Anade ( XVIII ) n.11 Novembar 2015

Periodic-mensîl di informazion e culture sul cont de minorance celtiche

dai Ladins de Furlanie. Edizion par cure de associazion “Union Scritôrs Furlans”

Rome e insit tal volê butâ jù il Friûl

Intant la Catalugne nus mostre la strade de indipendence

     Rome e insist tal so selerât progjet di volê butâ jù il Friûl. Martars 13 di Otubar la riforme dal “gnûf” Senât e je stade fate buine de bande di Palaç Madame. Il vôt finâl al à dât il vie cussì ai articui de riforme che introdusin il cussì clamât gnûf federalisim. Ma il colp di sene, par nô, al è jere za rivât denant trat dal acolziment de bande dal guvier di un ordin dal dì di Raffaele Ranucci (Pd) che al impegne l’esecutîf a presentâ in curt une riforme che e tai il numar des Regjons. Si trate, in conclusion, de presentazion di un emendament dal esecutîf su la contrastade norme transitorie che e certifiche, di fat, une intese interne dal Partît Democratic sun chest argoment. Une micje che e à inviât un vivarôs dibatiment in Friûl, dopo lis cjapadis di posizion dal ex sindic di Udin Sergjo Cecotti e dai autonomiscj e il dibatit su la progjetade creazion de macro-regjon dal “Trivenit”. Ducj sot Vignesie vadì! Une soluzion che e mandarès la nestre Regjon, ma soredut il Friûl Storic tal limbo. Une porcarie recuperade dai timps dal fassio: robatis di sgrisulâsi!

   Ma no je finide culì cu la “porcade” dal gnûf Senat! Sintît ancje cheste! Intun comunicât Igor Gabrovec, conseîr regjonâl de Union Slovene nus vise che: “Za la precedent proiezion che e dave trê senatôrs inte gnove “Cjamare alte” dal Parlament di Rome a risultavin in maniere palês insuficients a garantî lis specificitâts linguistichis (furlans, todescs e slovens) dal Friûl-V.J. Ridusintju a doi, come che o stin leint tal test burît fûr in rivuart, al devente un dituart che nol po sei acetât par vie dal stes principi di autonomie e dignitât di une Regjon speciâl che e à dirits costituzionâi e comunitaris (europeans) ricognossûts aes minorancis linguistichis e nazionâls”.

     Sun chest cont fasìn cualchi paragon une vore significatîf. Nus ven assegnat il stes numar di senatôrs dal Molise, che al à un tierç de nestre popolazion, e de Basilicate, che indi à mancul de mitât. Ma intant graziis al ricognossiment de sô particolaritât ento-linguistiche la Val d’Aoste e varà doi senatôrs cuntune popolazion che si ferme a 126 mil abitants, dibot tant che la citât di Udin, cun zontât Tavagnà e Reane. Mentri po il Trentin-Sud Tirôl cul so milion di abitants, aduncje mancul dai nestris, si puarte a cjase cuatri senatôrs, doi par ogni sengule Provincie autonome. Ancje in chest câs graziis al ricognossiment dal status di autonomie (e tratament) speciâl pe presince di minorancis linguistichis-nazionâl ricognossudis e tuteladis. Ma la president de Regjon Debora Serracchiani, oltri che vice-president dal Partît Democratic a livel nazionâl, dulà de ostie jerie lade a finîle intant che si stavis cumbinant chestis incualificabilis baronadis! O sin aromai convints che Renzi la stedi calcolant simpri di mancul... si ben che si sedi sfuarçade di fâlu rivâ fint a Buri!

     A chest pont al è plui di cualchidun che al scomence a pensâ che lâ dilunc a fevelâ di autonomie pal Friûl al è deventât dal dut limitatîf, se no fintremai academic. Che al è rivât il moment di provâ a alçâ il tîr: bisugnarès scomençâ a resonâ sul concet di indipendence pe nestre tiere. Darest l’esempli sun cheste pussibile sielte nus rive drete de Catalugne, e dai risultât des resintis votazions che si son davueltis in chê Regjon-Nazion cumò leade inmò ae Spagne.

    “O vin vinçût cun scuasit ducj cuintri e chest nus da une fuarce grandone e une grande legjitimitât par puartâ indenant il nestri progjet”, si è esprimût in chescj tiermins il president jessint catalan Artur Mas, denant di miârs di sostenidôrs a Barcelone. Intes votazions di domenie 27 di Setembar stât, juste apont, lis dôs listis indipendentistis, “Junts Pel Si” di Mas (62 segjos) e chê di Cup (10), a àn cuistât insiemit une maiorance assolude di 72 segjos sui 135 tal gnûf Parlament Catalan.

   Mas, che al à trasformât lis votazions regjonâls anticipadis intune sorte di referendum su la indipendence, intun mûr cuintri mûr cun Madrid, al intint cumò inviâ la “disconession” de Catalugne de Spagne, cul obietîf di rivâ ae indipendence plene – cun dut che si è in presince di une dure oposizion de bande dal guvier centrâl – dentri il 2017. I 5,5 milions di eletôrs catalans si son mobilitâts al massim, coinvolts de persuasion de impuartance storiche di chestis ultimis votazions, lis plui impuartantis pe Spagne de fin dal franchisim in ca secont la stampe di Madrid e di Barcelone. La afluence ai segjos e je rivade al 77%, une cifare mai tocjade prime!

      Furlans sveaitsi, ancje par nô la strade par diliberâsi di sotanance umiliant di Rome, di Vignesie e di Triest no po jessi che cheste. Di bessôi! Di bessôi! Di bessôi! (tarvos)

Ladins dal Friûl pag.2 – Novembar 2015

DAL TIMÂF A LA LIVENCE

Storiis e cuintristoriis tal Friûl dal dì di vuê

Il Friûl des aziendis che a funzionin

   A livel di tindince, o sei fasint il confront tra il mês di Avost 2015 e il stes mês dal 2014, la calade de casse integrazion in Friûl e je stade significant. La variazion, in fats e je stade dal -28,95 par cent. A livel congjunturâl, invezit, la comparazion tra Avost 2015 e il mês denant, al viôt une incressite dal ûs dai sostegns sociâi dal 11,9 par cent, cuntune incressite impuartante de casse integrazion straordenarie, e un câl significant di chê ordenarie (-63 par cent).

    Al è in indiç parziâl, chel de casse integrazion, sul cont dal stât di salût de economie, ma bastant a dî che se di riprese si fevele, dal stât di salût de economie, cheste riprese e sta coinvolzint in maniere inmò margjinâl la nestre regjon dulà che al reste evident un stât di soference di plusôrs impresis apartignints a diviers setôrs.

   E nol è dite che jessint positîf il confront di tindince, chest al basti a sostignî che vuê lis cjossis a van miôr rispiet a za fa un an. Parcè che intant cetantis aziendis a àn ridusût i organics, mentri altris a àn esauride la pussibilitât di podê utilizâ i sostegns sociâi che, cu la legjislazion di prime e rivave a cinc agns, mentri vuê si ferme a un.

   Ma vignìn ai dâts: tal mês di Avost 2015 chenti a son stadis autorizadis 1 milion 653 mil oris di casse integrazion, cuntun câl rispiet al stes mês dal 2014 dal -19,36 par cent. Lassant de bande la casse in deroghe, il câl al à interessat sedi la casse integrazion ordenarie (-53,73 par cent), che chê straordenarie (-18,76 par cent).

   Dal scomençâ dal an al mês di Avost comprendût, l’ûs de casse integrazion al è calât dal -28,95 par cent rispiet al stes periodi Zenâr-Avost 2014, cun circje 4,5 milions di oris in mancul.

   Introduzion, cheste che o vin fate, necessarie par podê sclarîsi miei lis ideis sul stât di salût de nestre economie, parcè dispès e jentre in bal la propagande e i numars ognidun po ju tire de sô bande cemût che plui i tornecont.

    Cundut achel o podìn dî che alc di positîf finalmentri al scomence a movisi, e chescj segnâi nus rivin soredut des nestris aziendis plui di ecelence. Cjapìn par esempli la Eurotech di Damâr, che e à puartat une piçule aziende logade intune zone periferiche de Cjargne, a deventâ un grup globâl cun sedis in trê continents.

   Nassude intant de crisi sul scomençâ dai agns ’90, in fats, Eurotech e sielzè un strade dal dut gnove, impegnantsi tal svilup e produzion di computers in miniature (embedded) a altis prestazions. Fint di subite, in prionte, i fondadôrs de aziende di Damâr a capirin che par cressi no si podeve restâ leâts nome al marcjât talian e a scomençarin cussì a internazionalizâsi in France, in Gran Bretagne, Usa, Japon, fasint deventâ il grup un fra i principâi atôrs dal marcjât. Vuê Eurotech, che e continue a mantignî il çurviel in Cjargne, e che dal 2005 e je cuotade in borse, o ofrìs une rieste di prodots che a van dai computers embedded par aplicazions speciâls, fint ae plateformis software par Internet of Things.

   Ispiradôr e co-fondadôr di Eurotech al è Roberto Siagri, imprenditôr bon di cjalâ in muse la realtât e di pensâ al a vignî cence pôris di sorte. Cheste e je cence altri la plui interessante realtât imprenditoriâl de mont furlane, ancje parcè che e mostre che capacitât, inzegn e sgrimie a rivin a bati ogni ostacul, ogni tananai che la politiche e la burocrazie e cirin simpri di metiti cuintri.

   Restant simpri in Cjargne, di Damâr a Tumieç une altre realtât produtive verementri interessante e je chê de Automotovive Lighting di Tumieç, che e prodûs fanalarie par machinis e e je cumò la plui impuartante realtât ocupazionâl dal teritori cui siei scuasit 800 adets. Po ben, propite la Automotive Lighting ae fin dal mês di Setembar stât e à anunziât la cjolte sù a vore, cun contrat definitîf, di cincuante adets. Une biele gnove dabon pe Cjargne daspò lis brutis gnovis dal “câs” CoopCa. A vuê a son inmò circje 180 i adets in Automotive che a lavorin cun contrats a tiermin, ma se lis cjossis a continuin a lâ indenant ben al è di sperâ che ancje par une buine part di chescj e puedi rivâ in curt la stabilizazion definitive. Dut câs l’impuartant al è che si trate soredut di zovins.

   Lis cjossis a van ben ancje ae Danieli di Buri, che e continue a pontâ su la inovazion. Ultime novitât in rivuart al è l’acuardi di cheste aziende cun Alcoa pal alumini super-lizêr. Une leghe di alumini che e je il 40 par cent plui facil di lavorâ e il 30 par cent plui fuarte dal alumini che vuê al ven doprât inte industrie. Cheste tecnologjie di procès, clamade “Micromill”, e je stade juste apont l’ogjet di un acuardi in esclusive mondiâl tra Alcoa, vuê leader globâl inte tecnologjie, inzegnerie e fabricazion di metai lizêrs, e la nestre Danieli, leader inte furnidure di implants destinâts ae industrie pe metalurgjie.

   Lis dôs societâts a àn sotscrit un acuardi pe vendite des furniduris Micromill e pe concession in licence de relative tecnologjie brevetade. Su la fonde di cheste intese, Alcoa e concêt a Danieli la esclusive pe vendite di ecuipagjaments Micromill, e insiemit a lavoraran par concedi in licence la tecnologjie di procès avanzade pe produzion di leghe di alumini a clients di dut il mont.

   Pe Spa di Buri l’acuardi al à il valôr di un altri fondamentâl pas indenant pe incressite de societât, che si conferme aziende di avanguardie inte industrie dai implants pe metalurgjie, cuntune atenzion particolâr ai procès di efiet pai metai “diviers”.

   Pes aziendis che vuê a funzionin in Friûl al merte segnalât ancje il Grup Pittini di Osôf. La aziende metalurgjiche furlane in fats e je daûr a cuistâ il stabiliment Galtarossa di Verone che al fâs part dal Grup Riva. Si trate di une açaiarie che e sta dant lavôr a 418 dipendents. Il stabiliment veronês al larà cussì a infuartî inmò di plui il Grup Pittini che za vuê, tra Friûl, Venit, Austrie e Slovenie al prodûs 2 milions di toneladis di açâr ad an e al da lavôr, intes sôs sîs aziendis, a circje mil e 200 personis, des cuâl circje 800 in fuarce tal grant stabiliment di Osôf.

   In conclusion un Friûl che “al funzione” al esist inmò. Un Friûl salt e concret, al di fûr di ogni retoriche e degn de sô tradizion e chest nus puarte ae sperance che la lungje crisi che sin inmò daûr a traviersâ e puedi jessi ae fin superade. (renzo balzan)

Ladins dal Friûl pag.3 - Novembar 2015

CRONICHIS DI CHENTI

Cjargne: aghe svendude par un blanc e un neri

“Carniacque” e passarà sot il Cafc “Consorzi Acuedot Friûl Centrâl”

Tumieç – Tal numar di Otubar stât o vevin fevelât che in Cjargne “al stave tampiestant cence remission”: tribunâl, casermis, puestis, crisi Coopca, une rieste di bastonadis di cjoli il flât. Ma no je finide, magari cussì no, parcè che cumò e je rivade la volte de aghe, ricjece primarie di chest teritori, che e je daûr a jessi cedude, par un blanc e un neri, da Carniacque al gjestôr unic provinciâl Cafs “Consorzi Acuedot Friûl Centrâl”. Si trate, vadì, di un altri colp pesant pe montagne.

   Al di là des impromission intant de campagne eletorâl pes votazions regjonâls la zonte Serracchiani si è rindude di front ae cession al Cafc dal servizi idric integrât de zone de Cjargne. E no po jessi acetade dal vice segretari dal maiôr partît di guvier la scuse che un tant si scugnive fâlu par leç, parcè cui che al ten in man lis brenis dal podê come la president e à il dovê di esercitâ dutis lis pressions dal câs par cambiâ normis e leçs che a van cuintri i interès de int. Viodût soredut la atenzion speciâl che e merte la montagne, cjapade come che e je intune situazion di crisi.

    Naturalmentri la prime a jessi clamade in cause e je la “siore”, ancje parcè che si è tignude la deleghe di zonte pai problemis de mont. Une aree cheste za feride dal scandul CoopCa e penalizade di une riforme sanitarie che e met adun il Medi Friûl a Tumieç e Glemone, creant un pesant disvantaç pai abitants des zonis altis, che a riscjin di scugnî frontâ distancis e timps fûr dai limits par podê utilizâ al miei i servizis ospedalîrs e sanitaris. In presince a situazions di cheste sorte si cjatisi obleâts a meti in evidence che inte nestre Regjon i citadins che a loghin intes zonis di mont no stan gjoldint dai stes dirits di chei altri, co vuê plui che mai e semein bandonâts, e bastonâts, da un podê regjonâl dal cuâl no son a fat rapresentâts.

    Sun chest cont o publichin une letare di Franceschin Barazzutti al sindic di Tumieç, Brollo, capo-file in Cjargne dai sindics yes man intai rivuarts de president Serracchiani. (mateu di prun)

    Al à la code di paie il sindic di Tumieç, Brollo, dal moment che, prime mi indrece un invît – di me acetât – a incuintrâlu tal so ufici par un scambi di opinions sul servizi idric, ma po al burìs fûr un atac su la stampe, cun dut che i ves metût a disposizion une bondante documentazion sevi su lis direzions di centralizazion e speculativis su tâl servizi, negativis pe nestre montagne, sevi sui modei gjestionâi metûts in vore in maniere positive in altris regjons a statût speciâl.

   Forsit, il sindic Brollo, sul drandran cumò di mode par cui che al à une funzion istituzionâl di “comant” al vûl sintîsi a dâ reson dal so interlocutôr, pene jessi definît un “civuiton”, nol à preseât che inte mê conversazion, cordiâl, e intes declarazions ae stampe jo o vebi esponût chês che a son lis mês convintis posizions che, sun chest cont, no coincidin cu lis sôs, su lis cuâl lui al met in presse il timbri vuê in voghe di “populistis”, ancje se realizadis in maniere positive tal Trentin a statût di autonomie speciâl come la nestre Regjon. Populiste ancje la Zonte dal Trentin inalore?

   Posizions lis mês, za palesadis in passât e inmò di plui tal presint, che o soi de opinion che e sedi sbaliade la centralizazion de gjestion dal servizi idric intai teritoris di mont. Posizions confermadis dal faliment de esperience di “Carniacque”. A chest pont al è dabon grâf che da cheste esperience negative no si vueli imparâ nuie, anzit si vadi a centralizâ inmò di plui il servizi fintremai tal furlan Cafc, apaiâts di cualchi contentin in a vignî, mentri la Cjargne e piert, in zonte des aghis, ancje tribunâl, i servizis de pueste, Coopca, e vie dilunc cuntune Cjaurêt di sgrisulâ, ancje la aghe dal rubinet! Cheste e je la code di paie dal sindic Brollo. Ma lui al è apaiât! Biel che a paiâ e je la int.

    Il sindic Brollo, invezit di scuindisi di frecuent daûr al “lu vûl la leç”, ricuardant che lis leçs no lis sculpìs Mosè su la mont dal Sinai ma i oms in maniere conforme a determinâts interès che no tegnin in nissun cont de montagne, al fasarès ben, viodude la sô vicinance ae presidente e assessore ai problemis de mont Serracchiani, a domandâ insiemit a chei altris sindics de Cjargne une legjislazion plui adate, e concrete, aes dibisugnis de montagne.

   Nol è Barazzutti – che nol à tant podê – a “meti in cjative lûs i sindics” ma la continue discjadude de Cjargne e, tal câs di Tumieç”, il fat che no si viôt nissun lusôr almancul che si vebi di contentâsi cun cualchi baronade trionfalistiche sicu il lumin impiât in chel che al jere il tribunâl, costât di resint une barcje di bêçs par fâlu ristruturâ e adeguâ aes normis di leç.

     Si domande Brollo, in relazion aes mês posizions di lui definidis populistis, a ce che mi sedi zovade “La esperience e l’impuartant passât di aministradôr public”. I rispuint che mi è servide a olsâ par jessi dal ordenari, a tignî la schene drete ancje di front a cui che al stave plui in alt di me. Par chest o soi stât rispietât e no doprât. E chest, in maniere divierse des masse schenis che si plein come vencjârs denant dai “maiorents” fint a deventâ i “gastalts sudizionôs” sul nestri teritori des lôr volontâts, invezit di fâ valê in alt la volontât di cui che al sta in bas.

    Al sindic Brollo, cun dute la sclagne partence de sô aministrazion, i auguri di rivâ a fâ almancul un pôc di chel che al fasè za fa tancj agns il sindic di chê volte di Cjavaç Barazzutti. (Franceschin Barazzutti dal Coordinament dai Comitâts di difese teritoriâl de Mont Furlane”)

Ladins dal Friûl pag.4 – Novembar 2015

DOCUMENTS

Il destin indât di un Friûl che al devente Triveneto!

Sergjo Cecotti nus met in vuaite sul burlaç che al è daûr a plombânus

Ancje se la politiche di vuê e predicje il contrari, jo o resti fedêl aes vieris ideis. Prin: e je la istituzion politiche a jessi al servizi de sô comunitât e no il contrari. Secont: une istituzion di autoguvier e à sens dome se i citadins si ricognossin in jê e la vivin come comunitât di destin. Aduncje, a chei che mi domandin ce che o pensi di Triest Citât metropolitane o rispuint che dome i triestins a àn dirit di dî sì o no. Chest dirit par altri al compuarte il dovê di fâsi caric des conseguencis sun chei altris des propiis sieltis. E va dade, vadì, une soluzion al probleme dai slovens, tant che comunitât linguistiche teritoriâl che e à dirit a une dimension istituzionâl di autoguvier.

    Plui in gjenerâl la Citât metropolitane di Triest e mudarès ecuilibris e nature dal Friûl Vignesie Julie, ecuilibris che a laressin ricostruîts su la fonde di un clâr “Pat storic” tra lis components de Regjon. Si disarà che chestis a son cjossis scontadis. E je vere.

   Lassin ce che al è evident, e din une voglade a ce che si môf intai palaçs dal podê vêr. Achì lis cjossis, magari cussì no, si imberdein: mentri jo o soi favorevul a Triest Citât metropolitane, a pat che i triestins la vuelin e la Regjon e vegni tornade a ecuilibrâ, jo o soi contrari in maniere mastine al pensîr-scaltri che al partìs da une part dal Partît Democratic e si sta svilupant daûr e d’ascôs dal dibatiment su la Citât metropolitane. Cetancj dem a àn capît che Renzi al è determinât a “semplificâ” lis Regjons par incentrâ ogni podê e ogni risorse intes sôs mans. Lis Regjons a van ridusudis in numar, competencis e dotazion finanziarie. I maiorents dal Pd a san benon che a oponisi ai disens di Renzi nol è ni facil e ni igjenic par cui che al vebi ambizions politichis. Cussì si son rassegnâts al inevitabil: la anession dal Friûl Vignesie Julie al grant “Triveneto”. L’onorevul Rosato al fevele dal “Triveneto” come pussibil regjon speciâl. Che al sedi lât fûr dal vade ae improvise? Dal sigûr no, Ettore Rosato al è un dai çurviei plui lucits e profonts de politiche. La sô linie e je sì subordenade, se si vûl une vore subordenade, ma e je ispirade a un rigorôs realisim. Karl Popper al scrîf che la razionalitât, in politiche, e consist tal seondâ l’inevitabil. Rosato al è al è un razionalist poperian, e si è metût ae opare par favorî la inevitabil anession de nestre Regjon al Venit.

   In ce cjosse consistie la “razionalitât”?

  Il jessi il promotôr de anession i permet di gjestî i detais e aduncje di limitâ i dams. Cuâi dams? Almancul doi. Il prin al è il discredit che cu la propueste di anession al Venit al larà a finîle sul Pd. Par preparâ il colp, il nestri al bat sul claut de bufule che il grant Venit al sarès une regjon speciâl, anzit di plui, al gjoldarès de stesse autonomie che a àn cumò lis Provinciis di Trent e Bolzan/Bozen. Chel altri al è il dam grandon pe sô citât, Triest, che di capitâl di une “ricje” Regjon a statût speciâl si viodarès ridusude a une des tantis mediis citâts di une Regjon ordenarie. Podaressie une tâl medie citât mantignî un teatri stabil “regjonâl” o un ent liric? Cattinara no riscjaressial di jessi declassât a ospedâl di ret? Cetante part dal Pil citadin laressial in fum?

   No son domandis di pôc cont. E in fats a son mês che a Triest, intai salots che a tirin adun la sorestanzie economiche, politiche e culturâl, si sta incagnint il dibatit. Un pôcs a pensin ae Citât metropolitane come istrument par podê conservâ, dentri dal grant Venit, un cualchi margjin di autonomie istituzionâl e influence politiche. Altris a son puartâts a volê bati stradis plui sofisticadis. L’onorevul Rosato al è l’om di ponte di cheste seconde scuele di pinsîr. A diference di altris, Rosato nol è gran ingjenui, e al sa ben che la Citât metropolitane disegnade dal centralist Delrio e je une scjatule plene dome di nuie. Rosato al à tal cjâf une soluzion cetant plui brilant, che al ten inmò segrete. Pecjât al sarès interessant cognossile tal detai, viodude la autorevolece dal politic.

   La conclusion? Lassìnle al grant Popper che nus met in vuaite sul fat che, si ben che in teorie al sedi vêr che la razionalitât e consist dal favorî l’inevitabil, inte realtât storiche chest criteri dispès al falìs. Par une reson semplice: scuasit simpri nô o scometin sul inevitabil sbaliât. La realtât dal svilup storic e cjape simpri stradis diviersis di chês che a nô a semein inevitabilis. Un gragnel di savalon al va a finîle tra lis ruedis e al mande a marc e madone l’inevitabil sul cuâl al veve scometût il Podê. O crôt che i citadins di cheste Regjon a savaran jessi il gragnel che al ferme la inevitabil anession al grant Venit. (Sergjo Cecotti – za sindic di Udin e president de Regjon Friûl-Vignesie Julie – test tirât fûr dal “Messaggero Veneto” dai 25 di Setembar e voltât par cure de redazion)

Friûl : un popul, une tiere, une lenghe!

Ladins dal Friûl pag.5 – Novembar 2015 

JOSEF MARCHET: I GRANCJ OMS DAL FRIÛL

Pieri Capretto (Pieri Zocul): umanist e inteletuâl rafinât

Al è stât un valent scritôr e un racueidôr di libris antîcs

     Ben pôc si po regjistrâ ator ae vite di chest nestri valent umanist, di volte in volte, ae maniere toscane Capretto o trevisane Cavreto o par latin Haedus o inmò par furlan Zocul. Di divignince di Pordenon dulà che in fats al nassè tal 1427, e dulà che simpri alì al murì tal 1504: inte citât dal Noncel al à passâ i prins agns de sô vite e juste apont i ultins. Il grât e il gjenar de sô formazion umanistiche classiche, di alt livel inteletuâl, a fasin pensâ che al vebi davuelt studis in cualchi bon centri culturâl de Italie Disore, par vie che nol semee, gran, che lis scuelis locâls a vessin, inte prime mitât dal Cuatricent, cuistât une direzion didatiche corispuindint ae cualitât e ae largjace de sô dutrine.

    Tal 1425 al jere za predi, mandât a rezi la capelanie di S. Tomâs e dai Trê Rês dal domo di Glemone. Al scugnì, par altri, fâ ancje di vicjari dal plevan Nicolau Spatarini, che, come arcidiacun di Aquilee, al veve il dovê logâ venti jù. L’ufici dal vicjariât, o sei la efetive cure spirituâl di gruesse plêf, e impegnà dal sigûr dute la sô ativitât. Al risulte, par altri che, sul esempli di Guarneri di Dartigne, si dedicàs ancje lui, intai moments libars, a trascrivi codiçs. Tal 1475 al vignì nomenât ancje vicjari di Pordenon, ma al continuà a logâ a Glemone dulà che tal 1486 i vignì concedude la citadinance di chê Comunitât. Dome viers il 1490 al tornà a Pordenon: e al è in cheste ultime dade di timp de sô vite che al podè realizâ lis sôs oparis plui impuartantis e impegnativis.

   Pieri Capretto al riprodûs, in cualchi misure, il model dal umanist enciclopedic, che inalgò al vignive incjarnât da Pico della Mirandola, da Leon Battista Alberti e di altris. Erudît di studis classics, scritôr di tratâts morâi e politics par latin e di viers in volgâr, tradutôr, comentatôr des Scrituris, compositôr di musiche sacre, maestri di pedagogjie, racueidôr di libris, al savè cuistâsi no dome une slargjade innomine come leterât, ma ancje la benvolence e la stime di om savint e concret. Juste par chestis resons al mertarès di no jessi lassât fûr de storie gjenerâl de leterature dal Cuatricent, tant che rapresentant de corint umanistiche-cristiane.

    In ordin di timp, il prin lavôr dal Capretto che si à notizie e che, dut câs, al supon une cierte innomine bielzà cuistade dal autôr, e je la version (par venit trevisan cun prestits dal toscan) des “Costituzions” marquandianis, o sei dal codiç di leçs buridis fûr dal patriarcje Marquart di Randeck tal 1366, che, cun lizeris mendis, a rezerin la aministrazion de justizie inte Patrie fint ae colade di Vignesie. Lavôr realizât su richieste dal stampadôr Gheraert van der Leye (Gjerart di Flandrie). Cheste version e rapresente la prime opare tipografiche che e je comparide a Udin (1484).

     Pôc daûr (1486) al jessè, par volgâr (furlan) l’Ufizi de Madone in forme poetiche: “Lo ofytio de la Madona per volgare composto per misser pre’ Piero del Zochol”. I salms a son voltâts in tierce rime, altris parts in metris diviers. La version par altri e je une vore libare. Al è un lavôr, al pâr di capî, fat in presse e une vore fadiôs, cun diviersis incoerencis, oltri che cun fai, in chest câs dal sigûr par colpe dal copiadôr.

Inmò dal an 1489, cuant che il Capretto al jere inmò vicjari sot la Glemine, a son trê cjants, o miei piçui poemis latins, di lui componûts par jessi cjantâts intes prucissions. Il prin in onôr di san Roc, il secont in onôr di san Tomâs e il tierç onôr di san Bastian. Dedicâts aes glesiis di Glemone, si trate dut câs di oparis di no grant valôr, dal sigûr no al nivel de innomine dal lôr autôr.

    Ben diviersis, par valôr leterari, a son scuasit dutis lis oparis dal Capretto scritis daspò il 1490, cuant che al le a vivi a Pordenon. L’elenc che nus furnìs il Liruti, indi comprent un pocjis che no si rivin plui a cjatâ. La plui innomenade e che e ve il maiôr sucès, e puarte il titul di “Antieroticon, sive de amoris generibus, libre tres”, e al è un tratât metût jù in forme dialogade, stampât a Trevîs dal za vût iniment Gjerart di Flandrie tal 1492, e po inmò a Colonie (Gjermanie) dal Birkmann, tal 1518, cul titul “De contemnendis amoribus”. Al è un messet di mitologjie assetiche, dulà che la dutrine morâl, tirade fûr dai Sants Paris, si zove des citazions da Ciceron a Seneca e vie indenant.

   Sul model dal “Cato maior” di Ciceron al è componût un altri tratât, titulât “De chistiani hominis senectute”. Mentri secont il model dal Petrarca a son stâts metûts jù i cinc libris clamâts “De miseria humana”. Di altris lavôrs impuartants no si è rivâts impen, magari cussì no, a cjatâ copie e testemoneance.

    Nus reste invezit, e al semearès in autograf, un grues volum (dal 1493) che, sot il curiôs titul di “Diapsalma”, al cjape dentri une esposizion, intai sens alegorics, dai sengui viers dal intîr Salteri: opare slargjade e sapontade di un slargjât furniment di altis cognizions. Al murì, cemût che si à vût iniment denant trat, a Pordenon tal an 1504.

    Tal so complès e par dute une rieste di resons, la opare di Pieri Capretto e supon in lui une volontât cussient di inviâ la culture furlane dal so timp viers lis corints umanistichis talianis. E ven acetade, vâl a dî, la totâl adesion a chel destin politic che la ocupazion dal Friûl de bande di Vignesie e veve aromai impreteribilmentri segnât pe nestre Patrie furlane. (Josef Marchet – test tirât fûr da “Friuli: uomini e tempi”, ridot e voltât par cure de redazion).

Ladins dal Friûl pag.6 – Novembar 2015 

DAI FATS E DE CULTURE

DES TIERIS LADINIS

“Ladin!” – Anade XII – n.1 – Mai 2015

In rilêf la leterature ladine des Dolomitis Belumatis

Borca di Cjadovri (Bl) – Al è jessût za fa cualchi mês il n.1 (Anade XII) de riviste “Ladin!”, buride fûr come simpri par cure dal Istitût Ladin de la Dolomites, di Borca di Cjadovri. Un numar ancje chest une vore interessant, massime tal saç di viertidure, dedicât ae “Lenghe de poesie ladine des Dolomitis Belumatis”. Autôr de ricercje al è il professôr Adeodato Piazza Nicolai.

     Piazza Nicolai al partìs di lontan, des primis rimis, des primis traduzion di bocons di oparis impuartantis che si son vudis tal Votcent. In chescj scrits si evidenziin doi aspiets: il prin al è il rapuart tra la lenghe uficiâl, il talian, e la lenghe locâl, dispès conflituâl. Il sisteme scolastic talian al à simpri fat ogni sfuarç par disvidrignî lis feveladis locâls. Il secont la fragmentazion des diviersis feveladis des valadis Belumatis. In efiets ogni paîs al à une sô varietât dialetâl ladine, particolâr seondât dal teritori di mont, che nol zove ni aes comunicazions e ai scambis comerciâi, ni a chei sociâi e culturâi. Il risultât al è une mancjance di une salde tradizion leterarie. Massime inte scriture des oparis a vegnin fûr chescj problemis, no jessint presints modei, vocabolaris, gramatichis e vie indenant.

    Cundut achel lis cjossis a son mioradis cetant tal secul passât, tal Nûfcent, ancje come rispueste di resistence a une omologazion culturâl e linguistiche puartade indenant in maniere arogant dal fassisim tra lis dôs Vueris Grandis. Po, passade la balfuerie des vueris, la riscuvierte des lidrîs, de propie identitât, de propie lenghe mari, e à saborât lis personis plui sensibilis e culturalmentri preparadis a ripiâ il cjaveç dal scrivi in poesie e in prose inte propie lenghe mari. A pareli, ancje la riscuvierte, e il recupar, di une cussience ladine al è stât sapontât da cheste sorte di Vierte leterarie floride fra lis Dolomitis dal Cjadovri, massime a partî dai agns sessante/setante.

    Cussì a scomencin a vignî fûr lis oparis dai poetis agordins Enzo Demattè, Loris Santomaso e Bepi De Colò, dai poetis di Ampezo Fiorenzo Pompanin, Ernesto Majoni Coleto e Marco Dibona Moro, dai poetis comeleans Adelchi Casanova Fuga, Pio Zandonella Necca e Lucio Eicher, dai poetis zoldans Graziano De Rocco, Anna Maria Pradel e Noris De Rocco, dai poetis cjadovrins Gemo Da Col, Italo de Candido Candon, Adeodato Piazza Nicolai e Piero De Ghetto.

    Ce nus pandie cheste radiografie plui a fonts de poesie ladine des areis agordine, ampezane, zoldane e cjadovrine? Inte sô “Curte storie de lenghe e leterature ladine” il professôr Walter Belardi al scrîf, sul cont de produzion leterarie de Val Gardene, Val di Fasse e Val Badie: “Il tai plurilinguistic, daviert a cualsisei forme espressive che si puedi codificâ su la cjarte, al met (il lôr lavôr artistic) ae avanguardie dai moviments leteraris contemporanis in aree ladine. “Tras” (une lôr riviste leterarie) si propon come pont di riferiment par une dialetiche culturâl interne, davierte dut câs ancje viers il difûr”.

    Cheste par altri e je une realtât che no coinvolç lis zonis des Dolomitis Belumatis. Plui che colaborazion culturâl e sintonie par “une dialetiche culturâl” e esist sun chest teritori une fragmentazion che e riflet inmò l’isolament storic vût iniment denant trat.

     In conclusion no je inmò concepibil une riviste leterarie che e rivi a cjapâ adun lis oparis di autôr ampezans, cjadovrins, agordins e zoldans intune colaborazion editoriâl sinergjiche, di plui slargjât respîr. Forsit e vignarà realizade sot la direzion dal Istitût Culturâl de la Dolomites, con sedis e Borca e Selve di Cjadovri. Cundut achel la sfide e reste cemût cjatâ mieçs e compromès, parcè che chest progjet ambiziôs al puedi realizâsi. In fonts i poetis e i scritôrs no mancjin, cemût che juste apont o podìn cjatâ, e lei, inte riviste “Ladin!” che o sin daûr a recensî.

    Di segnalâ come interessant al è ancje il saç che al ven daûr, di Mario Ferruccio Belli, dedicât a “Il cûr di Ampezo dal Tirôl pes comunitâts daprûf dal Cjadovri”. Notis tiradis fûr dal Archivi comunâl di Cortina. L’autôr nus conte che, si ben tra Ampezo e Borca al esistès un confin (dal 1866 chel tra Italie e Tirôl austriac, e prime chel tra Vignesie e i dominis di Cjase d’Austrie. Ma al è ancje biel ricuardâ che sevi Ampezo che almancul une part dal Cjadovri a àn fat part dai dominis dal Patriarcjât di Aquilee), tra lis comunitâts, tra la int vadì, e je simpri esistude colaborazion e jutori intai moments intrigôs de dibisugne. No mancjave, e jere vere, massime de bande dai talians, la propagande nazionaliste e iredentiste, ma no je mai rivade a cjapâ pît. Cussì dal archivi di Ampezo Mario Ferruccio Belli al è rivât a tirâ fûr dute une rieste di vieris documents che a dan testemoneance di chestis colaborazions.

   Tra chestis colaborazions al è curiôs il fat che, tal 1869, a sostituî une maestre (probabilmentri malade) des Scuelis popolârs di Ampezo e sedi stade clamade la siore maestre Mariane De Mattia di Borca. Il decret, al sclarìs Belli, al è impuartant parcè che, in plene stagjon di contrascj politics, si clame une maestre, cjatantle no intes valadis trentinis, cemût che e jere usance, ma ben invezit in Cjadovri, o sei oltri la frontiere taliane.

    La riviste si complete cun articui di culture locâl, la publicazion di tescj di poesiis, contis e teatri e cul spazi come simpri risiervât aes recensions. Il coordenadôr de redazion, oltri che diretôr responsabil al è Ernesto Majoni Coleto, che naturalmentri al rêç la incarghe ancje di diretôr dal Istitût Culturâl Ladin de la Dolomites. (edelweiß)

,Ladins dal Friûl pag.7 - Novembar 2015

INTAI PRÂTS DE CULTURE FURLANE

Une ricercje su “I lûcs de tradizion in Friûl”

Intun libri a son contadis lis tradizions vieris e plui resintis de Furlanie

Udin – Il mês di Avrîl stât de stamparie Lithostampa di Pasian di Prât al è vignût fûr il volum “I luoghi della tradizione i Friuli”, curât di Stiefin Morandini e penç 278 pagjinis. Si trate in efiets di une racolte di saçs su lis plusôrs tradizions de nestre tiere che à an come autôrs Mareno Baccichet (“Loga il teritori furlan. La citât slargjade sul teritori ise bielzà tradizion?”; Moreno De Toni (“I lûcs de vite e de socialitât. Paîs e placis, latariis, mulins e ostariis, fontanis e lavadôrs, prats e trois”); Sabrina Tonutti (“Il Friûl dai cantîrs”); Tatiana Azzola (“Il Friûl coltivât”); Marta Pascolini (Intai spazis de mont. La malghe, un lûc di tradizion de mont furlane”); Claudio Lorenzini (“Intai lûcs dal bosc: il lavôr e la tradizion in Friûl”); Maria Teresa Corso (“In mar e in palùo: i lûcs de pescje a Maran”); Roberto Frisano (“De ostarie al auditorium: i lûcs de musiche corâl di ispirazion popolâr”); Annalisa Bonfiglioli (“De cusine popolâr ae ristorazion. Tradizion e inovazion”. Da pît po si cjate une lungje rieste di aponts visuâi, di fotografiis vadì, a colôrs, su lis diviers tradizions de Furlanie di îr e di vuê par cure di Stiefin Morandini.

    Inte introduzion dal libri Donatella Cozzi nus palese che: “Tradizion e memorie a son unidis dai fii dal timp. Al è il timp de trasmission di une gjenerazion a chê altre, il timp dal tornâ a apropriâsi e dal tornâ a inventâsi, il timp dal ûs des cjossis vieris e gnovis. Il timp, inmò, de storie dal patrimoni, che al permet di “considerâ il leam tra passât e a vignî in maniere dinamiche, di pensâlu in tiermins di un procès segnât des cjadincis propiis: a voltis lentis, a voltis plui inviadis, e no come riferiment a un tesaur di ogjets definîts une volte par dutis. Lis roturis improvisis o graduâls dai rapuarts cul passât e cul a vignî, a son ducj moments che a viodin la invenzion di poetichis patrimoniâls dispès ineditis inte lôr definizion, lis lôr sieltis e lis lôr esigjencis”. (Poulot - 2006, pp.149).

    Simpri intes pagjinis de introduzion il curadôr de opare, Stiefin Morandini, inte sô note “Oltri il folclôr in Friûl”, al sotlinie che: “O cjapi a prestit pal titul dal gno contribût chel di un libri di antropologjie a mi cjâr e curât di Pietro Clemente, juste apont: “Oltre il folklore”. L’intent che al guidave Clemente al jere chel di deliniâ une storie dai studis di etnologjie fint ae vignude de antropologjie e daûr di chest intindiment mi movarai ancje jo intes pagjinis che a vignaran daûr, ma in particolâr o cirarai di individuâ une vie dute furlane, par specializazion e risultacis, rispiet al dibatiment nazionâl. O declari fint cumò che e sarà une storie a trats pôc ortodosse, e chest parcè che tal fâsi si è zovade di contribûts che a divignivin di diviersis centis specialistichis, de ricercje academiche, ma naturalmentri ancje da ‛cjaladis dal di fûr’ che intai agns a àn scrutinât, puartât indenant ricercjis, metût jù contribûts che a inluminin la complessitât de nestre regjon. Chest al è il spirt che al à guidât la realizazion di chest volum”.

    Tra i saçs publicâts nus plâs vê iniment chel di Moreno De Toni (“Paîs e placis, latariis, mulins e ostariis, fontanis e lavadôrs, prâts e trois”), tal passaç che al trate dai “Paîs” furlans: “Dî paîs, par furlan, al significhe riclamâ une cuantitât di emozions e di imagjinis che di bessolis a dan cont de diviersitât e de pluralitât di chest ‘lûc’: in Friûl a ’nd è paîs-frazion une vore piçui, cun cuarante paisans (Cjaulis di Paulâr), paîs-confin (Tamau), paîs-citadinis ben plui grancj (Tresesin), paîs alpins in cuote (Paulâr, Lauc, Sauris, For di Voltri) e sul font val (Denemonç), inte pedemontane di Pordenon o di Glemone (Andreis, Manià, Frisanc, Clausêt), in planure dilunc lis risultivis (San Zorç di Noiâr), dongje un lât (come Cjavaç), metûts su la lagune (Maran) o pûr poiâts suntune dolce culine, cemût che dispès al sucêt di viodi cuant che si va viers i cuei di soreli jevât, tra Cormons e Cividât. A ’nd è paîs bandonâts in spiete di gnûfs abitants, che biel planc e scuasit in maniere no spietade intai ultins agns a tornin a popolâsi. Paîs logâts di cualchi forest che al puarte gnove linfe a dinamichis demografichis e relazionâls aromai strachis (Dordole, parsore Mueç) e paîs che a tornin a popolâsi di Istât cu la vignude dai emigrants e dai amants de nature (Dalès, frazion di Trasâgas) o a traviers origjinâi progjets artistics e culturâi (Topolò inte Slavie Furlane). A ’nd è paîs dulà che si va aromai dome a durmî (Tierç, frazion di Tumieç) che za fa vincj agns a jerin fis di int e cumò dome di machinis che a tornin la sere, mentri lis personis a son dispès sieradis in cjase, denant de television o dal PC”.

    Al merte in fin dite che la publicazion e je podude vignî fûr graziis ai sostegns economics de Provincie di Udin e de Fondazion de Casse di Sparagn, oltri che cul patrocini dal Ent Friûl tal Mont.

(von zercläre)

_______________________________________________________________________________________________________________________________________________

Naldini a Versuta al à presentât i libris di Pasolini

Versute di Cjasarse – Sabide stade, 10 di Otubar, a Versute di Cjasarse inte viere glesie di S. Antoni, Nico Naldini al à presentât la ristampe, par cure dal editôr Guanda, di trê volums pasolinians: “Un paîs di temporâi e primulis”, “Romans” e “Poesiis sieltis”. Si trate di trê volums che aromai a son dificii di rivâ a cjantâ, che a contribuissin no pôc, soredut i prins doi, publicâts pe prime volte tal 1993 e 1994, a puartâ la atenzion dai letôrs e studiôs su la stagjon furlane di Pasolini. Doi volums, par cure di Nico Nadini (cusin di Pasolini), che a cjapin dentri, rispetivementri, scrits in prose metûts jù tra il 1945 e il 1951, e un insiemit di prosis di un romanç lassât inedit dal autôr. Il tierç impen e je une antologjie di poesiis, curade inmò di Nico Naldini e Francesc Zambon, che indi firme purpûr la jentrade critiche. Naldini al à volût che l’incuintri si davuelzès propite in chest lûc parcè che intai agns de vuere, e in chei subite daspò, Pasolini al amave cjatâsi in cheste glesie dal Cuatricent cui amîs e i siei zovins arlêfs.

    Ancje la date sielzude e à dai riferiments significants. In fats inte gnot dal prin di Novembar dal 1975, za fa cuarante agns, alì dal Lido di Ostia al vignive sassinât Pasolini, intun mût che al scuint inmò dai aspiets che no stâts dal dut sclarîts. In chê gnot, al disè cun rabie e dolôr Alberto Moravia tal so discors di cumiât al amì, “... al fo copât un grant poete, come che indi nassin une vore di râr intun secul. (red.)

Ladins dal Friûl pag.8 – Novembar 2015

SCRITÔRS E LIBRIS IN MARILENGHE

Bepi Agostinis nus conte la “Storie de Art in Friûl”

L’autôr: o ai volût fâ un regâl ae mê int, al popul furlan

    Al è vignût fûr za fa cualchi mês un libri verementri interessant, “Storie de art in Friûl – de preistorie fin ae metât dal ’900”, realizât cun cetante passion di Bepi Agostinis. L’autôr par cheste sô fadie di no pôc cont si è zovât de consulence artistiche di un espert di gale dal setôr come bons. Zuan Carli Menis, mentri pe consulence linguistiche al à podût fâ cont su Fausto Zof. In fats in viertidure dal volum, penç 455 pagjinis, Bepi al sotlinie che: “O dedichi chest lavôr a ducj i studiôs de Art Furlane, che mi àn dât la pussibilitât di podê sgarfâ tai lôr libris, par podê meti adun chest lavôr”.

   Pieri Fontanin, president de Provincie di Udin, ent che al à sostignût in maniere impuartant la publicazion di cheste opare, inte sô jentrade nus pant che: “Bepi Agostinis al regale al Friûl une gnove perle. L’amôr pe sô tiere, la sô lenghe, la sô storie lu à puartât a cognossi une vore ben ancje la sô art. Un lavôr che Bepi al à davuelt cun precision e impegn par promovi ad in plen lis nestris lidrîs. E nas cussì “Storie de art in Friûl”, une publicazion a caratar divulgatîf che e ufrìs un panorame significant sul grant patrimoni artistic dal Friûl cun tescj e descrizions scrits ducj in marilenghe, la lenghe dal so e dal nestri cûr. Chest al è il valôr in plui di cheste ricercje: un lavôr di studi inedit su la art proponût par furlan, a conferme des tantis potenzialitâts di cheste lenghe come codiç comunicatîf di doprâ in cetantis centis, no dome inte vite di ogni dì. E la impostazion sielte di Bepi no podeve jessi che cheste. Agostinis al è un interprete sensibil de culture e de lenghe furlane: la volontât di valorizâ chestis competencis identitariis impuartantis e à vuidât la sô ativitât professionâl tal contest dal teatri e in cualchi radio locâl e vuê e je ae fonde dal so impegn pe divulgazion des oparis leterariis dai nestris autôrs”.

    Mentri l’espert de materie, bons Zuan Carli Menis, al à vût mût di sclarî cemût: “... che chest libri di Bepi Agostinis al sedi un fat impuartant pe leterature furlane parcè che, a traviers la lenghe native, si vicinisi diretementri al gjeni artistic che al è il spieli de anime di un popul! Baste lei i doi libruts scrits par furlan di Pieri Piçul, ven a stâi bons. Pieri Londar, che al à butât jù “lis lezionutis de art furlane inte lenghe furlane parcè che la marilenghe e finìs di incolorî chel mont che il frut al à scomençât a tirâ sù cjucjant il lat di sô mari” (P. Piçul, - “Ristret de storie de art furlane”, Udin, 1973). Duncje fâ la storie de art di un popul cu la sô stesse lenghe al è come contâ lis vicendis plui intimis che a movin il cûr de int”.

    Cussì Bepi Agostinis al cjape pe man il letôr e lu vuide de preistorie al 1950 ae scuvierte des bielecis dal Friûl. Storie cognossude ai plui, bielzà lete e studiade, come chê des testemoneancis romanis di Aquilee o de architeture e dai monuments langobarts di Cividât; ma ancje storie di nicje, come chê dai taiepiere di Vît di Âs e Manià che a àn dât vite a rosons e portâi unics sedi chenti che venti ator in Europe. O come la storie dai mestris intaiadôrs Tumiecins che tal 1400 no vevin parêi di ca e di là des Alps. Un viaç tal viaç parcè che des intes diviersis etis si passe ai diviers lûcs che a testemoniin il miei de art furlane.

    Ve inalore il domo di Glemone, la massime rapresentazion dal gotic in Furlanie, scomençât tal 1190, il domo di Vençon e la plêf di San Pieri parsore Zui. A son propite lis glesiis e po intun secont moment i palaçs de siorie a fâ tornâ fûr la preseositât dai nestris artiscj plui brâfs, da Zuan Francesc di Tumieç al Quaglio, da Odorì di Pordenon al Tiepolo e a Nicolau Grassi.

    Une publicazion che e fâs dai numars la sô fuarce: 455 pagjinis ilustradis da 130 fotografiis a colôrs, 112 libris consultâts e metûts dentri inte bibliografie. “No je la sempliç traduzion par furlan di une enciclopedie – al displee l’autôr -, ma un lavôr sientific che al vûl palesâ la anime de culture artistiche dal nestri teritori”.

In conclusion o podìn dî che chest al è un libri par ducj, pal popul, pe int plui sclete, ma ancje pai docents che a insegnin il furlan intes scuelis, par coinvolzi i students e fâur cussì cognossi lis tantis oparis che o vin in Friûl e che masse di lôr inmò cognossin gran. Inmò, un volum ancje insiorât di un glossari par displeâ i tiermins tecnics, voltâts par furlan, che naturalmentri pôcs di lôr a cognossin.

    O sierìn cu la citazion des peraulis dopradis inte jentrade di Lionello D’Agostini, president de Fondazion Crup che e à sostignût economichementri la publicazion: “O pandin il nestri preseament par cheste opare che, jemplant un vueit rilevant, nus da la pussibilitât di gjoldi fint insom e in mût diret, cence nissune mediazion artefate, di une part no secondarie de nestre storie milenarie, cul auguri che la passion e i tancj sacrificis dal autôr a sedin almancul in part ripaiâts dal bon acet e di une largje circolazion dal libri”.

___________________________________________________________________________________________________________

La schede: B. Agostinis, "Storie de art in Friûl - de preistorie fin ae metât dal '900", Ed. Stamparie Lithostampa, Pasian di Prât 2015, pp.455 .

“Ladins dal Friûl” Diretôr responsabil : Renzo Balzan - Reg. Tribunâl di Tumieç n. 123 dai 09.03.98

Redazion : 33028 Tierç di Tumieç - V. Dandolo16 / tel. 0433/43696 / e-mail : ladinsdalfriul@gmail.com

F.I.P. (fotocopiât in propi) a Tierç di Tumieç (Ud) V. Dandolo 12 pes Edizions “Union Scritôrs Furlans”.

La publicazion e ven spedide es Bibliotechis dal Friûl, es Istituzions Culturâls Ladinis des provinciis di Bolsan, Trent e Belun, e a ducj chei che a mandin la lôr libare contribuzion doprant il C.C. bancjari nr.19162 dal “Banco di Brescia” (Filiâl di Tumieç) - codiç IBAN: IT50H 03500 64320 0000000 19162

Chest gjornâl inte sô version online si lu cjate tal sît : http://ladinsdalfriul.blogspot.it

Publicât cul sostegn de Provincie di Udin – L.R.24/2006 art.26

Il numero di Gennaio 2013

Anade ( XVI ) n.1 Zenâr 2013

LADINS          dal   FRIÛL

Periodic-mensîl    di    informazion   e   culture    sul   cont    de    minorance    celtiche

dai Ladins de Furlanie.  Edizion  par  cure  de  associazion “Union Scritôrs Furlans”

Chest gjornâl inte sô version on-line al ven fûr sul sît : www.ladinsdalfriul.eu

Anìn ducj a stâ in Carintie… e che a vadin a trai!

    La politiche di chenti e je in smaneç: in Fevrâr e in Avrîl si varà di lâ a votâ! Si vote prime pes politichis e po pes regjonâls. A votâ cui? Lis solitis musis, i solits bolpons, che a prometin a pitinton e no mantegnin mai nuie. Che nus oblein a jessi sotans di Rome e di Triest. Che nus incressin ogni altre dì tassis e gabelis e che nus ridusin simpri di plui i servizis, biel che puescj di lavôr a ’nd è simpri di mancul e int in casse integrazion simpri di plui. Ma che a vadin a trai, o miei che a vadin in Carintie a inferâ çucs ve!

    Mandâ un a inferâ çucs in Carintie al jere un mût di dî dai nestris vons, che a frecuentavin dispès chei sît par lavôr o par cumierç, e al voleve dî mandâ un sul folc che ti trai. Ma cumò lis robis a son cambiadis e lâ in Carintie, a logâ, a lavorâ, a vierzi une ativitât produtive e sarès une sielte di gale, une vore induvinade, oltri dut no si varès denant dai vôi cierts personaçs che a van dilunc a menâ la danze a contâ bufulis cence ritegn.

    Sintît chestis: venti sù si varès une burocrazie pratichementri zero o scuasit. Une concession edilizie si la oten in siet dîs, mentri a coventin otante dîs al massim par vierzi un implant industriâl. E po si àn capanons a disposizion pes ativitâts comerciâls a partî di 25 euros al metri cuadrât. Tassis clementis sui vuadagns e ancje su lis pais dai dipendents. Cost de energjie pes ativitâts industriâls dal 30% plui basse de nestre. Flessibilitât totâl, o scuasit, pal lavôr. E inmò finanziaments a cui che al decît di investî: fint al 25% dai coscj, cu la prionte di un premi dal 10% di disgravi sui impuarts investîts in ricercje e svilup. Il dut assistût da une rieste di consulents che a ofrissin servizis par judâ e disberdeâ dutis lis dificoltâts che si vessin di vê par implantâ une ativitât industriâl e comerciâl.

    Magari nol sarà dut aur ce che al lûs, cundut achel intai ultins dîs agns in Carintie si son vûts 80 investiments talians par un totâl di 800 puescj di lavôr (dai cuâi 80 de Danieli di Buri). Ma, a sclarissin i maiorents de Carintie, in chescj ultins timps si à vût une significative incressite di domandis di sclariments e di informazions, e ancje di propuestis di stralozà di chês bandis la sede sociâl. In sumis a ’nd è une schirie di imprenditôrs di chenti che, acanâts de crisi, perseguitâts di un fisc instabil e (par cui che al paie) ingort, da une burocrazie mastine, tormentâts da bancjis avaris e da un marcjât interni aromai puar che ce, che un pinsîr par lâ a implantâsi venti sù lu stan fasint. E po al è ancje il vantaç che la Carintie e la Austrie a son suntun soiâr privilegjât par podê jentrâ, e po slargjâsi, intai marcjâts todescs e dai Paîs de Europe di Jevât.

    Ma no son dome i industriâi che a golin di lâ in Carintie. Cjapìn par esempli la Val Cjanâl, dulà che la crisi ocupazionâl, tal setôr industriâl, dal cumierç e dai servizis e sta fasint scjampâ cetante int, massime i zovins, in part viers la planure furlane e i contors di Udin, ma in part ancje inte daprûf Carintie. Darest a favorî il spostament des personis di là dal confin di Goggau e je la ufierte formative des scuelis di Tarvis, dulà che e ven insegnade la lenghe todescje za des scuelutis. Par un fantat al devente cussì facil perfezionâ ce che al à bielzà imparât a scuele e rivâ cussì a cjantâ, favorît de cognossince de lenghe, un puest di lavôr e une cjase in Carintie. Venti sù a costin mancul i afits des cjasis, la benzine e il gasoli, la energjie eletriche e aduncje il riscjaldament. Inmò, lis copiis che a sielzìn di vivi in Carintie a gjoldin di agjevolazions a sostegn de famee. A ’nd è, par esempli, assegns di 342 euros ogni doi mês par ogni fi, cuote che e incrès a 400 euros se i fiis a van a scuele. In fin, no si po dismenteâ che in Austrie cetancj bens di consum a costin mancul che chenti.

    In conclusion stralozâ par lâ a lavorâ, e a vivi, in Carintie non sarès dabon une brute pensade. Darest lu vevin bielzà fat i nestris basavons. O pûr… provìn a inmaneâ un referendum par domandâ che ancje il Friûl al deventi un Land de Österreich. Intant Bon An Gnûf a ducj! (tarvos) 

A ducj i letôrs e sostenidôrs di “Ladins dal Friûl”

i augûrs plui sclets di un Bon An Gnûf 2013!

Ladins dal Friûl pag.2 - Zenâr 2013                                                                                     www.ladinsdalfriul.eu

DAL  TIMÂF  A  LA  LIVENCE

 Sanitât taiade e autonomie malade di spending review

Cundut achel il mês di Zenâr si vierç il “gnûf Ospedâl di Udin”

    In Italie al è daûr a inviâsi un taramot politic daspò che al è stât fat colâ il guvier Monti. Si fasaran lis votazions politichis il mês di Fevrâr cu ven, ma cence la sigurece  che il risultât al puarti a une stabilitât. La democrazie e je plui che mai balarine, e chest nol va ben parcè che la democrazie e scugne jessi soredut serietât e sostance. Posizion dal individui inte societât, prin di dut, e sô azion. La azion e je definide dal ategjament che il “civis” al cuiste cuant che al pense e al agjîs.

    Il pinsîr al è, par definizion, singolâr. La azion e je, soredut, comunitarie, tal sens che si vierç al rapuart cun chei altris, condizionantle tal ben e tal mâl. E e je propite achì che si palese une sorte di mancjance struturâl tal italian medi, che al ignore ce che al à di jessi il sisteme Paîs. No un agregât di egoisims e di soledâts, ma un ordenât e coordenât insiemit di vitis. Al è chest, darest, un discors che al cjate inte Costituzion premessis precisis. La solidarietât, la avualitât e la responsabilitât a definissin il cuadri plui gjenerâl di riferiment.

    Po, a son lis menzons precisis, dedicadis ai dirits, che a sclarissin, par esempli, che “La Republiche e tutele la salût come dirit fondamentâl dal individui e interès de coletivitât, e e garantìs curis cence paiâ ai puars” (articul 32, come 1°). Un intervent fondamentâl sun chest cont al è rivât po daspò tal 1978, cuant che la L.N. numar 833/1978, tal so articul 1, come 3° e sclarive che il Servizi sanitari nazionâl al veve di ocupâsi “di dute la popolazion cence distinzion di condizion individuâl o sociâl e secont lis modalitâts che a sigurin la avualitât dai citadins intai confronts dal Servizi.” Ma dal 1978 in ca la durade de vite e je incressude, ancje parcè che la ricercje e à permetût di fâ dai progrès grandons, ma intant la crisi fiscâl dal Stât e je aumentade e la finance publiche e je aromai rivade sui paradôrs, cussì il Servizi sanitari nazionâl al è jentrât in crisi.

    Dut chest par colpe dai citadins che a vivi masse a lunc e che si curin masse? No, par colpe di cui che in chescj agns al à gjestide la Sanitât, strassant e fasint dispès il pas plui lunc de gjambe. Nol è sucedût dapardut compagn. In gjenerâl intes regjons dal Nord lis robis a son ladis avonde ben, achì di nô in Friûl dal sigûr ben. Mentri jù pal stivâl al è sucedût un pôc di dut, favorint di fat la Sanitât privade, naturalmentri a vantaç di chei citadins che a podevin permetisal. Ma cumò che i conts no tornin, che bisugne sparagnâ par cirî di ridusi un debit che al riscje lâ fûr di control, a paiâ a son clamâts ducj inte stesse misure, chei che a àn fat cun cussience il lôr dovê, e chei che invezit a àn spindût e spandût cence ritegn. Tal nestri câs il Friûl-V.J. che al è stât “onest” al è clamât, al pâr di ducj chei altris, a taiâ e a sparagnâ. E chest nol è coret gran, parcè che nol è just disfâ e meti in dificoltât alc che al funzione.

    In sumis secont cui che nus guvierne i ospedâi a son lûcs dulà che si strasse, e par cheste reson la capacitât di ricovar e assistenziâl e va ridusude a une medie di 3,7 puescj jet ogni mil abitants. Cussì achì di nô, che o vin vuê 5.260 puescj jet, chescj a varessin di deventâ 4.572, o sei circje 700 in mancul.

    A part lis conseguencis che dal sigûr a divignaràn di chescj tais e lis dificoltâts che a podaressin jessi creadis pal nestri sisteme sanitari, che pûr jessint di alt nivel al è dut câs in afan (viôt i timps lunc par otignî esams specialistics e intervents programâts), al va memoreât che intant che chês altris regjons a van a pesâ adimplen sul Font sanitari nazionâl, il Friûl-V.J. al è jessût a so timp di chest Font, e al finanzie completementri cun propiis risorsis il Servizi sanitari regjonâl. Inalore cemût puedial il Stât intervignî obleant a sbassâ il  numars dai puescj jet intune Regjon che e proviôt di bessole, cu lis risorsis (tassis) dai propiis citadins, al finanziament des ativitâts sanitariis? Si trate inmò une volte di une intromission injuste inte libare sielte fate dai citadins di cheste Regjon, juste apont autonome e speciâl. Lis manovris centralistis dal guvier di Rome a son dabon fûr dal vade. Ma cheste no je plui nancje une novitât. Si po verementri fevelâ di Sanitât taiade e di autonomie speciâl malade, in chest câs di spending review.

    Par completece di informazion al merte memoreât che tal passât 2012 pal propi Servizi sanitari la nestre Regjon e à spindût 2,5 miliarts di euros, impegnant circje la metât dal belanç, mentri par chest 2013, cui tais e sparagns che si proviôt di fâ, cheste spese e calarà a 2,4 miliarts.

    In dute cheste balfuerie simpri sul cont de Sanitât, almancul chenti, a ’nd è ancje cualchi buine gnove. In fats cui prins di chest mês di Zenâr si vierç il gnûf Ospedâl di Udin. Si trate dai gnûfs fabricâts dulà che a son za lâts, o che a laran cumò in curt, la radioterapie, un pôcs di ambulatoris, i reparts di oncologjie, ematologjie e il bloc chirurgjic. A chest si zontin la gnove centrâl termoeletriche a cogjenerazion, e la centrâl di sterilizazion.  Cussì il gnûf ospedâl al cjape cuarp in maniere definitive, dîs agns daspò che e jere stade poiade la prime piere. Par realizâ chest prin e secont lot a son stâts spindûts 271 milions, ma par completâ ancje i proviodûts tierç e cuart lot indi coventin altris 103, che in chest moment a mancjin.

    In sumis il Friûl al à fint cumò spindût ben pe sô Sanitât, che e à cualitât e prestazions di nivel european, e al è just difindile cun fuarce e cence compromissions. Darest, al di là di cui che al vinç o al piert lis prossimis votazions, la int e domande soredut lavôr, une scuele di sest e une Sanitât che funzione. Il rest a son dome fufignis, tabaieçs cence costrut, talianadis juste apont. A ducj Voaltris l’augûr di un seren An Gnûf 2013, naturalmentri in buine salût!        

                                                                         (renzo balzan)

Ladins dal Friûl pag.3 - Zenâr 2013                                                                                                www.ladinsdalfriul.eu

CRONICHIS  DI  CHENTI

La crisi no mole e i timps si stan fasìnt simpri plui dûrs

Davâr - An gnûf problemis vieris: la crisi economiche e ocupazionâl il Friûl no mole, anzit, viodût ce balfuerie che e je daûr a discjadenâsi sul plan politic, intai mês cu ven nol è dabon di spietâsi nuie di sest.

    O scomencìn contant une storie cussì clamade minime, ma dal sigûr une vore significative par fâ intindi la clime che e je daûr a regnâ. A Davâr, in Cjargne, Milene di Vora e à decidût di sierâ la sô buteghe di scarpis e di marçarie daspò scuasit trente agns di ativitât. Lis resons: masse tassis, masse imberdeis burocratics, masse pôcs vuadagns. Chest al è dome l’ultin dai esemplis di ce fin che a stan fasint lis aromai pocjis buteghis restadis viertis intai paîs di mont. E la politiche ce fasie? Dibot nuie, o ben dome cjacaris cence costrut. Il probleme al è che lôr a son a Triest, e che lâ jù a scugnin atindi a problemis cetant, ma cetant, plui impuartats: la Feriere di Servola, La Sertubi, il puart, il Sincrotrone e vie dilunc. E i cjargnei e lis lôr buteghis… che no stedin a rompi lis devozion ve!

    De Cjargne ae Furlanie, o tornìn a fevelâ de Cjartere di Basandiele, dulà che al semee che, daspò il dipuesit alì dal Tribunâl di Milan dal concuardât licuidatori, a sedin rivadis des ufiertis de bande di imprenditôrs interessâts a cjapâ in man la fabriche par tornâ a inviâ la produzion, ancje cu la formule dal afit. Une  di chestis ufiertis e sarès rivade de Austrie, e chest al fâs ben sperâ che si sedi, finalmentri, in presince di alc di concret. Intant il conseîr regjonâl Baiutti al à presentât une interogazion ae Zonte parcè che si vebi di valutâ la pussibil partecipazion, ancje in forme minoritarie, de finanziarie Friulia Spa inte eventuâl creazion di une cussì clamade “newco”. Dut al zove, intant i 150 operaris a cjase in casse integrazion a spietin. A spietin rispuestis positivis, pe lôr dignitât e pal avignî des lôr fameis.

    Situazion di crisi ancje aes storichis “Latariis Furlanis” di Cjampfuarmit, che a àn prontât un plan di ristruturazion che al proviôt, e nol podarès sei diviers, une riduzion di circje sessante adets. Naturalmentri al è intervignût il sindacât e a son stâts coinvolzûts i sindics de zone, oltri ai assessôrs regjonâi Violino e Seganti.

    A Sedean invezit, alì de impuartante aziende metalmecaniche “Mangiarotti Spa”  il lavôr nol mancje, massime pes comessis viers il forest, ce che impen e mancje e je la licuiditât, o sei bêçs par paiâ i stipendis ai passe cuatricent dipendents. Ancje in chest câs e je stade clamade a intervignî la Regjon par cirî une soluzion cu lis finanziariis regjonâls: Friulia, Mediocredit e Frie. Ma ancje lis bancjis no puedin tirâsi indaûr, e je ancje une cuestion sociâl, e po la Mangiarotti e je une aziende sane, cun comessis fint al 2017, duncje nol è propit nuie di ce riscjâ.

    Pai 76 dipendents de ex Caffaro di Tor di Zuin si prospete invezit un slungjament de casse integrazion in deroghe nazionâl. Intant e je uficiâl la presentazion de propueste vincolant par comprâ la macroaree 7 de bande de “Halo Industry”. Al è chest un pas fondamentâl pe creazion dal gnûf implant pe produzion di clôrsode, o sei par tornâ a inviâ i implants, e aduncje par fâ rientrâ a vore i operaris cumò in casse integrazion. (mateu di prun) 

Union Scritôrs Furlans: il gnûf diretîf pal bieni 2013/2014

    Felet - Ai 30 di Novembar stât si è davuelte a Felet la assemblee dai associâts ae Union Scritôrs Furlans. L’incuintri si è viert cu la relazion dal dean Renzo Balzan in rivuart a ce che al è stât fat dilunc il passât 2012. La cjosse plui impuarte e je cence altri il fat che la Union Scritôrs Furlans e je deventade editôr dal nestri sfuei mensîl  “Ladins dal Friûl". Chest passaç al è stât pussibil cul n.5 dal mês di Mai, daspò che si veve scugnût fâ i proviodûts passaçs burocratics alì de Cancelarie dal Tribunâl di Tumieç, dulà che il sfuei al è regjistrât inte note dai periodics, e aes Puestis, par podê otignî il libret di spedizion in abonament puestâl cun tarife ridusude. Diretôr responsabil al reste inmò Renzo Balzan, e la sede de redazion e reste simpri a Tierç di Tumieç. Al va ancje sclarît che oltri ae spedizion par pueste dal gjornâl, soredut aes bibliotechis e aes associazions culturâls, di chenti e de Ladinie dolomitane, si fâs ancje la spedizion vie e-mail in formât pdf, cun chest mieç si e podût slargja une vore il numar dai contats.

    Il secont pont frontât al è stât chel de riviste de Union, “Gnovis Pagjinis Furlanis”. Culì la situazion e je deventade intrigose par vie che il contribût che e da la Provincie di Udin, su la fonde de L.R. 24/2006 (art.26), si è ridusût a a pene mil (1000) euros. Cun cheste cifare si riscje verementri di scugnî sierâ la publicazion, daspò trente agns di significant presince. Par chest an (2012), graziis ae colaborazion de stamparie LitoStampa di Pasian di Prât, si rivarà a fâ vignî fûr une publicazion di sessante pagjinis. Dut câs si à scugnût meti de bande articui za pronts, e chest al è displasût cetant. Vedarìn ce rispueste che si varà aes domandis che si fasaràn pes ativitâts di chest an cu ven, ma al è evident che lis prospetivis no son par nuie buinis.

    Vadì che dute cheste situazion e slaife une vore ogni progjet e ogni sorte di iniziative, ancje se la presince de Union Scritôrs Furlans e reste un alc di impuartant inte cente culturâl furlane, soredut par rispiet al so fondadôr Agnul M. Pitane. Un aspiet che lis istituzions invezit a ignorin, co la nestre clape no ven nancje plui invidade a incuintris e cunvignis. Dut câs nô si impacìn di leterature e di culture, e no di politiche.

    Daûr di ce che al proviodeve l’ordin dal dì si è passâts po daspò a nomenâ il gnûf dean e il gnûf diretîf, pal bieni 2013/2014. Dean al è stât confermât Renzo Balzan, mentri dal gnûf diretîf a fasin part: Massim Duca (ancje cu la incarghe di segretari-cassîr), Donât Toffoli, Carli Pup, Ennio Zampa, Marc Stolfo e Nin Rodaro. Revisôr dal cont al sarà Lucio Peressi, suplent Zuan Marie Basso. (red.)

Ladins dal Friûl pag.4 - Zenâr 2013                                                                                                www.ladinsdalfriul.eu

DOCUMENTS   

Cunvigne su la tutele dal furlan: si fâs par mût di dî!

Ve cemût che la L.R. 29/2007 no je stade metude in vore gran

Udin - Sabide stade, 24 di Novembar, alì  dal Auditorium de Regjon a Udin, il Consei regjonâl si è sfrancjât di une norme cjapade dentri inte L.R. 29/2007 - tutele lenghe furlane - o sei al à inmaneât une Cunvigne che “e varès vût” di fâ il pont su la situazion de metude in vore, juste apont, di cheste normative.

    Premetût che nol jere clâr, gran, se la Cunvigne e fos vierte a ducj o ben dome “ai adets ai lavôrs” vûts iniment inte norme di leç, nus risulte che no pôcs di chei che a jerin a cognossince de Cunvigne “a son lâts a Sante Catarine” par vie che al jere evident che e sarès stade nuie di plui che un at di propagande, a bon marcjât, pre - votazions de maiorance regjonâl che e parone tal palaç di Triest.

    E cussì al è pardabon sucedût. De bande dai assessôrs Molinaro e De Anna, dal president de assemblee regjonâl Maurizi Franz e ancje dal stes maiorent de ARLeF, Laurinç Zanon, si à vude nome une lungje naine di laudis cjantadis a lôr vantaç di ce che al jere stât fat, usance lôr. No une peraule su la realtât sclete in rivuart de metude in vore de leç che e deve il teme al incuintri: la L.R. 29/2007 e je inmò scuasi dute di aplicâ, soredut parcè che a mancjin i proviodûts regolaments. E no stin a fevelâ de scjarsece dai finanziaments (ma no par ducj!) burîts fûr de Regjon dal 2008 a vuê, che, par cierts setôrs come i media, la informazion vadì, a risultin jessisi disfantâts par ben doi agns. Une situazion che po tal dopomisdì dai 24 di Novembar e je stade denunciade, cun fuarce, des realtâts associativis cence brenis su pe schene.

    Darest tal 2008, a pene elezût, il president Renzo Tondo al veve cun clarece fat capî di considerâ la tutele de lenghe furlane un “cost” di svuincâ parcè che la tutele de seconde - sul plan numeric - minorance linguistiche storiche che e vîf in Italie (e maiorance etno- linguistiche in Regjon), par lui no jere “une prioritât”. Al po tignîsi in bon co al è stât contentât dai siei assessôrs De Anna e Molinaro, che no si son sparagnâts fregul tal no meti in vore cheste leç regjonâl di tutele de lenghe furlane.

    E inmò a àn vût ancje cûr di inmaneâ une Cunvigne, sevi pûr proviodude de leç stesse, par vignî a contânus cetant che a son stâts brâf a fâ “scuasit” nuie e dome viers la fin de legjislature?

    Mai vie po! Di ce stano fevelant? Dai marzians che a zirin par Felet? Ma pensino pardabon che i Furlans a sedin cussì maucs di crodi aes lôr sflocjis. I fats a costin, lis peraulis no, o ben sì, la spese par organizâ une cunvigne inutil  straçant, cussì,  inmò bêçs par dibant. Ju vessino dâts a Radio Onde Furlane chei bêçs alì a varessin almancul fat une opare di ben, e cetante plui biele figure.

    Simpri sul cont di cheste “curiose” liende o publichìn, culì sot vie, il document che al è stât prontât par cheste dade dal “Comitât 482”. Un document puntuâl, che al met in clâr dutis lis mancjancis “politichis” intai rivuarts de mâl glotude  L.R. 29/2007. (red.)

 

    Sabide ai 24 di Novembar si tignarà a Udin la prime Conference regjonâl su la lenghe furlane. Si trate di un apontament proviodût de L.R. 29/2007 pe tutele, pe promozion e pe valorizazion de lenghe furlane tant che ocasion par controlâ la metude in vore de leç. Dal moment che l’ordin decidût pai intervents al confine dal dopomisdì, pôc prime de sierade dai lavôrs, i spazis a disposizion dai rapresentants dal associazionisim e dai sogjets impegnats ogni dì par promovi il furlan e par difindi   il cuadri de metude in vore de L.R. 29/2007 cussì cemût che al ven fûr de ativitât di verifiche fate in chescj agns dal “Comitât 482”.

    Dal moment che si larà a fevelâ dome de metude in vore de L.R. 29/2007 o lassin de bande ducj chei altris ponts critics che a pesin su la lenghe furlane. O domandìn scuse pe lungjece dal test, ma viodût che no cjapìn part ae campagne eletorâl o vin miôr che a sedin i fats a fevelâ - e une analisi atente dai fats e domande un minim di aprofondiment - e o lassìn che a sedin altris a fevelâ a colps di slogan.

    Politiche linguistiche  Daûr de leç, lis prioritâts di intervent a varessin di jessi fissadis par mieç di trê gjenars di plans: un Plan Gjenerâl di Politiche Linguistiche de durade di cinc agns svilupât de aministrazion regjonâl su propueste de ARLeF; dai Plans pes prioritâts di intervent  cui obietîfs di rivâi an par an; e dai Plans Speciâi di Politiche Linguistiche che Regjon, ents locâi e concessionaris di servizis publics a vevin di dâsi par definî i lôr intervents pal furlan suntune dade di cinc agns. A vuê, par chel che o savìn, “nissun di chescj plans al è stât fat bon”. Un tant al impedìs ancje di controlâ in ce grât che lis aministrazions locâls e i sogjets concessionaris di servizis publics a àn metût in vore la leç.

    La Zonte regjonâl e je clamade a presentâ ogni an une relazion in Consei sui progrès inte metude in vore de leç e, ogni cinc agns, un rapuart sui risultâts otignûts tal infuartî l’ûs dal furlan. Se par viodi chest ultin o spietìn cun fiducie la Conference di sabide, “no si à inmò viodude nissune des relazions anuâls cundut che a àn di jessi rindudis publichis”.

    Par fissâ i indreçaments de politiche linguistiche, la ARLeF e varès vût di podê zovâsi di une “Comission pal ûs sociâl de lenghe furlane”, nomenade cun decret dal president de Regjon, ma di cheste Comission “no si viôt olme”.

    Tra i imprescj di fonde par meti in vore une politiche serie pe lenghe, la L.R. 29/2007 e proviôt ancje la “certificazion linguistiche”. Mûts, criteris e carateristichis par otignî la certificazion a vevin di jessi fissâts cuntun regolament regjonâl di dâ fûr dentri di sîs mês de jentrade in vore de leç ma, dopo di passe cuatri agns e mieç, “il regolament nol è inmò vignût fûr”. (al va indenant a pagjine 5) 

Ladins dal Friûl pag.5 - Zenâr 2013                                                                        www.ladinsdalfriul.eu

DOCUMENTS 

Cunvigne su la tutele dal furlan: si fâs par mût di dî!

Ve cemût che la L.R.29/2007 no je stade metude in vore gran

(al ven indenant di pagjine 4)     Scuele - Par partî in maniere continuative cul insegnament dal e par furlan, la leç regjonâl e domandave di prontâ: un regolament cul plan operatîf di sisteme pes scuelis; un regolament par fissâ lis competencis par insegnâ il e par furlan; la nassite di une Comission permanent pal insegnament de lenghe furlane. Par imbastî ducj chescj struments operatîfs, la aministrazion regjonâl i à metût diviers agns cul risultât che “l’an scolastic 2012-2013 al è il prin dulà che la leç 29/2007 e tacarà a jentrâ in maniere graduâl intes scuelis”.

    Cualchidun al à dite che il ritart al diven de impugnazion denant de Cort Costituzionâl di une part dai comis de leç, ma la sentence e je dal mês di Mai dal 2009 e, aduncje, ancje a volê tignî par buine cheste spiegazion, i agns di ritart a son plui di trê. Par judâ a imparâ il furlan ancje fûr dai trois scolastics tradizionâi, la leç e proviodeve che alì de ARLeF al fos metût sù un “regjistri dai volontaris pal insegnament de lenghe furlane”, regjistri che invezit “nol è stât inmò inviât”.

    Media - Ancje pai intervents a pro dai mieçs di comunicazion la Regjon e veve di dâ fûr un “regolament”. Lu à fat “dome sul finî dal 2011”, ma al fronte dome la part dedicade a radios e televisions e al  lasse fûr la cjarte stampade e internet.

    Dut câs in chescj agns chest “setôr al è stât penalizât a fuart”. Cun di fat lis leçs finanziariis regjonâls pal 2010 e pal 2011 a vevin gjavât ducj i finanziaments pal setôr, finanziaments che a son stâts tornâts a meti dopo di cetantis protestis dome cu lis variazions di belanç dal 2011, ma cuntune riduzion dal 25 par cent rispiet ae cifare che si veve prime. Cun di plui, par chel che o savìn, i programs fats in gracie dai fonts pal 2011 a son stâts saldâts dome chest Novembar, intant che aes domandis presentadis in Zenâr pai fonts 2012 (che al 75 par cent a varessin di lâ aes televisions, penalizant cussì il setôr radiofonic che in chescj agns al è stât il plui continuatîf e vivarôs tal doprâ e tal promovi la lenghe) no je stade dade inmò nissune rispueste.   

   Realtâts associativis - La L.R. 29/2007   e proviôt ancje  che  la  Regjon e finanzii, in maniere proporzionâl

ae lôr ativitât, chei sogjets indotâts di une organizazion e di une struture stabile che a davuelzin une ativitât cualificade e continuative a pro dal furlan. Al è zaromai di agns che e je stade comunicade la volontât dal esecutîf regjonâl di fissâ dai criteris obietîfs par sielzi chescj sogjets e par ripartî lôr lis risorsis, ma des peraulis par cumò no si è inmò passats ai fats. L’unic fat che si à viodût al è chel de “riduzion progressive des risorsis”, inviade za di agns e “metude in vore cun tais orizontâi che no tegnin in nissun cont la proporzion, la cualitât e la continuitât des ativitâts davueltis”, e nancje dal gjenar di organizazion e de struture dai diviers sogjets. Cun di plui, se al sarà confermât il tai liniâr dal 50 par cent des risorsis par ducj i sogjets ricognossûts, si darà un colp mortâl propit a chei che a lavorin ogni dì pal furlan e che par fâlu a àn bisugne di dipendents e struturis saldis.

    Division des competencis - A ingredeâ inmò di plui la situazion e je rivade ancje la “division des competencis su la lenghe furlane tra doi Assessorâts (Culture e Istruzion)” e la riduzion progressive des capacitâts operativis dal ufici che une volte al rapresentave il “Servizi regjonâl pes identitâts linguistichis”.

    La ARLeF, che e varès di jessi l’orghin di riferiment pe politiche linguistiche pal furlan, in chescj agns si è cjatade dispès in dificoltât par vie de “scjarsetât numeriche e de precarietât dal so personâl”. Il statût gnûf de Agjenzie par cumò nol semee che al vedi zovât masse a risolvi chest probleme, ma al à stramudât il Comitât Tecnic Sientific (che nol diven di une nomine politiche direte) intun sempliç organisim a clamade, cence nissune pussibilitât di intervent.

    Conclusion - Par chel che o vin podût viodi fin cumò, chel achì al è il stât de (no) metude in vore de L.R. 27/2009. Lis problematichis che o vin presentât culì a son stadis segnaladis plui e plui voltis, ma cence ricevi nissune rispueste direte de bande de aministrazion regjonâl. Al è un cuadri - magari cussì no - che nol à bisugne di altris coments. 

                                (carli pup - puartevôs dal Comitât 482)

    Di chel dì che il Friûl al è passat sot de Italie e je scomençade la vuere cuintri la lenghe furlane.

    Cualchidun, salacor, la veve nulide ancje prin: tra i patriots dal '48 e dal '59 indi jere di chei che ni si sporcjavin a fevelâ par furlan. Ma chel al jere afâr lôr: i sfuarçs par distudâ la lenghe a son vignûts dopo. A son vignûts di ogni bande: de bande di putrops furlans che a àn tacat a scrivi par furlan in maniere ridicule, par fâ viodi che il nestri lengaç al è fat di peraulis talianis cun cualchi çoncjadure da pît, de bande dai gramatics che si son butâts tant che liparis aduès dal Ascoli - il glotolic dal mont - par vie che al veve vût cûr di visâsi che nol jere pussibil meti il furlan tal complès dai dialets talians; de bande de stampe nazionaliste che e jere cjalde di netâ ducj i cincuante mil dialets talians; de bande bande dal guvier che al dave istruzions segretis  di promovi la invasion di funzionaris e mestris "talians" tal Friûl, par convertî cheste int che no semeave masse contente des tassis sul masanât e de bocjade cuistade pal mont spudant balins.

    Cun cheste biele politiche o sin rivâts fintremai ai timps di aur de farse litorie. In chê volte si è discjadenade une altre bissebove plui furiose di prin. I prefets a mandarin la proibizion a dutis lis stampariis di publicâ ancje une sole rie di furlan e sepi Diu ce vitis che e à fat la Filologjiche a molâ fûr, tra nûi di incens da "guidadôr", chel fregul di "Strolic".

(josef marchet - "Patrie dal Friûl" - Març 1950)

   

Ladins dal Friûl pag.6 - Zenâr 2013                                                                                                www.ladinsdalfriul.eu

DAI  FATS  E  DE  CULTURE

DES  TIERIS  LADINIS

Se la cuotidianitât e devente poesie

Interviste ae poete ladine dolomitane Roberta Dapunt

Urtijëi / St. Ulrich (Bz) - Tal ultin numar de riviste “Gana”, che e jes come suplement dal setemanâl in lenghe ladine “La Usc di Ladins”, dedicade al mont feminîl, e je stade publicade une interessant interviste a poete Roberta Dapunt. Roberta Dapunt, juste apont, e je nassude tal 1970 in Val Badie, dulà che e vîf cu la sô famee intun lûc clamât Ciaminades, e e à publicât cumò di resint, cul editôr Folio di Bolzan/Bozen, une racolte di poesiis compagnadis di fotografiis cul titul di “Nauz”, dedicade al lavôr dai paurs dilunc il cicli dal an. Altri sôs oparis a son vignudis fûr tal 1993 (“OscuraMente”), tal 1999 (“La carezzata mela”) e tal 2008 (“La terra del paradiso”), mentri tal 2013, cul editôr Einaudi e vignarà fûr la racolte di poesiis “Le beatitudini della malattia”.

    La interviste, realizade di Erika Castlunger, la publichìn culì sot vie, adatade e voltade par ladin furlan. (edelweiß)

D. Cuant i ise vignude la passion pe leterature e pe poesie?

R. La passion pe poesie e pe leterature e je cressude parie cul cressi de mê persone, jo o vût simpri chest interès, come che altris a àn altris interès. O ai coltivât cheste mê passion, che mi sta da cetant apaiament, di cuant che o ai scomençât a lâ a scuele.

D. Scrivi al è un impegn che al domande timp e dedizion. Cuant isal il moment particolâr dulà che e je plui ispirade, dulà che e scrîf di plui?

R. No ’nd è un timp particolâr, la ispirazion e rive des tematichis che e propon la atualitât dal vivi di ogni dì, di cualchi leture, dal scambi di ideis cu lis personis che si incuintrin. Cundut achel i mês dal Atom e dal Unvier a son chei che, pe atmosfere particolâr che a rivin a creâ, dulà che il gno scrivi al ven di plui inviulât.

D. Lis sôs poesiis a dan al letôr la sensazion di un mont cidin, bonât, cun cadencis regolârs, un mont dulà che il vivi al cuiste une dimension sclete, particolâr, almancul par chel che al inten lis personis; isal il mont dulà che jê i vîf? Ce rapuart aie impen cul mont dulà che il vivi al è afanôs, frenetic?

R. O ai la fortune di podê vivi intune realtât rurâl inmò intate. Une realtât dulà che esist la stale, i imprescj par lâ a fâ il fen, dulà che si va tal bosc daprûf a fâ lis legnis che a coventin par scjaldâsi, dulà che ore presint si cope il purcit in cjase, o sei la cuotidianitât de Val Badie dulà che il vivi a continue a vê une ande divierse rispiet al vivi de citat, a misure di om e di ambient. A dut chest o partecipi ancje jo, e e je une grande biele robe. Chescj a son aspiets impuartants de me vite, mi dan un inricjiment che mi saponte tal gno impegn.

D. Une tematiche ricorint de sôs poesiis e je chê dal grant rispiet pe nature. Par jessi buine di trasmeti cheste tematiche cu la poesie, al covente un grant coinvolziment, une sorte di devozion pal ambient?

R. La nature e je la prime realtât che o viôt ogni buinore cuant che, a pene jevade, o tiri la tindine par cjalâ difûr ce zornade che mi spiete. Dute la mê vite e je compagnade de nature, cussì chestis sensazions a son deventadis lis tematichis impuartantis de mê poesie. Dut câs il teme fondamentâl par me e je la persone. A traviers la nature e la sô descrizion o cuisti elements, o   ben   metaforis,  che  mi  judin a  contâ  la

persone.

D. Une altre tematiche interessante che si cjate intes sôs lirichis e je chê dal misteri de muart, che e fâs part de vite. Cualis lis resons di chestis riflessions?

R. Inte nestre culture ocidentâl chescj aspiets a son dispès platâts, se no fintremai refudâts. Nol è inmò cussì, par cumò, intai paîs plui piçui come  chei che o vin intes valadis ladinis. Achì e esist inmò la tradizion dal murî a cjase, dal defont che prime de sepulture al reste in vàres inte sô stüa, cu la int di cjase che lu vegle e la parintât e i amîs che a vegnin a puartâ la ultime preiere, l’ultin salût. Po o vin lis cortines (simitieris) dongje lis glesiis, e lis tombis a son tignudis cetant cont e visitadis dispès. Par me la muart e je une presince e no une lontanance inte esistence de persone e nus compagne inte vite di ogni dì.

D. A part il grant rispiet pes tematichis tratadis intes sôs poesiis, si olme par dongje ancje un grant rispiet pal lengaç, pe sielte de peraule juste?

R. Dal pont viste linguistic la poesie e je il risultât di une ricercje profonde dal lengaç, po a vegnin ancje la ispirazion e i sintiments de persone. La int e à bisugne de poesie, e cuant che cheste e je buine e sa trasmeti sensazions e e jude a fâ ricognossi lis esperiencis de propie vite. La poesie e propon un lengaç che al jude inmò a tirâsi fûr de cuotidianitât, al jude a fantasiâ, a diliberâsi dai aspiets afanôs de esistence.

D. Inte sô ultime publicazion “Nauz” ancje lis fotografiis a dan un sens particolâr al libri. Sono fotografiis realizadis di pueste pal libri?

R. Lis fotografiis, in blanc e neri, lis ai fatis e svilupadis jo. No son dut câs stadis pensadis par jessi compagnadis a une specifiche poesie. “Nauz” par me al è un ringraziament par dut chel che o ai podût imparâ a Ciaminades, lûc de mê anime.

D. Isal impuartant par jê il confront cun altris scritôrs e artiscj?

R. I scritôrs par solit no si confrontin. Si cognossin e a scambiin impressions e opinions ae ocasion di mostris e di cunvignis leterariis, ma po dut al finìs alì. Dut câs jo o ai cetancj compagns, sedi tal ambient de art figurative che in chel de leterature, e il confront sul lengaç e sul mût di fâ culture al è chel che plui mi interesse e dulà che si po imparâ di plui. 

Ladins dal Friûl pag.7 - Zenâr 2013                                                                                                www.ladinsdalfriul.eu

INTAI  PRÂTS  DE  CULTURE  FURLANE

Olmant il passât: il timp de memorie

Une interessant iniziative leterarie dal Circul dai Anzians di Tumieç

Tumieç - Il 2012 al è stât declarât de Union Europeane “L’an dal invieliment atîf”. Po ben une biele rispueste sot chest aspiet le à dal sigûr dade il “Il Circul dal Centri Diurni dai Anzians de Citât di Tumieç”, che al à tant che dean Pierino Delicato, co a so timp al à vude la biele pensade di inmaneâ un premi leterari, di prosis e poesiis par talian e par furlan, titulât “Flash dal passanto - ovvero il tempo della memoria”. A cadence bienâl, chest premi al è rivât, cun chê dal 2011, ae sô VI edizion. Ma la cjosse plui interessant e je che lis prosis e lis poesiis premiadis, oltri a chês che la zurie e à considerât di une cierte valence leterarie, a vegni po publicadis parie intun volum.

    E propite ai 20 di Otubar stât, a Palaç Frisac di Tumieç, al è stât presentât, par cure di Marina Di Ronco e di Renzo Balzan, il volum (pp.148) che al cjapave adun lis oparis che a vevin concorût intes edizions IV-2007, V-2009 e VI-2011. Une publicazion curade dal professôr Ermis Dorigo, pai tescj par talian, e di Renzo Balzan pai tescj par furlan. Il disen de cuviertine, che al rapresente un personaç simbul de Cjargne come che al è Romano Marchetti, lu à realizât il pitôr Bruno Tontini, mentri i biei disens dentri vie a son opare de artiste di Nonte di Soclêf Barbara Picotti.

    I ricuarts biei a van dilunc a vivi e a jessi vîfs par simpri, ma a tempelin in maniere dolorose parie cul timp che al passe. Dut câs ancje chei bruts a van ricuardâts, a mancul che no si crodi a ce che al scriveve Groucho Marx: “Ricuardâ il passat al sierf al a vignî, cussì no tu ripetarâs i solits erôrs: tu indi inventarâs di gnûfs”. Mentri Indro Montanelli al scriveve che: “… un popul che al dismentee il propi passât nol savarà mai nuie dal propi presint”.

    La storie no po dânus un program pal a vignî, ma e po dânus une plui profonde comprension di nô stes e de nestre comun umanitât, in maniere che o podìn miei frontâ il futûr. Inte societât dal consum dal dì di vuê, invezit, i ideâi si disfantin e la classe sorestante di vuê e je pluitost assent, lassant i zovins intai intrics di un presint vueit: cence passât e cence a vignî, no ’nd è identitât individuâl ni identitât coletive e nancje nol è pussibil un vivi civîl fondât su valôrs condividûts.

    Par fortune, secont il Circul dal Centri Diurni di Tumieç i ricuarts no van mai cancelâts: la memorie e à di custodî la clâf in maniere gjelose rindintju, se al è pussibil, olmis marcadis par simpri; par esempli, consegnantju ae scriture, a un libri - il secont in chest câs - che, dutun in chel, si presti ae difusion tal presint e al mantegni une sô durade tal futûr parcè che, cun dut il grant slargjâsi de presince dai gnûfs media , o viodìn che il libri al manten inmò une sô centralitât e une sô slargjade fasse di letôrs afezionâts, ancje di memoriis, miei inmò se leadis ae realtât locâl. Anzit, in chest moment di grande balfuerie psicologjiche, inteletuâl e civîl, o vin plui che mai bisugne di memoriis, par saldâ la nestre identitât a un passât sigûr, ancje se par tancj aspiets maluseriôs. La distance temporâl, par altri, e slontane il dolôr e e fâs vignî fûr i aspiets

dolçs e nostalgjics di un mont che inte sô puaretât e soference

al saveve mantignî aspiets di umane pietât e solidarietât, e la dolcece de zovinece. Cussì si po dî cun Euripide che “… cui che al trascure di imparâ in zovinece al piert il passât e al è muart pal a vignî”, e cun Seneca che “… une vore curte e insiliose e je la vite di chei che a dismentein il passât, trascurant il presint, a àn teme dal futûr: rivâts al moment ultin de lôr esistence, tart a comprendin di jessi stâts cjapâts intes voris par masse timp cence concludi nuie di sest”.

    Cemût che al scriveve Arthur Scopenhauer: “Viodude dai zovins, la vite e je un a vignî une vore lunc. Viodude dai vielis, un passât curt”: chest ultin aspiet lu comprendin soredut inte conte che e à come teme il limitâ de vite o, se o volìn, il soiâr de muart.  Parcè che, verementri, diviersis contis e poesiis a son ricjis di meditazions esistenziâls e di metaforis e analogjiis clupidis - confront cu la miserie dal presint - su la savietât dai anzians; sul scambi gjenerazionâl tra zovins e nonos; su anzians che a vuelin meti al lôr servizi la propie esperience; su la soledât dai vielis; su lis figuris di personaçs che a tignivin unide la comunitât cu la lôr fuarte personalitât, la lôr dedizions cence compromissions a la int dal propi paîs.

    Ma daprûf a dut chest e ven fûr, e nol podeve jessi diviers, la storie dal passât Nûfcent de Cjargne: la emigrazion intai siei aspiets aventurôs e tragjics sot l’aspiet sociâl, lis dôs Vueris Grandis, la Resistence, la invasion dai cosacs, la Republiche de Zone Libare, lis depuartazions intai cjamps di concentrament, il daspò vuere e il seguitîf svilup urbanistic e sociâl. Cun dôs tonalitâts prevalents di scriture: chê sclete e realistiche, cence piniis e cence lagrimis, dal vualmâ madûr; chê serie e partecipade ma un pôc inviulade e soredut puartade a prudelâ la sperance ancje inte tragjedie dal vualmâ zovanîl come, par esempli, chel tornâ a proponi in ambient cjargnel la vicende di Giulietta e Romeo.

    In sumis chest concors leterari rivât, come che o vin vût iniment denant trat ae VI edizion, cui siei dîs agns di vite al conte in maniere metaforiche une storie: la continuitât e la fedeltât ai propis ideâi dai associâts al Circul e la lôr cuotidiane, umane e sociâl opare di solidarietât e di socializazion e di bataie cuintri l’isolament e la soledât dai anzians. E chest nol è dabon pôc!

    Une ultime note la risiervin ae presince di tescj par furlan al concors. Une presince numerose e di cualitât co la edizion dal 2007 e je stade vinçude di Mario Linussio cu la conte “Un om di mistîr”, la edizion dal 2009 inmò vinçude di Linussio cu la conte “Scoltait”, mentri il secont puest lu à vuadagnât, simpri cuntune conte par furlan titulade “Gjovanin il Cjargnel”, Eugenia Monego Ceiner. Inte ultime edizion dal 2011 simpri Linussio e Monego Ceiner a àn vuadagnât il secont e il tierç puest. Di segnalâ, simpri par chel che al inten il furlan, lis poesiis di Guido Candido e une prose di Antoni Adami dedicade al personaç dal “Siôr Santul”, il storic e mai dismenteât plevan di Çurçuvint. (von zërclare) 

La XVI edizion dal concors “Glemone: îr, vuê e doman” a Jacum Vit

Glemone - La XVI edizion dal concors leterari “Glemone: îr, vuê e doman” le à vinçude il poete e scritôr Jacum Vit che al veve presentât un lavôr teatrâl, a teme libar, destinât ai fruts des scuelis titulât “Vûtu comprâ la vous di un rusignûl”. Il secont premi lu à vuadagnât invezit Francje Mainardis, il tierç premi in fin al è lât a Jacumine De Michelis.  Buine ancje la partecipazion intes dôs sezions riservadis aes scuelis. Inte tierce sezion il prin premi al è stât assegnât a un lavôr multimediâl presentât de scuele secondarie “A. Matiz” di Paluce. Inte seconde sezion il prin premi lu à impen ricevût la scuele primarie “G. Carducci” di Udin.

Ladins dal Friûl pag.8 - Zenâr 2013                                                                                                www.ladinsdalfriul.eu

SCRITÔRS  E  LIBRIS  IN  MARILENGHE

“Scritôrs e libris in marilenghe” intun libri

E je cussì vignude fûr une piçule antologjie de leterature furlane

    Il mês di Novembar stât, de stamparie Moro di Tumieç, al è vignût fûr il libri “Scritôrs e libris in marilenghe - Schedis di leterature furlane tiradis fûr da Ladins dal Friûl”. Si trate, cemût che al evidenzie il titul, di une racolte di articui tirâts fûr dal nestri sfuei tra il 2007 e il 2011. Par jessi plui precîs si trate de racolte des recensions dai libris furlans publicadis in cheste nestre ultime pagjine. Il risultât al è stât un libri di 127 pagjinis dulà che si po cjatâ une sorte di piçule antologjie de leterature furlane. La testemoneance di chest nus ven dade dai autôrs presints inte racolte: Renzo Balzan (Edelweiß), Antoni Beline, Ane Bombig (Ane di Fare), Novella Cantarutti, Aurelio Cantoni (Lelo Cjanton), Alessandro Carrozzo, Gianfranco D’Aronco, Lucina Dorigo, Giorgio Faggin, Beno Fignon, Marie Forte, Gianni Gregoricchio, Roberto Iacovissi, Lenka Kalzova, Jolande Mazzon, Otmar Muzzolini (Meni Ucel), Sandro Naiaretti, Zuan Laurin Nardin, Zuan Nazzi Matalon, Gemma Nodale, Nadia Pauluzzo, Agnul Micjêl Pitane (Agnul di Spere), Carli Pup, Carlo Sgorlon, Marc Stolfo, Achil Telin, Zuan Urban, Lussie Vacchiano Sasso, Ide Vallerugo, Luzian Verone, Dino Virgili, Pierluigi Visintin e Domeni Zannier.

    In sumis une sorte di flôr de leterature furlane tra il passât Nûfcent e chest inizi di Vincjesim-prin secul. Un Nûfcent che al à contemplât un timp cetant ric pe leterature furlane sevi sot il profîl de cualitât sevi de cuantitât. Baste memoreâ che fra la Prime e la Seconde vuere grande si à vût un prin rinovament dal mût di fâ leterature par furlan, che si fasè concret a traviers lis oparis di autôrs come Ugo Pellis, Zuan Lurinçon e il nestri plui grant critic leterari, o sei Bindo Chiurlo (1866-1943), ae cui ispirazion poetiche si zontarin studis di estetiche, filologjie, leterature taliane e foreste e che si cjatarin adun inte Societât filologjiche furlane, nassude a Gurize tal 1919.

    Un gnûf rinovament si invià inmò juste in timp di vuere, soredut par mert dal gurizan Franzil de Gironcoli (1892-1979) che cu lis sôs “Elegie”, nus propon une poesie travanade di amarece. Une liriche virgjin, aristocratiche, no dialetâl, ma scuasit di divignince classiche. O sin tal 1944 e Pier Pauli Pasolini cuntun pôcs di zovins di Cjasarse, olmant la persistence inte nestre leterature di temis e di formis aromai vieris, al cjonçà ogni leam cul passât cirint di aplicâ al furlan lis esperiencis de “peraule-sun”. Vâl a dî che al intraviodè la misure che e podeve cuistâ la poesie furlane cul so adeguament aes corints contemporaniis e no dome talianis, mediant l’ûs des “ radrîs romanzis” de nestre lenghe e doprant la sô fuarce interne e la sô purece par tornâ a fâ sverdeâ la dibot aromai secjade plante de leterature. In sumis al esprimè une consapevul e vierte ribelion cuintri il tradizionalisim de leterature furlane, par esprimi inte nestre lenghe lis creis pussibilitâts di palesâ cun frescjece lis sutilis vibrazions che a metin adun il tiessût de liriche contemporanie, mediant zûcs ritmics, ategjaments stilistics, efiets fonics, essenzialitât espressive e gnûf lengaç poetic.

    Un altri grant personaç che intai agns dal daspò vuere al è stât un partidant dal rinovament de culture furlane che al puartà al metisi adun di une cussience nazionâl furlane, al fo Josef Marchet (1902-1966), autôr dal riscat de lenghe e de leterature furlanis cul fin di rindilis atuâls oltri che promotôr de unitât des feveladis furlanis a traviers une coinè. A lui i va ancje il mert di vê sostignût il metisi adun dal moviment leterari di “Risultive”, fondât tal 1949 dai poetis Novele Cjantarute, Lelo Cjanton e Dino Virgili. Cheste associazion e contribuì cetant al afermâsi de zovine poesie furlane intai agns Cincuante, ae cuâl si zontarin Alan Brusin, Marie Forte, Otmar Muzzolini, Riedo Pup, Jolade Mazzon e Albert Picotti. La riviste di studis romançs “Il Tesaur” e vignì invezit inviade di Zuanfranc D’Aronco tal 1957 e e viodè la adesion di Nadia Pauluzzo e di Francescje Barnaba. Seneôs di rinovament, ma colegâts cu la miôr tradizion popolâr furlane, i poetis di chescj doi moviments leteraris a verin il mert di dimostrâ cemût che il furlan a podès esprimisi in formis modernis purpûr restant leât ae tradizion.

    Domeni Zannier, Galliano Zoff e Mario Argante a fondarin invezit la “Scuele Libare Furlane”, e po il manifest progjet culturâl de “La Cjarande” tal 1966, dal titul di une cetant interessant antologjie poetiche. In fin tocje ricuardâ Agnul M. Pitane, che tal 1982 al fondà la “Union Scritôrs Furlans” cu la adesion di Renzo Balzan, Zuan Marie Basso, Antoni Beline, Ovidi Colussi, Duili Corgnali, Mario De Apollonia, Zuan Frau, Celso Macor, ZuanCarli Menis, Zuan Nazzi Matalon, Albert Picotti, Riedo Pup, Nin Rodaro, Luzie Sasso, Raimont di Strassolt e Enio Totis. La smire de Union e jere chê di doprâ la lenghe furlane sedi tal cjamp leterari sedi tal cjamp dai mieç di informazion. Cheste progjet al à cjatât il so supuart inte publicazion de riviste “Gnovis Pagjinis Furlanis”, che e ven buride fûr inmò in dì di vuê.

    Il rest de storie leterarie de nestre lenghe la cjatìn juste apont testemoneade intes pagjinis dal libri che o vin vût iniment denant trat, o sei “Scritôrs e libris in marilenghe”. Tocje ancje sotliniâ il fat che une grande floridure leterarie furlane di ogni gjenar (poesie, prose, teatri, traduzions) si la ve daspò il taramot dal 1976, come une prionte de cjapade di cussience de impuartance di difindi lis propiis radrîs etnichis e culturâls daspò che il disastri naturâl al veve fat pierdi personis e cjasis, mudât il paisaç, comprometût il tiessût sociâl e l’implant coletîf di concezions, tradizions, crodincis. Chest risvei leterari al puartà a un aument de produzion dai libris in ogni cjamp, des poesiis, ai romançs, des oparis pal teatri ai saçs di gnûfs autôrs, e inmò ae ristampe dai classics, di vocabolaris, gramatichis, racoltis di proverbis, di oparis sul cont des tradizions e dal costum.  

La schede: R. Balzan-Edelweiß (par cure di), Scritôrs e libris in marilenghe - Schedis di leterature furlane tiradis fûr di “Ladins dal Friûl”, Ed. CjargneCulture, Tumieç 2012, pagjinis 127 .

Ladins dal Friûl / Diretôr  responsabil : Renzo  Balzan -  Reg. Tribunâl  di  Tumieç  n. 123  dai 09.03.98

Redazion : 33028  Tierç di Tumieç - V. Dandolo16 / tel. 0433/43696 / e-mail : ladinsdalfriul@gmail.com

F.I.P. (fotocopiât in propi) a Tierç di Tumieç (Ud) V. Dandolo 12 pes Edizions “Union Scritôrs Furlans”

La  publicazion e ven spedide es Bibliotechis dal Friûl, es Istituzions Culturâls Ladinis des provinciis di  Bolsan, Trent e Belun, e a ducj chei che a mandin la lôr libare contribuzion doprant il C.C. bancjari nr.19162 dal “Banco di Brescia”   (Filiâl  di  Tumieç) - codiç  IBAN: IT50H 03500 64320 0000000 19162

Chest  gjornâl  inte sô version on-line su  Internet  al ven fûr  sul sît : www.ladinsdalfriul.eu

Realizât  cul  sostegn  finanziari de Provincie di Udin (L.R. 24/2006 art.26)