è une vore facil, parcè che a esistin diviers colegaments cun Istabul, vie bus e par avion. Ve parcè in Friûl si scugne cjalâ cu la massime preocupazion al pericul jiadist, e al fat che si puedi messedâ e confondi tra i tancj profugos che a passin par chenti e che dibot nissun controle.

   Inmò, in chestis condizion permeti di vierzi gnovis moscheis in Friûl, al è come puartâsi in cjase dai pericolôs “cjavai di Troie”. Come che al è pericolôs insedâ gruessis comunitâts di profugos intai piçui paîs de Furlanie, juste cemût che si sta cirint di fâ a Bicinins. (renzo balzan)

Ladins dal Friûl pag.3 - Setembar 2016

CRONICHIS DI CHENTI

Almancul za 5100 profugos presints in Friûl-V.J.

A rivin jù de Carintie: si trate di afghans e pakistans

Udin – O vierzin chest articul cuntune provocant riflession di Alfio Eglaro, di Paluce:

“Cjatade la fate al probleme de scjarsitât di predis in Cjargne. Ve la origjinâl soluzion che di resint e je vignude fûr. Daspò il storic zimulaç tra catolics e islamics, celebrât a Museis di Çurçuvint cu la benedizion dal arcivescul di Udin Mazzoccato, e la supervision dal eroi Garibaldi, si è convignût in maniere bilaterâl di mandâ intes parochiis dulà che cumò nol è un predi catolic, un iman islamic co chescj a son in incressite e za in numar sorebondant.

    Il gnûf iman, oltri a slargjâ la buine gnove dal islam, dut câs par talian, si zovarà de strete colaborazion dai volenterôs laics locâi par mantignî (inmò par un pôc) la religjon catoliche fint che po e vignarà cjapade dentri, in maniere pacifiche e serene, tal grant islam puartadôr di pâs, di justizie e di misericordie.

   Ancje la catedrâl di S. Pieri in Cjargne e semee che si stedi preparant al epocâl acjadiment cun preieris e novenis che a riclamin sdrumi di fedêi di dutis dôs lis fedis. Amen. Allahu akbar!”

   Il flus di profugos che al rive jù de Austrie in Friûl-V.J. al sta di resint ralentant, graziis soredut aes gnovis stretis decidudis dal guvier ongjarês al confin cu la Serbie che a slaifin il passaç a miârs di personis viers il centri Europe, ma istès no si è dal dut fermât. Sierade une pussibilitât si indi studiin di altris. Ai marcjadant di oms (di profugos) no ur mancje la fantasie, ma soredut la determinazion. A son in bal vuadagns grandons.

   Tal mês di Lui, in fats, a son stadis 579 lis personis fermadis inte zone di Tarvis, al confin cu la Carintie, des fuarcis dal ordin – e 17 respinzudis in Austrie – biel che a e Jugn a jerin stadis 941 (cun 12 personis respinzudis oltri confin), cul totâl dal inizi dal an di pôc mancul di 5 mil personis vignudis chenti a domandâ asîl. Pe esatece 4 mil 579 di lôr, soredut di nazionalitât afghane e pakistane.

    Une sdrume di int che e continue a meti in dificoltât il sisteme di acet dal Friûl V.J. tant che il president Serracchiani e l’assessôr Torrenti si son sintût obleâts a domandâ al ministris dai Internis, Alfano, di scomençâ a slizerî il teritori di almancul une part dai migrants.

   I numars, tal detai, nus pandin che a son 1800 i profugos presints in Provincie di Udin – la plui part lozâts intes ex casermis Cavarzerani e Friuli dal cjâf lûc dal Friûl – 700 a Triest, 600 tal Gurizan – cun 300 tal sôl Cara di Gradiscje – e 1000 a Pordenon e intai contors. Plui di 4 mil personis aduncje. A chescj bisugne inmò zontâ 450 minôrs no compagnâts logâts in diviersis struturis convenzionadis.

   Une cifare che e va ben oltri de cuote di ripart decidude dal Viminâl pe nestre Regjon che e puarte a spietâsi, almancul par Udin, dulà che la situazion e je daûr a lâ fûr di ogni control co i profugos a son aromai daûr a ocupâ fintremai i zardins publics, intervents che no puedin plui jessi rimandâts, ancje par resons di ordin public.

  In sumis trasferiments necessaris par podê “fa respirâ” il teritori, ma un dai problemis di cheste ingolfade situazion al è leât al rimpatri di cui che nol oten un dai status juridics necessaris par podê restâ chenti. E in chest sens, cualchi buine gnove e podarès rivâ jù di Bruxelles e dai gnûfs pats che la Union Europeane e à strenzût cui cierts Paîs asiatics di dulà che a divegnin la plui part di chei che a vegnin a domandâ asîl. Si trate vadì soredut di acuardis cul Pakistan e cul Afghanistan par tornâ a cjapâsi indaûr chei citadins che no àn dirit al asîl. Acuardis che a varessin di jentrâ in vore dal mês di Zenâr cu ven e che, se a deventaran pardabon operatîf, a permetaran al Friûl di podê dai une soluzion ae emergjence vuê presint sul nestri teritori. Vedarìn, ancje parcè di Rome di impromissions fint a vuê a son stadis fatis masse, ma cence grant costrut. Un altri probleme che tocje segnalâ, simpri sul cont di Rome, come simpri e je in ritart cul paiament dai vê di vê a cui che si ocupe de gjestion dai profugos, come par esempli la Crôs Rosse e la Caritas, par no fevelâ de schirie des cooperativis convenzionadis. Si trate di cualchi milion di euros e no di fufignis. (mateu di prun)

Leghe Ambient: bandieris neris pe Mont Furlane

Tumieç – Ancje chest an la Carovane des Alps di Leghe Ambient e à dât i siei judizis sul cont de salût dal arc alpin e, in cheste edizion 2016, e à assegnât undis bandieris verdis pes situazions plui virtuosis sul cont de gjestion dal teritori, e vot neris. Tra lis bandieris neris o cjatin ancje chês assegnadis ae Cjargne e ae mont furlane cun riferiment ae gjestion des risorsis idrichis dal teritori, che aromai a son stadis slontanadis de gjestion direte dai comuns, par consegnâlis a entitâts esternis che a àn par smire dome il profit. Achì la responsabilitât dai politics e dai aministradôrs e je grande. Si son fats meti il pît sul cuel di chei che a comandin inalgò, cu la complicitât palês de burocrazie che e parone intai palaçs regjonâi a Triest.

    Bandiere nere ancje par chel si è daûr a fâ a Pas di Pramuel, parsore Pontebe. Un progjet che al à dute la ande di sei un straçarie di bêçs (publics) par incressi une ufierte turistiche pe pratiche dal schi che aromai e je plui che sorebondante. (mdp)

Ladins dal Friûl pag.4 – Setembar 2016 

D O C U M E N T S

Letare di “Patrie Furlane” a Vladimir Putin

La iniziative e je partide de resinte visite in Slovenie dal maiorent rus

Udin – Ai 30 di Lui stât, il president de Russie Vladimir Putin, al à davuelt une visite di lavôr inte daprûf Slovenie su invît dal president sloven Borut Pahor. I doi leader a àn purpûr cjapât part ae cerimonie che e celebrave i cent agns de costruzion de capele russe al pas di Vrsic, e par screâ il monument dedicât ai soldats rus che a son muarts in Slovenie dilunc la Prime e la Seconde vuere mondiâl. Il moviment autonomist “Patrie Furlane” al à cjapade cheste ocasion par fâ vê al president rus une letare sul cont de situazion de minorance furlane. Il test, cetant interessant, lu publichìn culì sot vie (red.)

    Ecelence President Vladimir Putin, cun rispiet pe Sô persone e pe Sô impuartante posizion di rapresentant inte sene internazionâl, I scrivin in cualitât di rapresentance politiche dal Popul furlan, une minorance dentri vie de Italie che e loghe intun teritori che si cjate a pôcs chilometris de Slovenie, Paîs dulà che Lui al è in visite in chescj dîs.

    E propite pe stime che o vin viers di Lui, o sin in grât di sintîle dongje de nestre Tiere, ai cetancj leams culturâi e economics tra il Friûl e la Russie, che i nestris popui a àn intiessût di simpri dilunc la storie.

    Pe sô sensibilitât in difese de identitât russe e europeane in chescj timps di confusion, o voressin riclamâ la Sô atenzion sul a vignî dal nestri Friûl.

   Inte cuarte relazion su la metude in vore de Convenzion pe tutele des Minorancis Nazionâls presints in Italie, publicade di resint de Comission Europeane al è riferît in maniere corete che in Friûl-Vignesie Julie a esistin i grups Furlan, Sloven e lis comunitâts linguistichis di divignince todescje, ma, tal test, si àn iniment dome lis misuris di protezion pal grup Sloven.

      O vin cussì decidût di scrivii par cont di circje un milion di Furlans che a son stâts inmò une volte dismenteâts.

    No rivin a capî la reson parcè che no esisti nissune avualitât tal tratament tra lis minorancis: o sin sigûrs che cheste disavualitât no dipendi dal numar di personis coinvolzudis (i Slovens in regjon a son circje 20 mil), ma nô o suponin che indi sedin altris resons che vuê no cognossin.

  Al è impuartant sotliniâ che la Republiche Taliane, cu la Leç n.482/99, e à ricognossût in maniere uficiâl la lenghe furlane; partant la discriminazion denant tra vude iniment no je une nestre opinion, ma ben invezit fats aciertâts di documents uficiâi.

   Il teritori dal Friûl al cuvierç l’80% de Regjon aministrative dal Friûl-Vignesie Julie e i siei abitants a son clamâts Furlans; chest teritori si slargje dal Mâr Adriatic aes Alps (circje 150 Km) e al cjape dentri trê Provinciis (Udin, Gurize e Pordenon). Al confine cu la Austrie a nord, cu la Slovenie a est, si bagne tal mâr Adriatic a sud, e inmò al confine cu la daprûf regjon taliane dal Venit a ovest.

   Par vie di cheste posizion strategjiche, al sucêt di frecuent che lis ints furlanis a lavorin inte daprûf Austrie pûr logant in Italie cu lis lôr fameis.

    In prionte, cetantis aziendis furlanis a cooperin cu lis daprûf aziendis austriachis e slovenis e cui rus plui che se no cu lis aziendis talianis: cheste tindince e je incressude par colpe de resinte crisi economiche. Il Friûl al à une viere storie di passe mil agns, in fats il Patriarcjât di Aquilee al è stât une entitât aministrative, politiche e religjose achì esistude inte ete dal 1077 al 1420, cun lidrîs comuns cu la Glesie russe.

    Il podê religjôs, al rivave cu la sô autoritât fintremai a une zone che si slargjave fint al flum Donau a nord, al Lât Balaton a Jevât e al atuâl Cjanton Ticin a Bonât; tal 1751 al comprendeve ancje la Istrie a Misdì.

   Il Parlament dal Friûl e je stade la principâl istituzion di guvier dal Patriarcjât di Aquilee e al à funzionât dal 1321 al 1805; sul scomençâ, la istituzion e jere dome consultive e rapresentative de nobiltât e dal clericât, ma tal XIV secul e deventà purpûr une assemblee legjislative cun ducj i efiets e ancje cort supreme.

Al è impuartant sotliniâ che la nestre regjon aministrative e à il non uficiâl di “Friûl-Vignesie Julie” e che la Direzion aministrative si cjate inte citât di Triest; lis decisions a son simpri cjapadis cence la aplicazion des normis su la protezion de minorance furlane.

   Il Guvier nus dinee la comunicazion sui media (radio e television publiche) e al slaife l’insegnament de lenghe furlane intes scuelis.

In timps resints, al è stât proponût di creâ dôs circoscrizions eletorâls (viôt la leç clamade “Italicum”) disegnant su la mape une linie di separazion verticâl cence tignî cont des diferencis culturâls e gjeografichis che a son propiis di cheste regjon. Chest al è stât fat par dividi il Friûl in dôs parts, in maniere di incressi la potence di Triest (che nol è Friûl, ma Vignesie Julie).

   Il Friûl al è une entitât storiche, linguistiche e soci-economiche, cuntune proprie leterature, la proprie identitât, cuntune proprie lenghe ricognossude in maniere uficiâl dal Stât talian e cuntune lungje tradizion di autonomie.

   La nestre propueste e je chê di dividi la regjon che o vin cumò in dôs entitâts aministrativis disseparadis, cemût che bielzà si à sielzût di fâ par avuâls regjons talianis: Val d’Aoste e Trentin/Sud Tirôl: dome in cheste maniere i dirits dai furlans no saran plui tibiâts.

   Une minorance nazionâl di un milion di personis e merte il stes rispiet di cualchi miâr di slovens.

   O fasìn avôt che chest ciul di jutori al podarà vê la juste considerazion e che, pe amistât che di simpri e à leât i nestris Popui, Lui impuartante figure di maiorent dal Stât rus, al puedi dâ vôs a cheste richieste di rispiet de minorance furlane.

    Graziis di cûr stimât President, o sin sigûrs dal So interès par chest popul a voaltris par simpri amì e cun cordialitât lu saludìn cul nestri tradizionâl, “Mandi” (Che al sedi intes mans di Diu).

Cun cetant rispiet!

(Patrie Furlane-Moviment pe Autonomie dal Friûl -

il test origjinâl par inglês al è stât voltât par cure de redazion)

Ladins dal Friûl pag.5 – Setembar 2016

D O C U M E N T S

Assemblee de Comunitât Linguistiche Furlane

Ordin dal dì sul cont de tutele e valorizazion de autonomie e de specialitât de Regjon Autonome Friûl – Vignesie Julie

    Il CONSEI COMUNÂL, premetût che l’Autun cu ven si davuelzarà il referendum confermatîf des modifichis costituzionâls fatis buinis dal Parlament e che il risultât al sarà determinant pal a vignî dai rapuarts tra Stât, Regjons e Ents Locâi, cualsisedi che al podarà jessi il risultât de consultazion popolâr. In particolâr la atenzion e continuarà a sei smirade sul a vignî des Regjons e Provinciis autonomis a statût speciâl ogjet – secont lis modifichis di une situazion transitorie che e varà di jessi po definide – ancje di une prionte di normativis di caratar costituzionâl;

   Che in chest cuadri la situazion dal F-VG, vuê bisugnose dut câs di une profonde revision intai rapuarts cul Stât sedi inte definizion des propriis competencis che tal recupar di une autonomie finanziarie comprometude intai agns de crisi e dai tais conseguents a favôr dal belanç statâl, e je cetant delicade e e domande un impegn gjenerâl par jessi frontade inte ricercje di risultâts positîfs;

   Che imagjinâ l’avignî des Autonomiis speciâls ae lûs de riforme costituzionâl al domande prime di dut un grant lavôr di cognossince des motivazions profondis de specialitât e partant dai principis e dai valôrs che a àn tradusût chês motivazions in normis juridichis inte Costituzion de Republiche Taliane.

  RITIGNÛT che la vie pe tutele e valorizazion de autonomie e je dome chê di un rinovât e clâr pat tra lis Regjons autonomis e il Stât cuntune intese fondade prime di dut su la convinzion de bande dal Stât che lis autonomiis locâls, no dome chês speciâls, a sedin strument di svilup positîf e su la plene assunzion di responsabilitâts de bande des autonomiis stessis rispiet al esercizi dal autoguvier;

    CONSIDERÂT: Che, su la fonde dal art. 39 come 13 de leç di modifiche costituzionâl che a Novembar e sarà sometude al tamês dal vôt popolâr, e je proviodude une fase transitorie di no aplicazion des modifichis pes regjons speciâls fint ae revision dai rispetîfs statûts di ativâ su la fonde di intesis tra lis stessis Regjons e il Stât;

   Che, dut câs, chê clausule sospensive dai efiets de riforme no pues intindisi di caratar infinît co za vuê e je ogjet di interpretazions diviersis che a fasin imagjinâ efiets une vore negatîfs sul a vignî de autonomie speciâl stesse, ancje a partî de incombence dal gnûf come 4 dal art. 117 de Costituzion, norme di “supremazie” che e permet al Stât di intervignî su podestât di strete competence regjonâl “pe tutele de unitât juridiche de Republiche o dal interès nazionâl;

   Che tal mês di Jugn 2015 e vignive anunciade la istituzion di une comission, cognossude come “Taule di Bressa”, che e varès vût “dentri il mês di Avost” (2015) di proponi une leç costituzionâl par dissiplinâ il mût di modificâ i statûts autonoms des Regjons speciâls cu la smire di prudelâ e rilançâ la autonomie;

   Che fint a vuê no dome no je stade proponude nissune norme, che anzit il lavôr di chê “taule” al è stât uficialmentri fermât fint che no si varà fat il referendum, determinant partant une situazion di grande inciertece intes modalitâts operativis des modifichis-revisions dai statûts di autonomie speciâl, cu la curiose situazion che in câs di risultât positîf dal referendum si varà di vê une ulteriôr discognossude leç costituzionâl che e varà di interpretâ lis modifichis atuâls;

    RICUARDÂT che la stesse President dal Friûl-Vignesie Julie di timp in ca in maniere uficiâl e domande che “inte ridefinizion des competencis Stât-Regjon a sedin tuteladis lis prerogativis e lis competencis fint a vuê garantidis al Friûl-Vignesie Julie e che al sedi proviodût un mecanisim di colaborazion-acuardi pe modifiche dal Statût speciâl”, e che inte stesse maniere si è esprimût il President dal Consei Regjonâl rivendicant il fat che a restin dutis lis resons de specialitât de Regjon intes sôs carateristichis gjeografichis, struturâls, economichis ,che par chest a domandin politichis a fuarte caraterizazion regjonâl;

    METÛT IN EVIDENCE par altri che cu lis leçs dal Stât, Leç 482/1999 e Leç 38/2001, si son definidis lis presincis des minorancis linguistichis tal teritori come presince struturâl de Regjon F-VG stesse e partant come elements dulà che al è necessari costruî gnovis capacitâts di interpretazion de bande des istituzions teritoriâls;

Dut chest premetût e considerât AL DELIBARE

Di invidâ il Consei e la Zonte Regjonâl:

1) a domandâ al Guvier che a vegnin fats bogns, prime dal referendum costituzionâl dal Autun cu ven, acuardis tra Stât e Regjon dulà che si vebin di definî i setôrs di specialitât e autonomie che al è convenient che a vegnin ricognossûts al Friûl-Vignesie Julie, cualsisei che al puedi risultâ l’esit dal referendum;

2) a operâ in maniere concrete par definî i criteris, lis modalitâts e i timps sigûrs di definizions des tratis di intese tra il Stât e la Regjon, sedi par chel che al inten lis revisions e lis propuestis di modifiche dal statût, sedi intes tematichis di coinvolziment des Comissions Paritetichis;

3) a ativâsi pe organizazion in Regjon, prime de “celebrazion” dal referendum, di un moment public di confront politic tra la Regjon F-VG e il sisteme regjonâl dai Ents Locâi (comprendudis lis rapresentancis istituzionâls des minorancis linguistichis) cun adeguadis rapresentancis di guvier sul a vignî de autonomie, in mût di rindi evidentis e crodibilis lis potenzialitâts di une taule democratiche di confront;

4) a individuâ un model di partecipazion democratiche dai citadins dal F-VG ae cognossince e ae valutazion de trasformazion istituzionâl che tal contest de Republiche Taliane al è vuê in discussion par chel che al inten i rapuarts tra Stât, Regjons e Ents Locâi;

5) di inviâ la presinte deliberazion ae President de Regjon, al President dal Consei Regjonâl, ai Capo-grups dal Consei Regjonâl, a ducj i Comuns de Regjon.

(Il test origjinâl par talian al è stât voltât par cure de redazion)

Ladins dal Friûl pag.6 – Setembar 2016

DAI FATS E DE CULTURE

DES TIERIS LADINIS

Arno Kompatscher: il belanç daspò doi agns e mieç

Il maiorent dal Sud Tirôl sun chest cont al à incuintrât i media

Bolzan/Bozen – Di resint il president de Zonte provinciâl dal Sud Tirôl, Arno Kompatscher, ae ocasion de Franzenfest, al à incuintrât i media par un rindicont daspò doi agns e mieç che al à vude la incarghe, oltri che su lis prospetivis pai agns in a vignî che i restin par rivâ insom dal so mandât. Us proponin i pas plui impuartants tirantju fûr dal setemanâl “La Usc di Ladins”, juste apont tal servizi curât dal diretôr Iaco Rigo.

   “Ancje par mert dal sostegn public si è podût fâ front in maniere positive aes problematichis divignintti de crisi intai comparts economics” al à dite inte viertidure dal incuintri Arno Kompatscher.

Il pat di resint firmât de Provincie autonome cul Stât al va considerât un passaç di fonde par svilupâ e infuartî la nestre autonomie. Di cumò indenant lis financis statâls che nus restin a nô a cressaran inmò e chest al darà garanziis di sigurece, stabilitât e pussibilitât di imbastî une adeguade planificazion dai intervents. Di conseguence si varà dai vantaçs concrets e positîfs sedi pai citadins che pes impresis. A dimostrazion di un tant si pues dî che lis partecipazions des alicuotis fiscâls (IRAP, IRPEF, IMU a son passadis dai 100,3 milions di euros dal 2013 a 310,6 milions dal 2017. In plui si varan a disposizion altris 50 milions di euros pai investiments, in confront ai 35,6 dal 2013, e chest par mert de riforme dai contribûts specifics aes impresis. La relazion de Bancje di Italie dal mês di Jugn stât sul cont dal Sud Tirôl e à metût in evidence che chenti si à vût un recupar dai parametris economics plui marcât rispiet aes regjons dai contors, favorît ancje de azion de Universitât di Bolzan, simpri plui pont di riferiment par frontâ e cjatâ soluzions ae crisi.

    Il Prodot Interni Lort sudtirolês, valutât 100 a nivel european, al rive a 140, o sei a une posizion tra lis plui altis de interie Europe. La ocupazion e à une percentuâl dal 76 par cent (il valôr mezan european al rive a 70) e la disocupazion e je calade al 3,8 par cent (valôr european 9 par cent). Impuartant al è ancje il fat che lis impresis, industriâls e artesanâls, al 90 par cent a valutin in maniere positive lis prospetivis pal a vignî.

    In chest contest di fonde si è palesade la sielte di fâ restâ intes mans de Provincie autonome sedi i implants che lis modalitâts di produzion de energjie eletriche, massime chê divignintti dai implants idroeletrics, za dismetûts dal Enel. Par chest a so timp e je stade creade la societât Alperia, dulà che i comuns a puedin dî la lôr e partecipâ al reinvestiment dai vuadagns, par rinovâ tecnologjichementri i implants, e par tignî plui bassis lis tarifis pes fameis e pes impresis.

    Kompatscher al à ancje sotliniât che pûr in presince di indicadôrs economics positîfs, pai citadins al reste simpri il probleme de cualitât dai servizis, che e va almancul mantignude. Vadì che compit de politiche al è chel di garantî il miôr par chel che al inten la sanitât, il sostegn sociâl e la istruzion. Si cirarà – al à inmò dite – di slargjâ e miorâ chescj servizis, soredut in prospetive pes prossimis gjenerazions.

    La tierce part de conference stampe e je stade dedicade, e nol podeve sei altrimentri, al svilup de autonomie dal Sud Tirôl. Sisteme di autonomie che indi à fat un model pe interie Europe, viodude la presince in chest contest di minorancis che a àn cjatât la fate di convivi e di colaborâ pal ben de interie comunitât. Kompascher culì al à ricuardât lis 9 gnovis normis zontadis di resint al “pachet” di autonomie e lis 11 leçs statâls fatis passâ di competence ae Provincie. Cundut achel “la sfide plui grande – al à sun chest cont sotliniât - e diven vuê de proponude riforme de Costituzion, a traviers dal referendum che si presum che al puedi davuelzisi in Autun, che dut câs no po gjavâ autonomie al Sud Tirôl, viodût che sun chest cont e esist ancje la garanzie de protezion internazionâl, esercitade par dirit de Austrie”.

    Frontâts in fin ancje i problemis de mobilitât e dal svilup dai colegaments viariis, di fonde par chest teritori. I problemis dai migrants e sielte fate di Viene di slaifâ il passaç al confin dal Brener, cu la conseguence ancje di disvantaçs economics. Ma al esist ancje l’aspiet de sigurece, che al scugne sei frontât cu la massime determinazion, cemût che i tancj atentâts venti ator pe Europe a àn dât di viodi.

In sumis, par Arno Kompscher doi agns e mieç di belanç positîf, intun contest european e mondiâl dificil. Dabon nol è pôc. (edelweiß)

______________________________________________________________________________________

Colloquium Retoromanistich 2017

San Martin de Tor / St. Martin in Thurn (Bz) – Cemût che al jere bielzà stât visât, l’istitût ladin “Micurà de Rü”, parie cu Facoltât di Siencis de Formazion – Sezion Ladine – di Bressanon (sezion distacade de Libare Universitât di Bolzan/Bozen), a invidin i studiôs des lenghis e leteraturis retoromanzis a cjapâ part a VII “Colloquium Retoromanistich 2017” (il VI si è davuelt an passât in Furlanie) a San Martin de Tor in Val Badie (session dai 3 di Jugn: facoltât di Siencis de Formazion di Bressanon/Brixen).

    Cui che al fos interessât a cjapâ part cuntune proprie relazion al è preât di mandâ dentri dai 31 di Otubar 2016 cu ven un abstract (max 500 peraulis, bibliografie escludude) a cheste direzion di pueste eletroniche: colloquium@micura.it . Si pree di zontâ al abstract un curt curriculum vitae. Si acetin contribûts par ladin dolomitan, ladin furlan, ladin rumanç, talian e todesc. A son proviodudis relazion di uns 20 minûts, cun 10 minûts di discussion.

   Il “Colloquium Retoromanistich” al è viert ai argoments tradizionâi e gjenerâi de retoromanistiche, cussì come sul cont des tematichis emergjentis dal dì di vuê. In chest sens si invide a partecipâ soredut cun relazions che a tratin de didatiche dal ladin, furlan e rumanç. Inmò, ai laureâts e dotorâts che a cjaparan part cuntune proprie relazion, ur vignarà concedût un rimbors des spesis di 200 euros. (red.)

Ladins dal Friûl pag.7 - Setembar 2016

INTAI PRÂTS DE CULTURE FURLANE

Memoreant Afro Basaldella a cuarante agns de sô muart

Al è stât il maiôr pitôr furlan dal Nûfcent

    Afro Basaldella, pitôr, disegnadôr, incisôr, al è nassût a Udin ai 4 di Març dal 1912 e al è muarte a Zurì (Svuizare) ai 24 di Lui dal 1976, juste za fa cuarante agns. Cul Pordenon al po sei considerât tra i massims esponents de piture furlane. Dal sigûr il massim pitôr furlan dal passât Nûfcent, e propite par cheste reson o crodìn che tal inovâl dai cuarante agns de sô muart al merti di sei memoreât.

     No inmò finîts i studis tal liceu, al jentrà in polemiche cul mont academic, prime metint adun un grup artistic udinês insiemit cul fradi Dino, A. Modotto e C. Grassi e po esordint in maniere polemiche cui fradis Dino e Mirko e A. Filipponi, cu la insegne di Scuele furlane di avanguardie, intune mostre realizade a Udin tal 1928.

    Al studià a Vignesie, Florence e Rome, dulà che al le a logâ tal 1933. Al insegnà ae Academie di Vignesie e di Florence, al Mills college di Oakland (Californie) e al Fine arts institute di Sarasota (Floride) intai Stâts Unîts. Al à cjapât part a numerosis bienâls di Vignesie e cuadrienâls di Rome. Ae XXVII bienâl al à vût il premi pal miôr pitôr talian. Al è stât ancje premiât ae I e II bienâl di San Pauli dal Brasîl e, pe Italie, al Salon Guggenhein. Si è dedicât ancje ae ativitât di senograf realizant, tal 1957, lis senis pal balet “Ritratto di don Chisciotte” di Goffredo Petrassi.

     Lis sôs oparis si cjatin intai principâi museus de Europe e de Americhe, tal palaç dal UNESCO di Parìs e in diviers edificis di Rodi, Rome e Udin.

    Cussì, a cuarante agns de muart di Afro, la galarie “AT/arte Contemporanea” di vie Aquilee e à proponût, tal mês di Avrîl stât, une sielte di oparis divignintti de Fondazion Afro di Rome.

    Il maiôr pitôr furlan dal Nûfcent al murì intune cliniche di Zurì, dulà che al jere stât ricoverât, ai 24 di Lui dal 1976. Al veve 64 agns e al jere tal plen de sô creativitât. Il funerâl di davuelzè tal domo di Udin, plen fis di int, oltri che di sorestants, artiscj, critics, personaçs de culture di chenti e forescj, intune clime di profonde partecipazion.

    La citât, inmò spaventade des conseguencis dal taramot dal mês di Mai, e sintive di vê pierdût un altri grant personaç, soredut cul rimuars di veii dineât chel ricognossiment che di tant timp al spietave. A chest si zonte il fat che propite il taramot al veve sdrumât il cjistiel dai di Prampar di Magnan dulà che Afro, tra i agns Sessante e prins agns Setante, al passave l’Istât realizant lis sôs oparis plui significativis.

    Intes salis de mostre, su grandis telis a slusivin pineladis improvisis e fuartis, notis altis e cjaldis di ros e di neris, verts e celescj, blancs che a inceavin, zâi di soreli, e grîs perlâts, che a puartavin intes struturis antighis visions magjichis.

    La rassegne de galarie AT e à ofrît une sintesi de interie produzion dal artist. L’ultin timp figuratîf, dal 1944 al 1946, al jere rapresentât di trê disens a matite su cjarte, rindûts come scriture, ricercjade, lizere: si titulavin “Femine ae machine di cusî”, “Figure maschîl sentade”, “Femine cu lis cjartis”, dulà che za in chê volte si vualmave la dissoluzion de forme.

   Ae parentesi cubiste, ma di un cubisim personâl e fantastic inspirât a Klee, al apartignive, il “Cence titul” dal 1948, un gherdei convuls di cerclis, cuadrangui, retangui une vore colorats, leâts da segments e da dintiduris di coral. Une evasion tal sium, ae scuvierte di une inocence cree.

   Slargjade la secuence inspirade ae astrazion liriche. La “Place San Jacum”, dal 1952, si proponeve al visitadôr come un svilup sinfonic di olmis figurativis e di segns simbolics. Une tecniche miste su cjarte dal an daspò e slargjave impen elegantis pineladis di grîs e blâf ator a un soreli dorât.

   Delicadis trasparencis si podevin viodi intun “Cence titul” dal 1955, cun olmis rossis intun smavît font celest e zalìt. Par contrast, penzis di fuarce a jerin lis oparis “El diablo”, dal 1960, dulà che une grande magle flamant slargjade a scuasit dut il spazi dal cuadri e semee un mantiel scjassât dal vint che si trasmude intune sorte di sgagnide, e il “Cence titul” dal 1966, dulà che la olme sanganose si dispiert in sangloçadis e revocs che si van cidinant.

   Tra lis altris perlis di une piture rafinade, coinvolzint, traviersade di sgrisui di maluserie, di slancs afanôs e di profondis pausis, che e clupìs daûr de aparint semplicitât une fuarte emotivitât, al merte di jessi segnalât il “Cence titul” dal 1963, dulà che il lirisim si infuartìs cu la definitive rinuncie a ogni vanzum di simbolisim figuratîf e la realtât imagjinarie si identifiche cussì cu la opare vive che e devente realtât stesse dal sintiment.

  La rassegne e jere in fin sierade di numerôs lavôrs neu-costrutiviscj che a recuperavin, su dai fondâi vuaiâts come vilût, formis sieradis, cjapadin adun in zonis cromatichis di compate staticitât classiche o ben in pûrs intais ogjetivâts in maniere nete, metûts a pareli a tassei su plans soreponûts.

    A partignivin a cheste sezion “Scarpanto” a intais ros e neris, “Lunari” tignût sù da variazions di neri, di bruns e di grîs, e lis vot piçulis, preseosis, aghisfuartis-aghisintinzudis dal “Omaç a Boudelaire”, dal 1974.

    In sumis, un grant artist che al à dade innomine al Friûl in dut il marimont, pecjât che i furlans no i vebin dât i ricognossiments che al meretave, e di chest al restà simpri cetant malapaiât, ma si sa che dibot nissun nol profete in patrie. Un grant graziis i va partant ae Galarie AT/arte Contemporanea pe biele mostre che à proponût su Afro Basaldella. E je stade pardabon une ocasion straordenarie par podê gjoldi alc di unic, di une art superiôr, contaminade di une identitât furlane che no je podude scjampâ ae atenzion dai visitadôrs plui atents e predisponût a vualmâ i aspiets plui scuindûts.

(von zercläre)

Ladins dal Friûl pag.8 – Setembar 2016

SCRITÔRS E LIBRIS IN MARILENGHE

Duili Cuargnâl: “Il Friûl che Anzit”

Un libri che al conte lis strussiis dal Friûl di vuê

    Tal Autun dal 2014, par cure de associazion “Glesie Furlane”, al è stât publicât il libri “Il Friûl che anzit: l’Agâr (2002-2006)” (pp.467) di Duili Cuargnâl, che al cjape dentri juste i scrits che pre Duili di agns in ca al publiche, cun cadence setemanâl, su la Vite Catoliche.

Duili Cuargnâl (Duilio Corgnali) al è nassût a Manzignel di Manzan tal 1946. Predi, gjornalist, opinionist, operadôr culturâl. Daspò la ordenazion, sucedude tal 1971, e un piçul moment di ministeri a Palme, si è trasferît a Rome e si è indotorât in teologjie dogmatiche inte Pontificie Universitât di Sant Tomâs d’Aquino (Angelicum).

    Tornât in Friûl par vie dal taramot dal 1976, dal 1976 al 1999 al è stât diretôr dal setemanâl de diocesi di Udin “La Vite Catoliche”. Al è stât president dal Comitât internazionâl “Meeting dai setemanâi catolics di Alpe Adria e Arge-Alp”. Dal 1988 al 1993 al è stât president de Federazion taliane dai setemanâi catolics (Fics). Al à vinçût il Premi “Friûl 1986” pal gjornalisim.

   Dal 1996 al 2002 al è stât nomenât Vicjari episcopâl pe culture de Arcidiocesi di Udin. Al è stât president dal Istitût “Pio Paschini pe storie de Glesie in Friûl”. Tal 2008/2009 al è stât president dal Comitât nazionâl pal XVI Centenari de muart di Sant Cromazi, vescul di Aquilee. Inmò, al à presiedût la Comission diocesane pe traduzion par furlan de Bibie, dal Lezionari e dal Messâl Roman.

Dal 2002 al è plevan arcipredi e Vicjari forani di Tarcint, jessint plevan di Sedilis dal 1981. Al è autôr di diviers studis e scrits, sientifics e gjornalistics.

    Cheste la lungje schede di presentazion di Duili Cuargnâl, un predi, a sô mût, di bataie, che a traviers i agns di direzion de Vite Catoliche al à marcât un mût gnûf di fâ gjornalisim in Friûl, disberdeât dai leams dai podês plui o mancul fuarts che di simpri a stant condizionant la vite sociâl, politiche e culturâl de nestre tiere. I siei scuintris cun cierte sorestanzie a son memorabii. Il so mût di impostâ i problemis par cirî di daur une soluzion, ancje tant valits e fûr dai condizionaments. O podìn cussì dî che al po sei considerât un protagonist di prin plan de rinassince culturâl dal Friûl intai agns vivarôs dal daspò taramot.

    Al va purpûr dite che al à vude la fortune di cjatâ la colaborazion, e la amicizie, di personaçs come Riedo Puppo, pre Antoni Beline, Agnul Pitane, Zuan Nazzi Matalon, pre Rizieri De Tina, pre Vigji Gloaç, ducj scritôrs furlans di gale clamâts a colaborâ cu la Vite Catoliche. Il gjornâl al jere deventât par chest un vêr pont di riferiment pe int dal Friûl, al di là dal impegn politic e culturâl. Cheste e je une trate de storie resinte dal Friûl che no po sei dismenteade. E lu disìn cun reson vuê che la comunicazion dai media di chenti e je discjadude in maniere dolorose. Aromai si publichin dome velinis, ma soredut si sta atents a no urtâ cui che al parone a Triest par vie de pôre di pierdi la grampe dai contribûts. Un fat che al sta fuscant i çurviei e fasint smavî la sgrimie che e covente a ogni bon gjornalist, degn di chest non. A son timps dificii e nus mancjin tant Riedo Pup e pre Antoni Beline.

    Ma tornìn al libri publicât di pre Duili, che a traviers i siei scrits nus pant che cul furlan si pues resonâ di dut. E se vuê la plui part dai gjenitôrs furlans a domandin la lenghe furlane a scuele pai lôr fruts, al è ancje mert so, che di agnorum al à fatis sôs lis peraulis di Pasolini: “E vignarà ben la dì che i furlans si inacuarzaran di vê une muse e une culture e une lenghe...”. Cui che al cjape par man juste apont il so libri “Il Friûl che anzit. L’Agâr (2002-2006)”, racuelte dai scrits par furlan par cure di Glesie Furlane, publicâts su la ultime pagjine de Vite catoliche, tal puest che al è stât di Riedo Pup, si rindarà par chest cont dal impegn di pre Cuargnâl a pro dal furlan e dal popul furlan.

    O vin dite che Cuargnâl al è lât a cjapâ su la vite Catoliche il puest lassât vueit di Riedo Pup, ma lui al à subite sclarît che no si insumiave nancje di metisi in concorince cun Riedo, pûr vint lavorât cun lui une vite. Al podeve, e cussì al à in fat, tentâ di fa capî ogni setemane che cul furlan si pues resonâ di dut, che no je vere che la lenghe furlane e je dome par lâ inte stale, inte ostarie o par stâ a cjase, tal fogolâr. Si pues doprâle par cualsisei argoment e setôr de vite. La sô, in fats, e je une testemoneance che chest si lu pues fâ. Dal rest la leterature furlane no pues sei considerade dabon minôr.

    In sumis informazion par furlan sclete, par cirî di meti in lûs i grops de “cuestion furlane”. Ce fasie une vuarzine che e fâs l’agâr? E romp i grops de tiere. Cussì Cuargnâl al cîr di sapâ, di arâ e grapâ propit parcè che la int e vedi cussience di ce che al sta sucedint, par che no sedi cjapade dai spiei di robis che no àn valôr, un significât, che no centrin cu la veretât di fonde de vite.

______________________________________________________________________________________________________________________________________________________________

La schede: D. Cuargnâl, “Il Friûl che anzit. L’Agâr (2002-2006), Ed. Glesie Furlane, Pasian di Prât 2014, pp.467 .

“Ladins dal Friûl” Diretôr responsabil : Renzo Balzan - Reg. Tribunâl di Tumieç n. 123 dai 09.03.98

Redazion : 33028 Tierç di Tumieç - V. Dandolo16 / tel. 0433/43696 / e-mail : ladinsdalfriul@gmail.com

F.I.P. (fotocopiât in propi) a Tierç di Tumieç (Ud) V. Dandolo 12 pes Edizions “Union Scritôrs Furlans”.

La publicazion e ven spedide es Bibliotechis dal Friûl, es Istituzions Culturâls Ladinis des provinciis di Bolsan, Trent e Belun, e a ducj chei che a mandin la lôr libare contribuzion doprant il C.C. bancjari nr.19162 dal “Banco di Brescia” (Filiâl di Tumieç) - codiç IBAN: IT50H 03500 64320 0000000 19162

Chest gjornâl inte sô version online si lu cjate tal sît : http://ladinsdalfriul.blogspot.it

Publicât cul sostegn de Provincie di Udin – L.R.24/2006 art.26