Anade ( XVIII ) n.12 Dicembar 2015

Periodic-mensîl di informazion e culture sul cont de minorance celtiche

dai Ladins de Furlanie. Edizion par cure de associazion “Union Scritôrs Furlans”

CoopCa ultin at: Nadâl amâr pe Cjargne

Dopo 109 agns la viere Cooperative e siere la sô ativitât

    Ai 29 di Avrîl dal 1906, inte sale sociâl, a Vile Santine, al ven sot scrit l’at di fondazion de “Societât Anonime di Consum Cjargnele”. Al ven firmât dal avocat Riccardo Spinotti, po elezût president, dal gjeometre Vittorio Cella, prin diretôr e di altris personaçs significants de cooperazion e dal socialisim cjargnel. La sede e sarà logade tal palaç dal ex albierc dal “Leon d’Oro” di Tumieç. Si da vite, in fin, a “La Voce della Cooperazione”, imprest di stampe uficiâl de presince cooperative in Cjargne.

     Ai 26 di Zenâr dal 1907 si vierç la filiâl di Davâr, ai 6 di Fevrâr chê di Damâr e chê di Dimpeç, ai 6 di Jugn chê di Denemonç. Po, un pôc a la volte lis buteghis-filiâls de Cooperative a saran presint su dut il teritori cjargnel, ancje intes frazions plui piçulis dai comuns.

     Superadis lis travaiadis vicendis dal fassisim e di dôs tragjichis vueris mondiâls che tancj corots e tantis distruzions a vevin puartât in dute la Cjargne, la Cooperative e veve savût rinovâsi e adatâsi ai gnûf cambiament realizant une plui moderne e eficient organizazion aziendâl, purpûr mantignint in vite lis sôs tradizionâls buteghis di paîs e zontant inmò plui grancj e modernis pont di vendite, fint a slargjâsi e a lâ a vierzi gnûfs supermarcjâts in dute la regjon e fintremai in Venit. In sumis une vere e propie istituzion pe economie de nestre mont, sedi sul plan economic e sociâl, sedi ocupazionâl co e je rivade a dâ lavôr a 650 dipendents. In fats ai 31 di Dicembar dal 2013 la CoopCa e veve realizât un faturât 106 milions cun 12 ponts vendite in provincie di Udin, 6 a Pordenon, un a Triest, doi a Padue, 7 a Trevîs, 4 a Vignesie e 3 a Vicence. I socis a jerin 10 mil 309, chei che a possedin un libret di dipuesit dibot mil par une sume complessive racuelte di circje 30 milions.

     Dut chest al à funzionât fintremai a an passât, po dut al à scomençât a lâ denant daûr. Come chel al fos stât nome un ordenari cjistiel di cjarte dut si è intorteât e al à scomençât a sdrumâsi. Cussì ai 15 di Novembar di an passât la direzion e je stade obleade a domandâ al tribunâl di Udin la procedure dal concuardât preventîf. Concuardât confermât in maniere definitive ai 29 di Otubar stât dal judiç Lorenzo Massarelli dal tribunâl di Triest, dant cussì la pussibilitât al comissari judiziâl, Fabiola Beltramini, di meti in vore il plan di vendite dai rams vitâi de cooperative par podê rifondi dal tant che a àn pierdût i creditôrs.

     Intant a son zornadis delicadis co ai 31 di Dicembar la CoopCa e cessarà di esisti. Ai 25 di Novembar, alì dal nodâr Lucia Peresson a Udin, a son stadis viertis lis bustis des astis pe vendite dai supermarcjâts. Chei logâts intes zonis plui interessantis a son prenotâts da grups come Coop Nordest, Despar, Discout, Conad e Alì. Si trate dai ponts di vendite di Tumieç, Rivignan, Tarcint, Maian, Feagne,

Prissinins, Brugnere, Pordenon, Tarvis, Sacîl, Spilimberc, Mestre, Villorba, Cittadella, Codroip, Limena (Padue) e Marcon (Vignesie). A chest pont al è ancje di viodi trops dipendents che a tornaran a jessi cjolts sù a vore dai gnûf parons, e trops di lôr che a restaran cence lavôr par vie che i ponts vendite cul prin di Zenâr a restaran sierâts. Al reste po il probleme dal Cedi, il grant centri logjistic di Damâr, une des ultimis sieltis sbaliadis de Cooperative. Sul fabricât al esist un mutui de Bancje di Cividât par 10,8 milions di euros. Rivâ a vendilu o a fitâlu e je deventade une imprese cetant complicade e dificil.

     In fin il pinsîr no po no lâ ai dipents, al fat che daspò vê lavorât simpri cun grande passion e grant impegn si cjatin cumò intune sorte di limbo, tra la sperance di podê tornâ a vê un puest di vore, e la cruzie di lâ a finîle in casse integrazion, che par altri ju cuvierzarà dome fintremai al mês di Avrîl cu ven. Nadâl amâr pe Cjargne, pe fin cussì malacuarte di une istituzion che e à segnât la sô storie. Bon Nadâl a ducj istès, ma cul marum dentri. (tarvos)

Bon Nadâl / Bun Nadél / Buon Natale

Fröhliche Weihnachten / Vesel Božič

Ladins dal Friûl pag.2 – Dicembar 2015

DAL TIMÂF A LA LIVENCE

Salvìn la nestre civiltât tal non di Marc di Davian

Dopo il macili di Parìs no ’nd è spazis par tolerancis di sorte

     Za fa un pôcs di agns, forsit vot, forsit dîs, cumò no mi impensi ben. Ce che mi impensi ben invezit al è che lant sù pe Tresemane, di Mulin Gnûf viers Tresesin, sul mûr di un dai tancj capanons che la compagnin fûr par fûr e jere comparide la scrite “L’islam vincerà”. Chel sproc mi veve fat impression e no lu ai plui dismenteât, pensant ancje a dut ce che al è sucedût dopo. Pesant a ce che al è sucedût vinars stât, 13 di Novembar a Parìs. Plui di cent e trente muarts, un maçalizi fûr dal vade.

     E je la tierce vuere mondiâl, al diseve za fa un an il pape Francesc. Une vuere che nus è jentrade in cjase, a dute gnot, inte maniere plui orende. Combatude di zovins teroriscj che a àn studiât intes nestris scuelis e universitâts, che a son stât acolzûts cuant che a scjapavin cui barcjons a Lampeduda o a Lesbo scjampâts de Sirie e de Libie in flamis. A copin e a son pronts a murî. Parcè che no àn nuie di pierdi, e a pensin che il mâl, la miserie e il dolôr cul cuâl a convivin a sedin nome colpe dal Ocident.

      L’atac ae redazion di “Charlie Hebdo”, propi a pôcs pas tal teatri dal macili di vinars 13, forsit prime prove gjenerâl di ce che al sarès sucedût dîs mês dopo, al veve pûr simpri il stamp di un at rabiôs condusût di un scjap di teroriscj rindûts a lavâ cul sanc une ofese a Allah. Chest invezit al po sei considerât a ducj i efiets un secont 11 di Setembar studiât e preparât cun ducj i detais. Epûr istès diviers di chel at di gjeometriche potence, dramatic e spetacolâr, che si è palesât cul atac dai avions su lis Twin Towers di New York tal 2001.

   Se alì i pilots kamikaze a lavin a sdrumâ i simbui di veri e ciment de fuarce dal capitalisim american, inte capitâl economiche dal marimont, achì i zovins teroriscj a àn atacât i lûcs simbul no dome dal podê ocidentâl, ma de nestre vite ordenarie di ogni dì e des nestris presumudis sigurecis, cjossis bandidis inte vision fondamentaliste dai pasdaran de jiahd. E po la Bastilie, pont di riferiment pe declarazion dai dirits di fonde dal om, inte France de “Liberté, egalité, fraternité”, concets metûts in discussion a colps di bombis e di kalashnikov, e logade vuê za di sîs milions di fedêi a Allah tra i cuâi al è sigûr che il Stât Islamic dal calif Al Baghdadi al cirarà gnûf militants e partesans par puartâ indenant il so delirant disen di violence e di terôr.

     Ae sfide dal “L’islam vincerà”, al è rivât dabon il moment di dî baste. Se si vûl e se si è unîts l’islam nol vinçarà gran, come che nol vinçût sot lis muris di Viene tal 1683, cuant che i musulmans turcs a son stâts batûts e mandâts indaûr, ancje graziis a un personaç furlan che al è restât inte storie e inte memorie, o sei il frari Pari Marc di Davian. Ancje in chê volte e jere stade in pericul la nestre civiltât, e se fos colade Viene l’islam turc si sarès po slargjât e al varès ocupât dut il centri Europe. Ma cussì no je lade, e Marc di Davin al è stât un dai principâi protagoniscj di chê grande vitorie.

     Pari Marc Cristofori, nassût a Davian tal 1631 e muart a Viene tal 1699, dilunc la sô mission di predicjadôr al traviersà la Europe de France ae Slavuachie, pandint la peraule di Diu e vuarint la int. Al ve contats e rapuarts cui maiorents religjôs e civîi dal so timp, ma in particolâr al fo leât a bons. Zuan Delfino, patriarcje di Aquilee dal 1659 al 1699.

     La sô innomine di om sant e jere cussì slargjade che al deventà scoltât conseîr dal Imperadôr Liopolt I de Austrie. Par ben disenûf voltis, juste apont, il frari al le ae cort di Viene e intes letaris che si son podudis conservâ e reste la documentazion che i siei conseis a levin des cuestions di famee a chês civîls, militârs e religjosis, che a cjatarin la fate di sei disberdeadis graciis al contribût dal om furlan. Dal rest la preocupazion maiôr di Pari Marc e fo chê di vuaiâ lis disconcuardiis tra i maiorents sevi catolics che protestants e di promovi azions che a zovassin ae cause de cristianitât.

     Si sa che Pari Marc al ve relazions cul re di Polonie Zuan III Sobieski che al sburtà a diliberâ Viene dal assedi dai turcs, cemût che si ven a savê dal rapuart segret al segretari di Stât, gardenâl Cybo, dulà che il davianês al scriveve: “Dôs voltis o bonai il re di Polonie sustât par cetantis causis rivant a convincilu a diliberâ Viene, che si ve in maniere gloriose cul jutori divin”.(La capitâl dal Imperi e fo diliberade ai 15 di Setembar dal 1683).

     Ancje a Vignesie la presince di Pari Marc e fo impuartante. Cemût che al scrîf von Pastor inte sô “Storie dai Papis”: “...dilunc la cuaresime dal 1684, il ferbint Pari Marc al rivà a convinci i senatôrs venits a firmâ la aleance cul Imperi asburgjic e la Polonie par diliberâ lis cuestis adriatichis di chei che a puartavin vie ogni an in sclavitût tancj puars inocents”.

      Dal istès agrât i son debitôrs i ongjarês di fat Pari Marc, delegât dal pape cun plens podês spirituâi, daspò dal doi di Setembar dal 1686 al jentrà a Buda puartant une statue de Madone che al le a logâle tal Domo, bielzà savoltât e profanât par fâlu deventâ une moschee.

    Carli V di Lorene, comandant dal esercit imperiâl e governadôr dal Tirôl, lu volè dispès dongje, par curâ il ben spirituâl e materiâl dai soldâts. Pari Marc di fat al funzionave la messe e al invidave ae devozion pe Madone, fasint cjantâ lis litaniis dilunc lis marcis. Ma la sô plui grande brame e jere chê che ducj i popui a vivessin in pâs e in armonie intes lôr tieris e che i turcs si convertissin.

     In sumis un om, cemût che lui stes al ve mût di confessâ al imperadôr “che nol cirive mai i plasês di cheste tiere, ma nome vantaçs pe cristianitât”. Un model che pe capacitât di dialic e di viertidure al reste valit inmò in dì di vuê.

     Ultime riflession: dopo dut ce che al è sucedût e al sta sucedint al è di domandâsi se al è just che chenti, a Udin e in Friûl si vadi dilunc a dâ permès par vierzi inmò gnovis moscheis? Bon Nadâl cristian a ducj voaltris e aes vuestris fameis. (renzo balzan)

Ladins dal Friûl pag.3 – Dicembar 2015

CRONICHIS DI CHENTI

Plodn in Friaul / Sapade in Friûl

E va dilunc la liende infinide di cheste imberdeade vicende

Sapade/Plodn – E va dilunc la liende infinide e imberdeade dal passaç di Sapade/Plodn de Regjon Venit ae Regjon Friûl-VJ. Ae fin dal mês di Otubar stât, a Rome, intun ordin dal dì de V Comission Belanç dal Senât, in fats, e je stade metude dentri la comunicazion al Comun di Sapade di un parê favorevul condizionât graziis al cuâl e vignarès confermade la pussibilitât dal cambi di regjon, puartade indenant cu lis propuestis di leç 591 e 1082. “Trasferiment che al compuartarès une cuvierzidure finanziarie di 500 mil euros”, e à sclarît Silvana Comaroli, senatore de Leghe e segretarie de Comission Belanç. La sume in cuestion e varès di sei stabilide a traviers un sub-emendament, cjapant la dade dai tescj che a son stât presentâts alì de 1 Comission Afârs costituzionâi e che a spietin di jessi discutûts. Al moment l’emendament di riferiment al è chel dai 22 di Otubar de senatore Patrizia Bisinella (Misto) e che si cuantifiche in 705 mil euros, po sbassât a 500 mil euros cu lis detrazions. Tornant al parê, chest, al podarès paidî, par colpe dal tire e mole sul belanç, un gnûf spostament. Dut câs la cjosse plui intrigose, o sei la presentazion di une relazion tecniche de bande dal Mef e la valutazion de cuvierzidure finanziarie e je stade, al semearès, superade. In sumis un berdei e une rieste di complicazions di fâ vignî l’inzirli.

     I lavôr de Comission Afârs costituzionâi no son stâts inmò metûts in calendari, ma l’iter al semearès clâr: frontade la cuestion dai sub-emendaments, si passe ae votazion parcè che al puedi jessi promovût a sede legjislative, sparagnant cussì un altri, pericolôs e inciert, passaç in Aule. A chel pont il test al rivarà ae Cjamare dulà che l’iter legjislatîf al tornarà a partî. Un mecanisim dabon fûr dal vade, une trame che cu la democrazie no centre piç. E je vere che, a chest pont, no varessin di tornâ a saltâ fûr stravuelziments al test, ma istès plui di cualchi dubi almancul sui timps al reste, juste in reson di ce che al è sucedût fintremai cumò.

     Intant a Sapade, pe prime volte, il “Comitât pal passaç al Friûl” nol à, justementri, buridis fûr declarazions vint miei spietâ cemût che si laran imbastin lis cjossis. Une sielte che e diven di une spiete infinide (il referendum si è davuelt tal 2008), e ancje di tantis delusions pe mancjance di un sostegn sclet e ferbint de bande, almancul, dai senatôrs e dai deputâts elezûts in Friûl-V.J. Cence meti tal cont il compuartament sclagn des Zontis Tondo, prin, e Serrachiani cumò, che no si son mai rotis li citis plui di chel tant par cheste fondamentâl cuestion.

     Plodn in Friaul / Sapade in Friûl: la bataie e continue e no bisugne molâ! (mateu di prun)

____________________________________________________________________________________________________________

Automotive: 80 gnûfs puescj di vore a Tumieç

Un jutori fondamentâl pe ocupazion de mont furlane

Tumieç – O vin titulât tal editoriâl di prime pagjine: “Nadâl amâr pe Cjargne”, par vie de vicende de CoopCa, dulà che si riscje di pierdi cetancj puescj di lavôr ae fin di chest 2015. Par fortune sul cont dai puescj di lavôr in Cjargne a ’nd è vignude fûr di resint ancje cualchi novitât positive. Si trate inmò de Automotive di Tumieç che e continue a ingrandîsi.

     La plui grande aziende che il grup Fiat al à chenti si prepare in fats a cjoli sù a vore altris 80 dipendents. La produzion e je in incressite al pont di ricedi a Automotive gnûfs impuartants investiments in machinaris e la costruzion di un sît produtîf logât dongje di chel che al è cumò operatîf. La costruzion dal gnûf cuarp di fabriche e sarà gjestide dal Consorzi Cosit che al contribuirà ae spese complessive di 8,5 milions di euros cun 2,5 milions, mentri 6 milions ju metarà la Regjon.

      In cheste maniere Automotive si lee inmò di plui ae realtât de Cjargne dulà che vuê e da za lavôr a 750 dipendents che a deventaran in curt 830. Mil par altri se po si contin ancje i contrats di lavôr a timp determinât e chei dâts fûr di apalt a aziendis artesanis. Une fortune di chescj timps pe mont furlane co i operaris a divegnin, oltri che di Tumieç e dai contors, ancje de Val Cjanâl, dal Cjanâl dal Fier, des valadis de Cjargne disore e fintremai di Vençon e de zone di Glemone.

    I gnûfs investiments che la imprese de holding Fiat (e fâs part dal grup Magneti Marelli) si prepare a realizâ a puartaran, cemût che si à vût iniment denant trat, ae costruzion di un gnûf capanon. Graziis ae gnove linie si produsaran ancje schedis eletronichis pai fanâi des machinis. A Tumieç par altri si indi produsin bielzà par marcjis come Porsche, Audi, Bmw, Mercedes e Jeep dome par vê iniment cualchi cjase automobilistiche che si furnìs alì di Automotive par realizâ aparâts di iluminazion simpri plui tecnologjics. Vêrs e propis zoiei che la aziende e prodûs pratichementri cence mai fermâ la produzion.

     Il 2016 si anunzie aduncje un an impuartant par Automotive, propi parcè che e sta puartant sul marcjât prodots simpri plui tecnologjics e di alte cualitât, graziis juste apont ai gnûf investiments.

(mdp)

Ladins dal Friûl pag.4 – Dicembar 2015

DOCUMENTS

La Universitât no po sei doprade dai partîts!

Nol po sei tradît il spirt di Petracco e di 125 mil furlans

     La Universitât dal Friûl no po sei doprade dai partîts! Ce che al à fat il retôr Alberto De Toni il mês di Otubar stât nol po sei acetât! Il nestri ateneu no je une torte di spartî! Se e je cheste la propueste dal retôr par recuperâ credit dopo vê dât ospitalitât a une fieste-cunvigne dal Partît democratic, al fâs un erôr. Il so sproc al varès invezit di jessi “fûr i partîts de Universitât”, parcè che al è chest che a disin la tradizion, il Statût, il Codiç etic e il Dissiplinâr dal ateneu furlan.

     La nestre Universitât, nassude par volontât popolâr, cuintri la resistence dai partîts, par volontât condurant di personaçs come Tarcîs Petracco e dal so “Comitât pe Universitât Furlane”, che tra lis tendis e lis barachis dal dopo taramot dal 1976 al jere rivât a racuei 125 mil firmis di sostegn par une leç di iniziative popolâr che e des ai furlans une Universitât libare e autonome, pe lôr incressite economiche, sociâl e culturâl, e merte dabon plui rispiet. Ma soredut e merte che e no vegni lassade colâ in dismentie la memorie storiche di chei fats, di chês batais, di chê biele “vitorie storiche” dal popul furlan sui partîts sotans dai interès di Triest. Îr tant che vuê... magari cussì no!

Sun chest argoment o publichin un intervent cetant interessant di Paolo Medeossi, vignût fûr sul “Messaggero Veneto” dai 29 di Otubar. Il test origjinâl al è stât voltât par furlan par cure de redazion. (red.)

     La citât dai avocats e je deventade la citât dai retôrs, anzit dai Magnifics retôrs, secont la usance taliane che e da cheste innomine a cui che al guide une universitât e che forsit e diven storichementri da “Lorenzo il Magnifico”. Une volte cui che al voleve aministrâ Udin al veve di vê une lauree in jurisprudence (Cosattini, Centazzo, Candolini, Zanfagnini, Barazza), cumò la ribalte politiche e viôt a diviers titul protagoniscj cui chel al possêt i titui academics. Un tant a dimostrazion che la universitât e je deventade essenziâl pal andament culturâl, economic e sociâl di Udin.

Nol è pensabil imagjinâ une citât cence 700 tra docents e ricercjadôrs, i centenârs di dipendents e i 15 mil students. A àn cjapat la volte intai agns al vueit che si è viert cu la sierade des casermis, ma cuntun pês specific in tiermins di vitalitât de citât cetant superiôr. Aduncje al jere inevitabil che tra istituzion universitarie e ents di Udin si vignìs a creâ une osmosi, tant plui intun timp come chest di fuart fuscament (par doprâ une formule soft) che si sta verificant tal mont de politiche locâl. Sparîts i vieris grup partitics, lâts a mont i maiorents che a vevin carisme, si è creât un sfondaron dulà che si son vinturâts i professôrs che, rivâts di altris regjons, a àn cuistât innomine publiche aes sorestancis des principâls istituzions culturâls furlanis. Fase cheste lade indenant par grâts e che, no a câs, e à seguît la parabule de politiche di chenti. Al sarès stât fûr dal vade viodi un retôr tant che sindic o president de Provincie intai agns Otante cuant che a jerin in siele Biasutti, Comelli, Candolini, Bressani, Santuz, Toros tant par ve iniment i democristians e cence comprendi il rest dal centri-çampe e de oposizion. E in fats i retôrs a jerin i Servadei, i Bonsembiante, i Giusmani, i Frilli, studiôs e docents che no lassavin lis aulis par abraçâ carieris di divierse nature.

Po dut al è cambiât. Tal 1992 al devente retôr Marzi di Strassolt, personalitât di precisis convinzions furlanis, che dai nûf agns passâts a palaç Florio al cjape il slanç pe sucessive cariere ae guide de Provincie fint al patatrac de vicende dal vôt di scambi che lu obleà aes dimissions tal 2007. Al fo lui dut câs a vierzi la strade e a fâ capî che il passaç dal retorât fint a palaç D’Aronco (Comun), palaç Antonini (Provincie) o cualchi altre sede publiche al jere pussibil e anzit logjic ai timps di cumò. Il câs di sigûr plui clamorôs, cu la conferme che la arie e jere cambiade, al rivà cu lis votazions comunâls dal 2008 cuant che Furio Hossel al batè Enzo Cainero, proponût dal centri-diestre come simbul fuart in tiermins di furlanetât (alpins, balon, Zîr di Italie, e mil altri iniziativis...).

    Epûr inte bataie cuintri il matematic, popolâr muse televisive graziis a Fazio, al scugnì socombi a conferme che la citât e cirive tal ateneu ce che la societât civîl no garantive plui. Emblematiche e je ancje la vicende de professoresse Cristiana Compagno che e cjapà il puest di Honsell e che al tiermin di cinc agns di retorât cumò e je president di Mediocredito.

    E o rivìn cussì ai nestris dîs e al retôr Alberto Felice De Toni, finît tal berdei de polemiche dopo vê dâ ospitalitât intune sede dal ateneu a une fieste dal Pd. Fat che, al di là dai judizis e des critichis, al da di viodi une cjosse, o sei che il “rodagjo” tal flirt fra politiche e universitât nol è finît, se no no si displearessin lis malacuartecis, i erôrs, lis ingjenuitâts. Di Strassolt, il plui dotât in tiermins furlans, si è dite, mentri il timp di sindic di Honsell nol semee une spassizade, al di là dai timps dificii che o stin vivint.

     Si à la sensazion che il rapuart tra sindic e citât al sedi distant e frêt, pôc o nuie al è cambiât di cuant che tal 2008 a vignirin fûr lis primis incomprensions. Ancje la vicende dulà che si è imberdeât De Toni e da di viodi che la politiche e je materie di doprâ cun atenzion e cognizion di cause, jessint di dute altre nature il comant dal ateneu e il model di podê che al conferìs.

     In fin al va ricuardât un detai impuartant. Se in Friûl a ’nd è une cjosse nassude fûr de volontât dai partîts cheste e je propite la universitât. Ogni retôr al dovarès cognossi la storie de istituzion che al guide. A ’nd è tancj libris sun chest cont. Volint vê iniment un non tra tancj, al ven fûr chel dal professôr Tarcîs Petracco, president dal Comitât pe universitât. Nol jere un anti-politic, ma une persone di bon sens. In lui a croderin 125 mil furlans e la Glesie, uniche a metisi de lôr bande, puartant indenant la richieste dopo il taramot dal ’76, cuant che finalmentri la politiche e scomençà a movisi sun chest cont. Chest nol vûl dî che la politiche e vadi escludude de universitât, parcè che lis sôs sieltis a son fondamentâls, ma cuant che al covente e à di savê intervignî cun rispiet ancje formâl des regulis e cul spirt dimostrât di Petracco. (paolo medeossi)

Ladins dal Friûl pag.5 – Dicembar 2015

JOSEF MARCHET: I GRANCJ OMS DAL FRIÛL

Domeni di Tumieç : soremestri intaiadôr

Al è stât il massim rapresentant di cheste forme di art in Friûl

     Tal mês di Fevrâr dal 1462 un peliçâr tumiezin, Cjadùs Mion, al mandave il propi fi Domeni alì de buteghe dal mestri Zuan di France, pitôr che al logave a Udin, parcè che i insegnàs la sô art: che si obleave a tignîlu cun lui par sîs agns dantji di mangjâ e di durmî e a insegnai il garzonât. Chest Domeni al deventarà capo scuele di une sorte di dinastie di pitôrs intaiadôrs che a lassaran une olme significant fintremai tal secul XVIII.

     Chel pôc di lui che a àn dite fint cumò i critics, nol è dabon masse persuasîf. Il Joppi, forsit cjapant par base i pôcs dâts biografics presints intai documents, lu fâs nassi ator al 1448. E nol è lontan dal vêr; ma al regjistre ancje la notizie di un contrast vignût fûr tal 1445 par vie di une ancore di altâr realizade dal Mion, cuntune evident mancjance di coerence tra lis des dôs datis. Plui probabil al è invezit che la opare e sedi stade realizade dal so mestri. Dal Zuan Francione, o di France, o savìn che al piturà a S. Denêl, a Pordenon e a Udin, tra il 1449 e il 1467 e che, murint, al lassà ancje cualchi lavôr di intai. Il non al fasarès pensâ a une origjine francese, dut câs so pari, che al veve fat il barbîr a Fane, al fâs imagjinâ impen a une divignince no imediade. Pitôr e intaiadôr, partant, cemût che a jerin soredut i artiscj furlans di chel timp, di buine valence, sul model dai todescs. Tancj di chescj ultins, in fats, a risultin atîfs in Friûl dilunc il secul XV: Pieri di Alemagne (1438), Stiefin Sietcjistiei (1448), Zorç di Perschon o di Salzburg (1446), Lenart di Bavarie (1464), Lenart Thanner (1465), Albert Teutonic (1467), Zuan Todesc (1547), ’Sualt di Neumarkt (1504). Oltri a chestis presincis o vin ancje un pocjis di oparis anonimis che si cjatin a Glemone, a Vençon e a Mediis, che a palesin la man di artiscj di di là des monts.

     In cheste clime, simpri travanade di tradizion e di guscj gotics, a pene smavîts de clime cismontane, si formà il nestri Tumiezin. I presumûts contants cul Mantegna o cul Viviani, a son fantasiis di critics preocupâts, - cui sa parcè? - di colegâlu cu lis corints artistichis talianis. Verementri i dâts tirâts fûr dal Joppi des cjartis di archivi a podaressin indicâ che par une dade di timp il Tumiezin al sedi lât vie dal Friûl: in fats, a pene finît il garzonât, tal 1469, si maridà a Udin e al le a logâ inte cjase de femine in Borc di Glemone, e in chest timp no si cjatin regjistrâts par cualchi an notis di siei lavôrs. Al risulte dome che tal 1467 al tornà a metisi a piturâ, inte glesie di S. Zorç di Domegge tal Cumieli, ciertis pituris za scomençadis e po fermadis par vie di contrascj tra i cometidôrs. Aduncje che il Mion, intai agns daûr dal so maridaç al sedi stât in cualchi citât dal Venit nol po sei escludût, come che al è probabil che al ves bielzà cun lui dai colaboradôr e dissepui.

      Dut câs la ativitât plui impuartante dal Tumiezin e fo cence altri chê dal intaiadôr: il gust locâl, dal sigûr condizionât de tradizion todescje, al jere orientât viers cheste forme di art, dulà che inte daprûf Carintie e tal Tirôl, Michêl Pacher cu la scuele di Vilac e cun altris, a continuavin a produsi oparis di cetant alt nivel. Nus restin di lui i politics intaiâts a S. Pieri di Zui (1481), e di S. Florean di Dieç (1497), ricuardâts intai ats dal archivi e in chel parochiâl di For di Sore; une Madone cul Bambin inte glesie di Dilignidis dongje Soclêf e une anconute cun trê statuis lade a finîle a Filaccio, venti jù tal Lazio. I vegnin tribuîts ancje une ancone presint inte plêf di Divilin, une za presint inte Galarie de Academie di Vignesie, e je stade di resint traspuartade a Ca d’Oro e une plui modeste inte glesie di Tierç di Tumieç, ma in chest ultin câs si trate probabilmentri di lavôrs di buteghe. E chest al po valê ancje pal altâr de glesie di S. Michêl a Cjarpenêt.

     Un pocjis des sôs oparis a saran dal sigûr stadis distrutis dai Turcs, soredut inte ultime plui disastrose scorsade dal 1499. Chês che si son salvadis a son scuasit dutis in Cjargne dulà che i Turcs no rivarin. Altris po a son stadis fatis disparîs dai marcjadants venezians e triestins, altris inmò a son stadis robadis intai agns plui resints, come a S. Pieri di Zui. Intai libris des voris relatîfs al Mion a son ricuardâts no mancul di cuindis altârs politics intaiâts e dorâts e ancje tancj a son i documents dai cuai si rigjave cun avonde sigurece se si tratave di oparis di sculture o dome di piture. Il Mion al veve la sô buteghe a Udin in borc di S. Cristoful e dut al fâs crodi che e fos une vore frecuentade. Cun lui al lavorà il fradi Martin e al imparà il mistîr il fi Zuan, e po Piligrin di S. Denêl, e altris inmò che si trasmeterin la profession, ma che par altri no ereditarin la sô grande gjenialitât.

   Come intaiadôr, Domeni di Tumieç si palese inte stesse misure in debit e indipendent des corints rinassimentâls talianis e des tardis-gotichis todescjis. Al met in rieste inmò i siei sants, ma no tirâts adun in sens convenzionâl. Ju propon scuasit isolâts in se stes e cjapâts dome tal stâ a scoltâ lis preieris dai devots, come se ognidun al fos di bessôl sul altâr: esate rispueste ae psicologjie dai fedêi e rispietose de lôr angossade pietât, intune ete tant travaiade di scorsadis, invasions, violencis e epidemiis mortâls.

     Al compon i siei politics secont i schemis di oltri lis monts, ma nol met in vore la forme dal Flügealtar (altâr a sportei) cussì comun intes regjons todescjis a nô daprûf e dispès, in chê volte e ancje plui tart, domandâts des nestris glesiis di mont (indi restin esemplis impuartants a Pontebe, Prât di Cjargne, Povolâr, a Mediis, a Priûs, a Sauris di Sot e di Sore). Al adote par altri la tecniche todescje dal indorâ a bolo e de piture a tintis opachis.

    I sogjets tratâts plui di frecuent a jerin naturalmentri chei che i cometidôrs i domandavin: la Mari di Diu sentade cul Bambin sui zenoi; i sants che a travuardavin cuintri la gjandusse, o sei San Roc, San Bastian e San’Sualt; i sants vuerîrs, come San Maurizi, San Zorç, San Michêl; i sants plui popolârs dal Friûl: Lenart, Florean, Gotart e v. i.

      Domeni di Tumieç al è muart ai 13 di Novembar dal 1507. Al lassave a continuâ la sô tradizion artistiche il fradi Martin, il fi Zuan e il nevôt Zuan di Martin, che al fo purpûr cetant atîf e valent e che al insegnà chê art a fîs, nevôts e pronevôts. (Josef Machet – test tirât fûr da “Il Friuli: uomini e tempi”, ridusût e voltât par furlan par cure de redazion)

Ladins dal Friûl pag.6 – Dicembar 2015

DAI FATS E DE CULTURE

DES TIERIS LADINIS

La Stube: il cûr de cjase ladine

Intune publicazion si conte i particolârs dal “Fogolâr Ladin”

San Martin de Tor / St. Martin in Thurn (Bz) – Za fa cualchi mês, par cure dal “Museum Ladin” di San Martin de Tor in Val Badia e je stade buride fûr la publicazion “La stüa tla Val Badia / Die Stube im Gadertal / La Stube in Val Badia”, catalic de mostre realizade alì dal stes Museu.

     Inte culture ladine la Stube e je memorie de cjase e de famee e dal timp passât, e rapresente un lûc plen di calôr, che al trasmet protezion e sigurece e che si lee in maniere particolâr aes radrîs e ae famee. Di simpri inte Stube si cjatave adun la famee par preâ insiemit, par polsâ des fadiis dal lavôr e par stâ in ligrie. Dispès al jere l’unic ambient scjaldât dulà si stave daspò dal lavôr. La Stube e infuartive la union de famee, la vite sociâl e la armonie de comunitât. Il rivestiment in len, la stüa cul puint e lis bancjis, il crocifìs daûr de taule a son i elements tipics di ogni Stube. Ma al jere presint ancje un piçul altâr, furnît cuntune tavaie ricamade.

    La Stube al è il lûc che nus permet di scuvierzi, inte sô semplicitât, une grande ricjece culturâl e sociâl. La mostre proponude e la publicazion zontade a vuelin juste apont jessi une ocasion par cognossi plui di dongje cheste realtât e di aurî la bielece cun dute la sô struture.

     La ricercje par realizâ la mostre e je scomençade cu la documentazion fotografiche di cuarante Stube de Val Badie. Chestis a son stadis fotografadis di Alfred Erardi che cuntun voli atent al à savût cuistantti la essence. Fasint cont su chest materiâl, il dotôr Helmut Stampler al à metût ju i tescj sul svilup architetonic de Stube a partî di chês plui antighis dal secul XVI fint a chês plui resintis dal secul XIX, recuperant cussì une part impuartante de storie de Val Badie.

   Visitant chestis Stube a son divignudis diviersis domandis: di cuant l’orloi isal jentrât a fâ part dal aredament de Stube? Di cuant esistino i barcon cui veris? Cemût fasevino a iluminâ la Stube prime che e rivàs la corint eletriche? Par sclarî chescj e tancj altris dubis si è cirût il jutori di un dai maiôrs esperts in materie, o sei l’antropolic Emanuel Valentin che cu la sô ricercje al à metût in evidence che la maiôr part dai rituâi e rapresente une testemoneance de grande religjositât inlidrisade inte comunitât de Val Badie.

     I ogjets esponûts inte mostre e po fotografâts par jessi metûts dentri tal libri-catalic a jerin prestits dai parons des Stube che i curadôrs de mostre a àn visitât o di colezions de Val Badie. Mentri il design e la grafiche de mostre e de zontade publicazion a son stâts curâts dal studi grafic Misign (Andreas e Michael Moling). Cun dut che la Stude e sedi un ambient cussì travanât di storie e tradizion, massime inte architeture, a son stâts bogns di dantji une interpretazion frescje. La publicazion e vûl jessi cussì, fra l’altri, ancje une sburt par altri ricercjis in a vignî.

     Il tiermin Stube inte Ete di Mieç al indicave un ambient dulà che e viveve la famee, dulà che si tignivin riunions, o pûr un locâl di bagn. Ducj chescj lûcs a vevin in comun une carateristiche: la presince di une stue. Une diference fondamentâl la segnà la cussì clamade “aberdeutsche Stube” furnide di une stue che e vignive alimentade dal difûr. La stanzie di scjaldâ cence la presince di fum e fo secont Joachin Hähnel “une tra lis maiôrs inovazions de Ete di Mieç che si slargjà in curt in cetancj paîs de Europe centrâl”. Cundut achel il concet di Stube tant che lûc dulà che e viveve la famee no si svilupà intun contest rurâl contadin, ma ben invezit in ambients de siorie e borghês dai paîs todescs dal misdì dal arc alpin centrâl. Une tra lis primis testemoneancis tal Sud Tirôl e je la “stupa” documentade tal an 1194 in Eppan.

      Lis plui antighis presincis di Stube in cjasis contadinis dal Tirôl a van indaûr invezit al secul XV. Esemplis di particolâr rilêf si cjatin intai museus di Innusbruck, Bozen/Bolzan e Teodon; tantis a son inmò presints e a àn rapresentât fint a vuê il pont centrâl de vite sociâl de famee.

     La art de piture presint intes Stube contadinis e cognossè une significant evoluzion tal secul XIX graziis ae opare dai pitôrs viandants de Val di Fasse che ogni Istât, dilunc i lôr viaçs viers i paîs todescs, si fermavin ancje in Val Badie lassant la lôr testemoneance. O cjatìn cussì pituris di ornament sui panei des puartis, sui telârs dai barcons, sui cassets a mûr.

     La tradizion des Stube cun sufits e parêts rivistîts di len no vignì mancul no dome intes cjasis contadinis ma nancje intes ostariis dulà che si sviluparin scuasit intes stessis formis. Al fo il turisim, graziis al svilup de ferade des liniis dal Brenner e de Val Pusterie, a dâ maiôr impuartance a albiercs e ostariis. I locâi in stîl gotic antîc a Sterzing, Brixen, Bruneck a forin une vore preseâts dai viandants, di achì la idee di un pôcs di ustîrs di proponi gnovis Stube in chest stîl cetant di mode.

    Di passe cinccent agns in ca la Stube, cu la taule e la stue, e rapresente il cûr de cjase contadine de regjon dal Tirôl. Inmò vuê cheste stanzie al è un lûc impuartant di fieste e di corot, dulà che si lavore e si polse, un spazi che al cjape dentri la interie vite de famee che lu loghe. Il svilup storic de Stube al po dal sigûr furnî informazions interessantis, ma ce che al rint vîf e unic chest ambient cussì particolâr e je la storie di ogni sengule gjenerazions che alì e à vivût. (edelweiß)

Ladins dal Friûl pag.7 - Dicembar 2015

INTAI PRÂTS DE CULTURE FURLANE

Dalès e Voncèdas: l'ambient, il paîs, la vite

Intun libri i aspiets plui interessants dal paîs de Val dal Lât

Trasâgas – Al è jessût an passât (2014) de stamparie Designgraf di Basandiele il libri “Alesso e Oncedis: l’ambiente, il paese, la vita” (pagjinis 263), publicât par cure dal comun di Trasâgas e soredut dal “Centri di Documentazion sul Teritori e la Culture locâl”.

     Daspò lis pagjinis dedicadis intune altre publicazion ae storie e ai grups di famee, chest secont volum dedicât a Dalès e Voncèdas si ocupe in maniere particolâr dal ambient e di cemût che la int, intes etis, e sedi rivade a vivi doprant lis risorsis ambientâls.

     O vin cussì une prime part destinade ae ilustrazion dai aspiets relatîfs ae gjeologjie, ai aspiets de vegjetazion e dai animâi salvadis e une seconde e tierce part dulà che invezit al è l’om a jessi protagonist, a traviers la definizion di pratichis costrutivis (cul preseôs “recupar de memorie” di chel che a jerin la struture e la particolaritât architetoniche dal paîs denant dal taramot), il metisi adun di un ric patrimoni di tiermins toponomastics, di une particolâr specificitât linguistiche de varietât de lenghe furlane, a traviers il definîsi di une fevelade che, purpûr dibot avuâl a chê dai paîs daprûf, e je lade cuistant carateristichis particolârs e specifichis.

    Interessant ancje il fat che il volum al vegnin fûr a plui mans, metint adun i contribûts di cualificâts storics e ricercjadôrs, che cun competence a stan studiant di agns in ca il teritori cetant interessant de Val dal Lât di Cjavaç.

   Al vierç la rieste des ricercjis Enos Costantini cul so contribût dedicât a “Dalès e Voncèdas, i nons”, o sei ae toponomastiche dai lûcs e lu fâs cul so stîl verementri baron. Enos cuant che al scrîf e cuant che al conte ti lasse simpri a bocje vierte, imbambinît, lis sôs argomentazions a àn la fantasie e la frescjece dal cjante storiis, cun zontade dut câs une competence de materie di fati invidie.

    Dai aspiets gjeologjics dal teritori di Dalès al trate invezit Federico Sgobino. Ancje in chest câs cun notiziis

e aspiets di grant interès, cu la presince fondamentâl dal lât, des monts che si alcin sù daûr dal limit naturâl sgjavât dal Taiament, de presince di riui e di faes di cret diviers che si incrosis e che si insedin intun incjastri dabon unic.

   Di “Notis su la flore e la vegjetazion dal teritori” al scrîf Giuliano Mainardis. Ancje achì o cjatìn cjossis une vore interessantis, des veris raritâts, darest nol podarès jessi difarent par un teritori che al po gjoldi di un clime dal dut particolâr, metût cemût al è tra la aree plui interne de mont e la sô esposizion, viers misdì, su la planure furlane.

    Une cjosse biele la scrivin a cuatri mans Pieri Stefanut e Decio Tomant (che a son par altri i animadôrs dal “Centri di Documentazion sul Teritori”) dedicant une ricercje e ilustrazion a “Dalès e Voncèdis un paîs di arcs, puartons e lozâts”. Si cjate achì rapresentade la struture des cjasis dal vieri paîs, cun testemoneancis fotografichis de denant dal taramot. E ven fûr la presince di un paîs unic, interessant, che al mertave di di sei salvât e recuperât, come che in part si à podût juste apont fâ.

     Inte tierce part, chê dedicade a “La vite di ogni dì, lenghe e fevelade”, o vin i saçs di Zuan Cucchiaro (“Vitas di feminas intai lavôrs di ogni dì”), Pieri Stefanut (“Dalès e la pescje sul lât”), inmò Pieri Stefanut (“Une tradizion che si rinove: la fieste dai coscrits di Dalès”) e Ane Rabassi (“Riflessions sul furlan fevelât a Dalès”).

    Da pît al è stât metût dentri un “Repertori dai nons di lûc dalessans”, racuelts des fonts orâls, o sei di cemût che ju clame la int. Cheste part le à curade naturalmentri Enos Costantini, e e je pardabon cetant interessant. Un lavôr di cheste sorte al mertarès fat in ducj i paîs dal Friûl, si trate di une memorie storiche fondamentâl, soredut prime che i anzians nus lassin e i nons origjinaris dai lûcs a vadin pierdûts par simpri. (von zercläre)

Il Premi Leterari S. Simon a Rafaêl Serafini

Codroip – Il “Premi Leterari S. Simon” di Codroip, il plui innomenât par chel che al inten la produzion in prose in lenghe furlane, par cheste 36.esime edizion al è stât vinçût da Rafaêl Serafini, scritôr gnûf par stîl e pal mût di proponi prose par furlan. Al è rivât a coinvolzi la zurie cuntune racolte di contis mitologjichis presentadis sot il titul “Soreli jevât a mont”.

    Lis motivazions di cheste sielte proponudis de zurie, cun a cjâf Carli Tolazzi, a son ancje tant interessantis: “Si trate di une racolte organiche e coerent di contis, che e met adun la tradizion japonese intai siei riclams a un ciert spiritisim e prosis cetant coinvolzìnts de storie e de culture furlane, imbastint un leam che al po semeâ no coerent, ma che, al contrari, al fâs vignî fûr un colegament vivarôs, vêr, particolâr, fra culturis ae aparence une vore diferentis. La scriture e je frescje e atuâl, l’implant naratîf origjinâl”.

    Serafini darest nol è gnûf di chest premi, co an passât al jere za stât segnalât pe opare “Contis di famee”, publicade di resint par cure de editrice KappaVu.

Al merte vût ancje iniment che Serafini al è di cetancj cognossût come “l’ustîr di Contecurte”, la ostarie leterarie presint sul web. Un blog metût sù par “mantignî vive la nestre lenghe in maniere moderne che al cjape dentri lis contis – no plui lungjis di doi mil batudis – dai nestris zovis scritôrs. Une idee dal mai dismenteât Franco Marchetta, che dal sigûr al jere presint, in spirt, a Codroip la sere de premiazion. (red.)

Ladins dal Friûl pag.8 - Dicembar 2015

SCRITÔRS E LIBRIS IN MARILENGHE

La antologjie des poesiis di Galliano Zof

Il gnûf volum publicât par cure dal “Istitût Tellini”

     Za fa cualchi mês al è jessût de stamparie il penç volum (434 pagjinis) “Il gno jessi tal mont – Poesiis 1966 / 2009”, che al cjape dentri dibot dute la produzion poetiche di Galliano Zof, autôr vignût a mancjâ ai 10 di Avost dal 2012. La antologjie e je stade publicade dal Istitût “Achil Tellini” di Manzan, cu la cure di Manuela Quaglia.

     “Al è un timp infinît / che no sai / prime di me. / Al è un timp infinît / che no sai / dopo di me. / Tal mieç / il gno jessi tal mont, / fi di un sanc e di une storie, / ma cu la brame / di lâ / oltri il sanc e la storie / par supâ / il timp infinît / ch’al è / prime di me, / ch’al sarà / dopo di me”. Al scriveve cussì in “Jessi”, une liriche di “Salmodiis”, une des sôs ultimis racoltis, Galliano Zof, cjapant dentri intai viers la cussience di jessi fi di une tiere, une storie, un lûc e la brame, il desideri di lâ oltri, di passâ al di là dal limit just.

Poete e cjantôr de “contadinance” e dal mont furlan plui sclet, cui siei valôrs e lis sôs sfumaduris, Galliano si jere sindilât cussì, in cidin, a 79 agns.

     Insegnant di materiis leterariis prime e po preside, Zof al à lassât une olme insot tal panorame poetic e culturâl furlan. Nassût tal 1933, a Sante Marie la Lungje, prin di cuatri fradis, al veve cuistade la lauree in leterature e filosofie, continuant dut câs cun studis in psicologjie e grafologjie aplicade al compuartament. Al veve insegnât intes scuelis mezanis di Cjasteons, Gonars e Palme, par po deventâ preside inmò a Gonars, Manzan e San Zuan fint ae pension, tal 1997.

     Ma al è soredut pal amôr viers la culture, storie e leterature furlane che al à di jessi ricuardât, un amôr che lu à puartât a componis numerosis poesiis, publicadis in diviersis racoltis. Al scomence a scrivi intai agns ’60 e i siei viers a vegnin fûr tal 1967 intune racolte antologjiche promovude dal grop leterari “La Cjarande”, dal cuâl al è stât un dai fondadôrs parie cun Mario Argante e Domeni Zannier.

     “Daspò une scree leade soredut ai moments lirics, al mont dai afiets, ae memorie – al ricuarde il professôr Odorì Serena -, intai agns ’70 il regjistri di Zof al cambie e i siei viers a deventin travanâts da un fuart sens di justizie sociâl che lui al sint che e sedi vignude a mancjâ a la int dai borcs contadins, esponûts a dituarts e emargjinazion”. Zof al devente cussì il cjantôr de “contadinance”, dai puars, dai ultins. Dut chest lu cjatìn testemoneât in oparis come “Lidrîs di tuessin”, “Pan cence levan”, “Contadinance”, “De bande dai siôrs”, la racolte “Flôrs”. E inmò “Spire e muse”, “Timp cence timp”, fint a “Salmodiis” dal 2002 e a “Cjant forest” dal 2003. Zof al è ancje autôr dal drame pal teatri “Lune in cercli”, vincidôr di un dai numerôs premis leteraris de sô cariere.

     Tra i socis fondadôrs dal Istitût pe valorizazion de lenghe e de culture furlane “Achil Tellini” di Manzan, si è ocupât ancje di studis di gramatiche e fonologjie furlane e al à publicât, in colaborazion cun altris scritôrs, ricercjis e studis su lis tradizions e la culture furlane. In sumis un poete e une figure di alt profîl, dai mil interès, ma ancje un grant om. “Al jere une persone vierte, sclete – lu ricuarde cun afiet l’amì Odorì Serena -, buine di savê scoltâ chei altris, ancje la int umil, chei metûts de bande, cui cuâi si fermave dispès a fevelâ par cirî di capî il misteri dal om”. Curiôs come che al sa jessi un ricercjadôr, une persone crodint. Al saveve ofrî a chei altris il so confuart e une ligrie mai metude in forsit dal nuie che al fos volgâr o negatîf.

     Inte sô “Antologjie de Leterature Furlane” Zuanfranc D’Araconco di chest autôr nus dîs: “ La produzion di Zof, dute in viers e avonde siore, e je straordenarie tal so jessi native e spontanie intes primis provis. Ma in fin dai fats e ufrìs lis pagjinis miôr intes dôs racueltis plui resintis, che a àn ispirazion e formis che si somein. “De bande dai siôrs” al sune ironic. Zof al è de bande dai puars; e dai puars lui, di nassite contadine (che si viodi la “plaquette” che al à metût tal so prin libri), al cognòs dutis lis soferencis e lis miseriis. Cheste e je une rieste di cuatri cjants di rivendicazion. Dome che a cjalin indaûr a timps passats. E leiju al fâs l’efiet di un cjant di riviel, di invocazion, ae justizie, di invetivis e di maledizions e di sburts a butâ jù un sisteme che al sprolungje divisions tra parons e siôrs. Chest poete contadin al à induvinât aromai un modul personâl, e a chel i reste fedêl. La sô no je poesie dome par se, ma un contribût par chei altris, che a cjantin lis soferencis antighis e lis sperancis insiemit cun lui”.

     Cemût che si à vût iniment denant trat, cheste antologjie “omaç” a Galliano Zof e cjape dentri i tescj poetics in lenghe furlane che a jerin za stâts publicâts in maniere autonome tra il 1966 e il 2009. E dal libri “Pan cence levan” (1969) o vin sielzût di publicâ la poesie che e à par titul “Dies illa”: “Ricuarditi di me, Signôr, te grande ore / quanche strac pai ains muardûz / ’o rivarai sul pat de puarte tô... / Ti disarai cul cuarp gno carulât / metût in muèl tal laip plui di une volte / a bevi sanc fraidessût di fueis di vît. / Le’ mans ti viarzarai come dô’alis / aradis di crituris e di neri / par che tu puedis planc pojâ il to cjâf. / I pîs ti mostrarai cu le’ cjavilis / ch’e àn fat un sun di muart dilunc le’ seris. / Ricuarditi di me, Signôr, te grande ore!”.

La schede: G. Zof, Il gno jessi tal mont – Poesiis 1966-2009, Ed. Istitût “Achil Tellini”, Manzan 2015, pp. 434 .

“Ladins dal Friûl” Diretôr responsabil : Renzo Balzan - Reg. Tribunâl di Tumieç n. 123 dai 09.03.98

Redazion : 33028 Tierç di Tumieç - V. Dandolo16 / tel. 0433/43696 / e-mail : ladinsdalfriul@gmail.com

F.I.P. (fotocopiât in propi) a Tierç di Tumieç (Ud) V. Dandolo 12 pes Edizions “Union Scritôrs Furlans”.

La publicazion e ven spedide es Bibliotechis dal Friûl, es Istituzions Culturâls Ladinis des provinciis di Bolsan, Trent e Belun, e a ducj chei che a mandin la lôr libare contribuzion doprant il C.C. bancjari nr.19162 dal “Banco di Brescia” (Filiâl di Tumieç) - codiç IBAN: IT50H 03500 64320 0000000 19162

Chest gjornâl inte sô version online si lu cjate tal sît : http://ladinsdalfriul.blogspot.it

Publicât cul sostegn de Provincie di Udin – L.R.24/2006 art.26

Anade ( XVIII ) n.11 Novembar 2015

Periodic-mensîl di informazion e culture sul cont de minorance celtiche

dai Ladins de Furlanie. Edizion par cure de associazion “Union Scritôrs Furlans”

Rome e insit tal volê butâ jù il Friûl

Intant la Catalugne nus mostre la strade de indipendence

     Rome e insist tal so selerât progjet di volê butâ jù il Friûl. Martars 13 di Otubar la riforme dal “gnûf” Senât e je stade fate buine de bande di Palaç Madame. Il vôt finâl al à dât il vie cussì ai articui de riforme che introdusin il cussì clamât gnûf federalisim. Ma il colp di sene, par nô, al è jere za rivât denant trat dal acolziment de bande dal guvier di un ordin dal dì di Raffaele Ranucci (Pd) che al impegne l’esecutîf a presentâ in curt une riforme che e tai il numar des Regjons. Si trate, in conclusion, de presentazion di un emendament dal esecutîf su la contrastade norme transitorie che e certifiche, di fat, une intese interne dal Partît Democratic sun chest argoment. Une micje che e à inviât un vivarôs dibatiment in Friûl, dopo lis cjapadis di posizion dal ex sindic di Udin Sergjo Cecotti e dai autonomiscj e il dibatit su la progjetade creazion de macro-regjon dal “Trivenit”. Ducj sot Vignesie vadì! Une soluzion che e mandarès la nestre Regjon, ma soredut il Friûl Storic tal limbo. Une porcarie recuperade dai timps dal fassio: robatis di sgrisulâsi!

   Ma no je finide culì cu la “porcade” dal gnûf Senat! Sintît ancje cheste! Intun comunicât Igor Gabrovec, conseîr regjonâl de Union Slovene nus vise che: “Za la precedent proiezion che e dave trê senatôrs inte gnove “Cjamare alte” dal Parlament di Rome a risultavin in maniere palês insuficients a garantî lis specificitâts linguistichis (furlans, todescs e slovens) dal Friûl-V.J. Ridusintju a doi, come che o stin leint tal test burît fûr in rivuart, al devente un dituart che nol po sei acetât par vie dal stes principi di autonomie e dignitât di une Regjon speciâl che e à dirits costituzionâi e comunitaris (europeans) ricognossûts aes minorancis linguistichis e nazionâls”.

     Sun chest cont fasìn cualchi paragon une vore significatîf. Nus ven assegnat il stes numar di senatôrs dal Molise, che al à un tierç de nestre popolazion, e de Basilicate, che indi à mancul de mitât. Ma intant graziis al ricognossiment de sô particolaritât ento-linguistiche la Val d’Aoste e varà doi senatôrs cuntune popolazion che si ferme a 126 mil abitants, dibot tant che la citât di Udin, cun zontât Tavagnà e Reane. Mentri po il Trentin-Sud Tirôl cul so milion di abitants, aduncje mancul dai nestris, si puarte a cjase cuatri senatôrs, doi par ogni sengule Provincie autonome. Ancje in chest câs graziis al ricognossiment dal status di autonomie (e tratament) speciâl pe presince di minorancis linguistichis-nazionâl ricognossudis e tuteladis. Ma la president de Regjon Debora Serracchiani, oltri che vice-president dal Partît Democratic a livel nazionâl, dulà de ostie jerie lade a finîle intant che si stavis cumbinant chestis incualificabilis baronadis! O sin aromai convints che Renzi la stedi calcolant simpri di mancul... si ben che si sedi sfuarçade di fâlu rivâ fint a Buri!

     A chest pont al è plui di cualchidun che al scomence a pensâ che lâ dilunc a fevelâ di autonomie pal Friûl al è deventât dal dut limitatîf, se no fintremai academic. Che al è rivât il moment di provâ a alçâ il tîr: bisugnarès scomençâ a resonâ sul concet di indipendence pe nestre tiere. Darest l’esempli sun cheste pussibile sielte nus rive drete de Catalugne, e dai risultât des resintis votazions che si son davueltis in chê Regjon-Nazion cumò leade inmò ae Spagne.

    “O vin vinçût cun scuasit ducj cuintri e chest nus da une fuarce grandone e une grande legjitimitât par puartâ indenant il nestri progjet”, si è esprimût in chescj tiermins il president jessint catalan Artur Mas, denant di miârs di sostenidôrs a Barcelone. Intes votazions di domenie 27 di Setembar stât, juste apont, lis dôs listis indipendentistis, “Junts Pel Si” di Mas (62 segjos) e chê di Cup (10), a àn cuistât insiemit une maiorance assolude di 72 segjos sui 135 tal gnûf Parlament Catalan.

   Mas, che al à trasformât lis votazions regjonâls anticipadis intune sorte di referendum su la indipendence, intun mûr cuintri mûr cun Madrid, al intint cumò inviâ la “disconession” de Catalugne de Spagne, cul obietîf di rivâ ae indipendence plene – cun dut che si è in presince di une dure oposizion de bande dal guvier centrâl – dentri il 2017. I 5,5 milions di eletôrs catalans si son mobilitâts al massim, coinvolts de persuasion de impuartance storiche di chestis ultimis votazions, lis plui impuartantis pe Spagne de fin dal franchisim in ca secont la stampe di Madrid e di Barcelone. La afluence ai segjos e je rivade al 77%, une cifare mai tocjade prime!

      Furlans sveaitsi, ancje par nô la strade par diliberâsi di sotanance umiliant di Rome, di Vignesie e di Triest no po jessi che cheste. Di bessôi! Di bessôi! Di bessôi! (tarvos)

Ladins dal Friûl pag.2 – Novembar 2015

DAL TIMÂF A LA LIVENCE

Storiis e cuintristoriis tal Friûl dal dì di vuê

Il Friûl des aziendis che a funzionin

   A livel di tindince, o sei fasint il confront tra il mês di Avost 2015 e il stes mês dal 2014, la calade de casse integrazion in Friûl e je stade significant. La variazion, in fats e je stade dal -28,95 par cent. A livel congjunturâl, invezit, la comparazion tra Avost 2015 e il mês denant, al viôt une incressite dal ûs dai sostegns sociâi dal 11,9 par cent, cuntune incressite impuartante de casse integrazion straordenarie, e un câl significant di chê ordenarie (-63 par cent).

    Al è in indiç parziâl, chel de casse integrazion, sul cont dal stât di salût de economie, ma bastant a dî che se di riprese si fevele, dal stât di salût de economie, cheste riprese e sta coinvolzint in maniere inmò margjinâl la nestre regjon dulà che al reste evident un stât di soference di plusôrs impresis apartignints a diviers setôrs.

   E nol è dite che jessint positîf il confront di tindince, chest al basti a sostignî che vuê lis cjossis a van miôr rispiet a za fa un an. Parcè che intant cetantis aziendis a àn ridusût i organics, mentri altris a àn esauride la pussibilitât di podê utilizâ i sostegns sociâi che, cu la legjislazion di prime e rivave a cinc agns, mentri vuê si ferme a un.

   Ma vignìn ai dâts: tal mês di Avost 2015 chenti a son stadis autorizadis 1 milion 653 mil oris di casse integrazion, cuntun câl rispiet al stes mês dal 2014 dal -19,36 par cent. Lassant de bande la casse in deroghe, il câl al à interessat sedi la casse integrazion ordenarie (-53,73 par cent), che chê straordenarie (-18,76 par cent).

   Dal scomençâ dal an al mês di Avost comprendût, l’ûs de casse integrazion al è calât dal -28,95 par cent rispiet al stes periodi Zenâr-Avost 2014, cun circje 4,5 milions di oris in mancul.

   Introduzion, cheste che o vin fate, necessarie par podê sclarîsi miei lis ideis sul stât di salût de nestre economie, parcè dispès e jentre in bal la propagande e i numars ognidun po ju tire de sô bande cemût che plui i tornecont.

    Cundut achel o podìn dî che alc di positîf finalmentri al scomence a movisi, e chescj segnâi nus rivin soredut des nestris aziendis plui di ecelence. Cjapìn par esempli la Eurotech di Damâr, che e à puartat une piçule aziende logade intune zone periferiche de Cjargne, a deventâ un grup globâl cun sedis in trê continents.

   Nassude intant de crisi sul scomençâ dai agns ’90, in fats, Eurotech e sielzè un strade dal dut gnove, impegnantsi tal svilup e produzion di computers in miniature (embedded) a altis prestazions. Fint di subite, in prionte, i fondadôrs de aziende di Damâr a capirin che par cressi no si podeve restâ leâts nome al marcjât talian e a scomençarin cussì a internazionalizâsi in France, in Gran Bretagne, Usa, Japon, fasint deventâ il grup un fra i principâi atôrs dal marcjât. Vuê Eurotech, che e continue a mantignî il çurviel in Cjargne, e che dal 2005 e je cuotade in borse, o ofrìs une rieste di prodots che a van dai computers embedded par aplicazions speciâls, fint ae plateformis software par Internet of Things.

   Ispiradôr e co-fondadôr di Eurotech al è Roberto Siagri, imprenditôr bon di cjalâ in muse la realtât e di pensâ al a vignî cence pôris di sorte. Cheste e je cence altri la plui interessante realtât imprenditoriâl de mont furlane, ancje parcè che e mostre che capacitât, inzegn e sgrimie a rivin a bati ogni ostacul, ogni tananai che la politiche e la burocrazie e cirin simpri di metiti cuintri.

   Restant simpri in Cjargne, di Damâr a Tumieç une altre realtât produtive verementri interessante e je chê de Automotovive Lighting di Tumieç, che e prodûs fanalarie par machinis e e je cumò la plui impuartante realtât ocupazionâl dal teritori cui siei scuasit 800 adets. Po ben, propite la Automotive Lighting ae fin dal mês di Setembar stât e à anunziât la cjolte sù a vore, cun contrat definitîf, di cincuante adets. Une biele gnove dabon pe Cjargne daspò lis brutis gnovis dal “câs” CoopCa. A vuê a son inmò circje 180 i adets in Automotive che a lavorin cun contrats a tiermin, ma se lis cjossis a continuin a lâ indenant ben al è di sperâ che ancje par une buine part di chescj e puedi rivâ in curt la stabilizazion definitive. Dut câs l’impuartant al è che si trate soredut di zovins.

   Lis cjossis a van ben ancje ae Danieli di Buri, che e continue a pontâ su la inovazion. Ultime novitât in rivuart al è l’acuardi di cheste aziende cun Alcoa pal alumini super-lizêr. Une leghe di alumini che e je il 40 par cent plui facil di lavorâ e il 30 par cent plui fuarte dal alumini che vuê al ven doprât inte industrie. Cheste tecnologjie di procès, clamade “Micromill”, e je stade juste apont l’ogjet di un acuardi in esclusive mondiâl tra Alcoa, vuê leader globâl inte tecnologjie, inzegnerie e fabricazion di metai lizêrs, e la nestre Danieli, leader inte furnidure di implants destinâts ae industrie pe metalurgjie.

   Lis dôs societâts a àn sotscrit un acuardi pe vendite des furniduris Micromill e pe concession in licence de relative tecnologjie brevetade. Su la fonde di cheste intese, Alcoa e concêt a Danieli la esclusive pe vendite di ecuipagjaments Micromill, e insiemit a lavoraran par concedi in licence la tecnologjie di procès avanzade pe produzion di leghe di alumini a clients di dut il mont.

   Pe Spa di Buri l’acuardi al à il valôr di un altri fondamentâl pas indenant pe incressite de societât, che si conferme aziende di avanguardie inte industrie dai implants pe metalurgjie, cuntune atenzion particolâr ai procès di efiet pai metai “diviers”.

   Pes aziendis che vuê a funzionin in Friûl al merte segnalât ancje il Grup Pittini di Osôf. La aziende metalurgjiche furlane in fats e je daûr a cuistâ il stabiliment Galtarossa di Verone che al fâs part dal Grup Riva. Si trate di une açaiarie che e sta dant lavôr a 418 dipendents. Il stabiliment veronês al larà cussì a infuartî inmò di plui il Grup Pittini che za vuê, tra Friûl, Venit, Austrie e Slovenie al prodûs 2 milions di toneladis di açâr ad an e al da lavôr, intes sôs sîs aziendis, a circje mil e 200 personis, des cuâl circje 800 in fuarce tal grant stabiliment di Osôf.

   In conclusion un Friûl che “al funzione” al esist inmò. Un Friûl salt e concret, al di fûr di ogni retoriche e degn de sô tradizion e chest nus puarte ae sperance che la lungje crisi che sin inmò daûr a traviersâ e puedi jessi ae fin superade. (renzo balzan)

Ladins dal Friûl pag.3 - Novembar 2015

CRONICHIS DI CHENTI

Cjargne: aghe svendude par un blanc e un neri

“Carniacque” e passarà sot il Cafc “Consorzi Acuedot Friûl Centrâl”

Tumieç – Tal numar di Otubar stât o vevin fevelât che in Cjargne “al stave tampiestant cence remission”: tribunâl, casermis, puestis, crisi Coopca, une rieste di bastonadis di cjoli il flât. Ma no je finide, magari cussì no, parcè che cumò e je rivade la volte de aghe, ricjece primarie di chest teritori, che e je daûr a jessi cedude, par un blanc e un neri, da Carniacque al gjestôr unic provinciâl Cafs “Consorzi Acuedot Friûl Centrâl”. Si trate, vadì, di un altri colp pesant pe montagne.

   Al di là des impromission intant de campagne eletorâl pes votazions regjonâls la zonte Serracchiani si è rindude di front ae cession al Cafc dal servizi idric integrât de zone de Cjargne. E no po jessi acetade dal vice segretari dal maiôr partît di guvier la scuse che un tant si scugnive fâlu par leç, parcè cui che al ten in man lis brenis dal podê come la president e à il dovê di esercitâ dutis lis pressions dal câs par cambiâ normis e leçs che a van cuintri i interès de int. Viodût soredut la atenzion speciâl che e merte la montagne, cjapade come che e je intune situazion di crisi.

    Naturalmentri la prime a jessi clamade in cause e je la “siore”, ancje parcè che si è tignude la deleghe di zonte pai problemis de mont. Une aree cheste za feride dal scandul CoopCa e penalizade di une riforme sanitarie che e met adun il Medi Friûl a Tumieç e Glemone, creant un pesant disvantaç pai abitants des zonis altis, che a riscjin di scugnî frontâ distancis e timps fûr dai limits par podê utilizâ al miei i servizis ospedalîrs e sanitaris. In presince a situazions di cheste sorte si cjatisi obleâts a meti in evidence che inte nestre Regjon i citadins che a loghin intes zonis di mont no stan gjoldint dai stes dirits di chei altri, co vuê plui che mai e semein bandonâts, e bastonâts, da un podê regjonâl dal cuâl no son a fat rapresentâts.

    Sun chest cont o publichin une letare di Franceschin Barazzutti al sindic di Tumieç, Brollo, capo-file in Cjargne dai sindics yes man intai rivuarts de president Serracchiani. (mateu di prun)

    Al à la code di paie il sindic di Tumieç, Brollo, dal moment che, prime mi indrece un invît – di me acetât – a incuintrâlu tal so ufici par un scambi di opinions sul servizi idric, ma po al burìs fûr un atac su la stampe, cun dut che i ves metût a disposizion une bondante documentazion sevi su lis direzions di centralizazion e speculativis su tâl servizi, negativis pe nestre montagne, sevi sui modei gjestionâi metûts in vore in maniere positive in altris regjons a statût speciâl.

   Forsit, il sindic Brollo, sul drandran cumò di mode par cui che al à une funzion istituzionâl di “comant” al vûl sintîsi a dâ reson dal so interlocutôr, pene jessi definît un “civuiton”, nol à preseât che inte mê conversazion, cordiâl, e intes declarazions ae stampe jo o vebi esponût chês che a son lis mês convintis posizions che, sun chest cont, no coincidin cu lis sôs, su lis cuâl lui al met in presse il timbri vuê in voghe di “populistis”, ancje se realizadis in maniere positive tal Trentin a statût di autonomie speciâl come la nestre Regjon. Populiste ancje la Zonte dal Trentin inalore?

   Posizions lis mês, za palesadis in passât e inmò di plui tal presint, che o soi de opinion che e sedi sbaliade la centralizazion de gjestion dal servizi idric intai teritoris di mont. Posizions confermadis dal faliment de esperience di “Carniacque”. A chest pont al è dabon grâf che da cheste esperience negative no si vueli imparâ nuie, anzit si vadi a centralizâ inmò di plui il servizi fintremai tal furlan Cafc, apaiâts di cualchi contentin in a vignî, mentri la Cjargne e piert, in zonte des aghis, ancje tribunâl, i servizis de pueste, Coopca, e vie dilunc cuntune Cjaurêt di sgrisulâ, ancje la aghe dal rubinet! Cheste e je la code di paie dal sindic Brollo. Ma lui al è apaiât! Biel che a paiâ e je la int.

    Il sindic Brollo, invezit di scuindisi di frecuent daûr al “lu vûl la leç”, ricuardant che lis leçs no lis sculpìs Mosè su la mont dal Sinai ma i oms in maniere conforme a determinâts interès che no tegnin in nissun cont de montagne, al fasarès ben, viodude la sô vicinance ae presidente e assessore ai problemis de mont Serracchiani, a domandâ insiemit a chei altris sindics de Cjargne une legjislazion plui adate, e concrete, aes dibisugnis de montagne.

   Nol è Barazzutti – che nol à tant podê – a “meti in cjative lûs i sindics” ma la continue discjadude de Cjargne e, tal câs di Tumieç”, il fat che no si viôt nissun lusôr almancul che si vebi di contentâsi cun cualchi baronade trionfalistiche sicu il lumin impiât in chel che al jere il tribunâl, costât di resint une barcje di bêçs par fâlu ristruturâ e adeguâ aes normis di leç.

     Si domande Brollo, in relazion aes mês posizions di lui definidis populistis, a ce che mi sedi zovade “La esperience e l’impuartant passât di aministradôr public”. I rispuint che mi è servide a olsâ par jessi dal ordenari, a tignî la schene drete ancje di front a cui che al stave plui in alt di me. Par chest o soi stât rispietât e no doprât. E chest, in maniere divierse des masse schenis che si plein come vencjârs denant dai “maiorents” fint a deventâ i “gastalts sudizionôs” sul nestri teritori des lôr volontâts, invezit di fâ valê in alt la volontât di cui che al sta in bas.

    Al sindic Brollo, cun dute la sclagne partence de sô aministrazion, i auguri di rivâ a fâ almancul un pôc di chel che al fasè za fa tancj agns il sindic di chê volte di Cjavaç Barazzutti. (Franceschin Barazzutti dal Coordinament dai Comitâts di difese teritoriâl de Mont Furlane”)

Ladins dal Friûl pag.4 – Novembar 2015

DOCUMENTS

Il destin indât di un Friûl che al devente Triveneto!

Sergjo Cecotti nus met in vuaite sul burlaç che al è daûr a plombânus

Ancje se la politiche di vuê e predicje il contrari, jo o resti fedêl aes vieris ideis. Prin: e je la istituzion politiche a jessi al servizi de sô comunitât e no il contrari. Secont: une istituzion di autoguvier e à sens dome se i citadins si ricognossin in jê e la vivin come comunitât di destin. Aduncje, a chei che mi domandin ce che o pensi di Triest Citât metropolitane o rispuint che dome i triestins a àn dirit di dî sì o no. Chest dirit par altri al compuarte il dovê di fâsi caric des conseguencis sun chei altris des propiis sieltis. E va dade, vadì, une soluzion al probleme dai slovens, tant che comunitât linguistiche teritoriâl che e à dirit a une dimension istituzionâl di autoguvier.

    Plui in gjenerâl la Citât metropolitane di Triest e mudarès ecuilibris e nature dal Friûl Vignesie Julie, ecuilibris che a laressin ricostruîts su la fonde di un clâr “Pat storic” tra lis components de Regjon. Si disarà che chestis a son cjossis scontadis. E je vere.

   Lassin ce che al è evident, e din une voglade a ce che si môf intai palaçs dal podê vêr. Achì lis cjossis, magari cussì no, si imberdein: mentri jo o soi favorevul a Triest Citât metropolitane, a pat che i triestins la vuelin e la Regjon e vegni tornade a ecuilibrâ, jo o soi contrari in maniere mastine al pensîr-scaltri che al partìs da une part dal Partît Democratic e si sta svilupant daûr e d’ascôs dal dibatiment su la Citât metropolitane. Cetancj dem a àn capît che Renzi al è determinât a “semplificâ” lis Regjons par incentrâ ogni podê e ogni risorse intes sôs mans. Lis Regjons a van ridusudis in numar, competencis e dotazion finanziarie. I maiorents dal Pd a san benon che a oponisi ai disens di Renzi nol è ni facil e ni igjenic par cui che al vebi ambizions politichis. Cussì si son rassegnâts al inevitabil: la anession dal Friûl Vignesie Julie al grant “Triveneto”. L’onorevul Rosato al fevele dal “Triveneto” come pussibil regjon speciâl. Che al sedi lât fûr dal vade ae improvise? Dal sigûr no, Ettore Rosato al è un dai çurviei plui lucits e profonts de politiche. La sô linie e je sì subordenade, se si vûl une vore subordenade, ma e je ispirade a un rigorôs realisim. Karl Popper al scrîf che la razionalitât, in politiche, e consist tal seondâ l’inevitabil. Rosato al è al è un razionalist poperian, e si è metût ae opare par favorî la inevitabil anession de nestre Regjon al Venit.

   In ce cjosse consistie la “razionalitât”?

  Il jessi il promotôr de anession i permet di gjestî i detais e aduncje di limitâ i dams. Cuâi dams? Almancul doi. Il prin al è il discredit che cu la propueste di anession al Venit al larà a finîle sul Pd. Par preparâ il colp, il nestri al bat sul claut de bufule che il grant Venit al sarès une regjon speciâl, anzit di plui, al gjoldarès de stesse autonomie che a àn cumò lis Provinciis di Trent e Bolzan/Bozen. Chel altri al è il dam grandon pe sô citât, Triest, che di capitâl di une “ricje” Regjon a statût speciâl si viodarès ridusude a une des tantis mediis citâts di une Regjon ordenarie. Podaressie une tâl medie citât mantignî un teatri stabil “regjonâl” o un ent liric? Cattinara no riscjaressial di jessi declassât a ospedâl di ret? Cetante part dal Pil citadin laressial in fum?

   No son domandis di pôc cont. E in fats a son mês che a Triest, intai salots che a tirin adun la sorestanzie economiche, politiche e culturâl, si sta incagnint il dibatit. Un pôcs a pensin ae Citât metropolitane come istrument par podê conservâ, dentri dal grant Venit, un cualchi margjin di autonomie istituzionâl e influence politiche. Altris a son puartâts a volê bati stradis plui sofisticadis. L’onorevul Rosato al è l’om di ponte di cheste seconde scuele di pinsîr. A diference di altris, Rosato nol è gran ingjenui, e al sa ben che la Citât metropolitane disegnade dal centralist Delrio e je une scjatule plene dome di nuie. Rosato al à tal cjâf une soluzion cetant plui brilant, che al ten inmò segrete. Pecjât al sarès interessant cognossile tal detai, viodude la autorevolece dal politic.

   La conclusion? Lassìnle al grant Popper che nus met in vuaite sul fat che, si ben che in teorie al sedi vêr che la razionalitât e consist dal favorî l’inevitabil, inte realtât storiche chest criteri dispès al falìs. Par une reson semplice: scuasit simpri nô o scometin sul inevitabil sbaliât. La realtât dal svilup storic e cjape simpri stradis diviersis di chês che a nô a semein inevitabilis. Un gragnel di savalon al va a finîle tra lis ruedis e al mande a marc e madone l’inevitabil sul cuâl al veve scometût il Podê. O crôt che i citadins di cheste Regjon a savaran jessi il gragnel che al ferme la inevitabil anession al grant Venit. (Sergjo Cecotti – za sindic di Udin e president de Regjon Friûl-Vignesie Julie – test tirât fûr dal “Messaggero Veneto” dai 25 di Setembar e voltât par cure de redazion)

Friûl : un popul, une tiere, une lenghe!

Ladins dal Friûl pag.5 – Novembar 2015 

JOSEF MARCHET: I GRANCJ OMS DAL FRIÛL

Pieri Capretto (Pieri Zocul): umanist e inteletuâl rafinât

Al è stât un valent scritôr e un racueidôr di libris antîcs

     Ben pôc si po regjistrâ ator ae vite di chest nestri valent umanist, di volte in volte, ae maniere toscane Capretto o trevisane Cavreto o par latin Haedus o inmò par furlan Zocul. Di divignince di Pordenon dulà che in fats al nassè tal 1427, e dulà che simpri alì al murì tal 1504: inte citât dal Noncel al à passâ i prins agns de sô vite e juste apont i ultins. Il grât e il gjenar de sô formazion umanistiche classiche, di alt livel inteletuâl, a fasin pensâ che al vebi davuelt studis in cualchi bon centri culturâl de Italie Disore, par vie che nol semee, gran, che lis scuelis locâls a vessin, inte prime mitât dal Cuatricent, cuistât une direzion didatiche corispuindint ae cualitât e ae largjace de sô dutrine.

    Tal 1425 al jere za predi, mandât a rezi la capelanie di S. Tomâs e dai Trê Rês dal domo di Glemone. Al scugnì, par altri, fâ ancje di vicjari dal plevan Nicolau Spatarini, che, come arcidiacun di Aquilee, al veve il dovê logâ venti jù. L’ufici dal vicjariât, o sei la efetive cure spirituâl di gruesse plêf, e impegnà dal sigûr dute la sô ativitât. Al risulte, par altri che, sul esempli di Guarneri di Dartigne, si dedicàs ancje lui, intai moments libars, a trascrivi codiçs. Tal 1475 al vignì nomenât ancje vicjari di Pordenon, ma al continuà a logâ a Glemone dulà che tal 1486 i vignì concedude la citadinance di chê Comunitât. Dome viers il 1490 al tornà a Pordenon: e al è in cheste ultime dade di timp de sô vite che al podè realizâ lis sôs oparis plui impuartantis e impegnativis.

   Pieri Capretto al riprodûs, in cualchi misure, il model dal umanist enciclopedic, che inalgò al vignive incjarnât da Pico della Mirandola, da Leon Battista Alberti e di altris. Erudît di studis classics, scritôr di tratâts morâi e politics par latin e di viers in volgâr, tradutôr, comentatôr des Scrituris, compositôr di musiche sacre, maestri di pedagogjie, racueidôr di libris, al savè cuistâsi no dome une slargjade innomine come leterât, ma ancje la benvolence e la stime di om savint e concret. Juste par chestis resons al mertarès di no jessi lassât fûr de storie gjenerâl de leterature dal Cuatricent, tant che rapresentant de corint umanistiche-cristiane.

    In ordin di timp, il prin lavôr dal Capretto che si à notizie e che, dut câs, al supon une cierte innomine bielzà cuistade dal autôr, e je la version (par venit trevisan cun prestits dal toscan) des “Costituzions” marquandianis, o sei dal codiç di leçs buridis fûr dal patriarcje Marquart di Randeck tal 1366, che, cun lizeris mendis, a rezerin la aministrazion de justizie inte Patrie fint ae colade di Vignesie. Lavôr realizât su richieste dal stampadôr Gheraert van der Leye (Gjerart di Flandrie). Cheste version e rapresente la prime opare tipografiche che e je comparide a Udin (1484).

     Pôc daûr (1486) al jessè, par volgâr (furlan) l’Ufizi de Madone in forme poetiche: “Lo ofytio de la Madona per volgare composto per misser pre’ Piero del Zochol”. I salms a son voltâts in tierce rime, altris parts in metris diviers. La version par altri e je une vore libare. Al è un lavôr, al pâr di capî, fat in presse e une vore fadiôs, cun diviersis incoerencis, oltri che cun fai, in chest câs dal sigûr par colpe dal copiadôr.

Inmò dal an 1489, cuant che il Capretto al jere inmò vicjari sot la Glemine, a son trê cjants, o miei piçui poemis latins, di lui componûts par jessi cjantâts intes prucissions. Il prin in onôr di san Roc, il secont in onôr di san Tomâs e il tierç onôr di san Bastian. Dedicâts aes glesiis di Glemone, si trate dut câs di oparis di no grant valôr, dal sigûr no al nivel de innomine dal lôr autôr.

    Ben diviersis, par valôr leterari, a son scuasit dutis lis oparis dal Capretto scritis daspò il 1490, cuant che al le a vivi a Pordenon. L’elenc che nus furnìs il Liruti, indi comprent un pocjis che no si rivin plui a cjatâ. La plui innomenade e che e ve il maiôr sucès, e puarte il titul di “Antieroticon, sive de amoris generibus, libre tres”, e al è un tratât metût jù in forme dialogade, stampât a Trevîs dal za vût iniment Gjerart di Flandrie tal 1492, e po inmò a Colonie (Gjermanie) dal Birkmann, tal 1518, cul titul “De contemnendis amoribus”. Al è un messet di mitologjie assetiche, dulà che la dutrine morâl, tirade fûr dai Sants Paris, si zove des citazions da Ciceron a Seneca e vie indenant.

   Sul model dal “Cato maior” di Ciceron al è componût un altri tratât, titulât “De chistiani hominis senectute”. Mentri secont il model dal Petrarca a son stâts metûts jù i cinc libris clamâts “De miseria humana”. Di altris lavôrs impuartants no si è rivâts impen, magari cussì no, a cjatâ copie e testemoneance.

    Nus reste invezit, e al semearès in autograf, un grues volum (dal 1493) che, sot il curiôs titul di “Diapsalma”, al cjape dentri une esposizion, intai sens alegorics, dai sengui viers dal intîr Salteri: opare slargjade e sapontade di un slargjât furniment di altis cognizions. Al murì, cemût che si à vût iniment denant trat, a Pordenon tal an 1504.

    Tal so complès e par dute une rieste di resons, la opare di Pieri Capretto e supon in lui une volontât cussient di inviâ la culture furlane dal so timp viers lis corints umanistichis talianis. E ven acetade, vâl a dî, la totâl adesion a chel destin politic che la ocupazion dal Friûl de bande di Vignesie e veve aromai impreteribilmentri segnât pe nestre Patrie furlane. (Josef Marchet – test tirât fûr da “Friuli: uomini e tempi”, ridot e voltât par cure de redazion).

Ladins dal Friûl pag.6 – Novembar 2015 

DAI FATS E DE CULTURE

DES TIERIS LADINIS

“Ladin!” – Anade XII – n.1 – Mai 2015

In rilêf la leterature ladine des Dolomitis Belumatis

Borca di Cjadovri (Bl) – Al è jessût za fa cualchi mês il n.1 (Anade XII) de riviste “Ladin!”, buride fûr come simpri par cure dal Istitût Ladin de la Dolomites, di Borca di Cjadovri. Un numar ancje chest une vore interessant, massime tal saç di viertidure, dedicât ae “Lenghe de poesie ladine des Dolomitis Belumatis”. Autôr de ricercje al è il professôr Adeodato Piazza Nicolai.

     Piazza Nicolai al partìs di lontan, des primis rimis, des primis traduzion di bocons di oparis impuartantis che si son vudis tal Votcent. In chescj scrits si evidenziin doi aspiets: il prin al è il rapuart tra la lenghe uficiâl, il talian, e la lenghe locâl, dispès conflituâl. Il sisteme scolastic talian al à simpri fat ogni sfuarç par disvidrignî lis feveladis locâls. Il secont la fragmentazion des diviersis feveladis des valadis Belumatis. In efiets ogni paîs al à une sô varietât dialetâl ladine, particolâr seondât dal teritori di mont, che nol zove ni aes comunicazions e ai scambis comerciâi, ni a chei sociâi e culturâi. Il risultât al è une mancjance di une salde tradizion leterarie. Massime inte scriture des oparis a vegnin fûr chescj problemis, no jessint presints modei, vocabolaris, gramatichis e vie indenant.

    Cundut achel lis cjossis a son mioradis cetant tal secul passât, tal Nûfcent, ancje come rispueste di resistence a une omologazion culturâl e linguistiche puartade indenant in maniere arogant dal fassisim tra lis dôs Vueris Grandis. Po, passade la balfuerie des vueris, la riscuvierte des lidrîs, de propie identitât, de propie lenghe mari, e à saborât lis personis plui sensibilis e culturalmentri preparadis a ripiâ il cjaveç dal scrivi in poesie e in prose inte propie lenghe mari. A pareli, ancje la riscuvierte, e il recupar, di une cussience ladine al è stât sapontât da cheste sorte di Vierte leterarie floride fra lis Dolomitis dal Cjadovri, massime a partî dai agns sessante/setante.

    Cussì a scomencin a vignî fûr lis oparis dai poetis agordins Enzo Demattè, Loris Santomaso e Bepi De Colò, dai poetis di Ampezo Fiorenzo Pompanin, Ernesto Majoni Coleto e Marco Dibona Moro, dai poetis comeleans Adelchi Casanova Fuga, Pio Zandonella Necca e Lucio Eicher, dai poetis zoldans Graziano De Rocco, Anna Maria Pradel e Noris De Rocco, dai poetis cjadovrins Gemo Da Col, Italo de Candido Candon, Adeodato Piazza Nicolai e Piero De Ghetto.

    Ce nus pandie cheste radiografie plui a fonts de poesie ladine des areis agordine, ampezane, zoldane e cjadovrine? Inte sô “Curte storie de lenghe e leterature ladine” il professôr Walter Belardi al scrîf, sul cont de produzion leterarie de Val Gardene, Val di Fasse e Val Badie: “Il tai plurilinguistic, daviert a cualsisei forme espressive che si puedi codificâ su la cjarte, al met (il lôr lavôr artistic) ae avanguardie dai moviments leteraris contemporanis in aree ladine. “Tras” (une lôr riviste leterarie) si propon come pont di riferiment par une dialetiche culturâl interne, davierte dut câs ancje viers il difûr”.

    Cheste par altri e je une realtât che no coinvolç lis zonis des Dolomitis Belumatis. Plui che colaborazion culturâl e sintonie par “une dialetiche culturâl” e esist sun chest teritori une fragmentazion che e riflet inmò l’isolament storic vût iniment denant trat.

     In conclusion no je inmò concepibil une riviste leterarie che e rivi a cjapâ adun lis oparis di autôr ampezans, cjadovrins, agordins e zoldans intune colaborazion editoriâl sinergjiche, di plui slargjât respîr. Forsit e vignarà realizade sot la direzion dal Istitût Culturâl de la Dolomites, con sedis e Borca e Selve di Cjadovri. Cundut achel la sfide e reste cemût cjatâ mieçs e compromès, parcè che chest progjet ambiziôs al puedi realizâsi. In fonts i poetis e i scritôrs no mancjin, cemût che juste apont o podìn cjatâ, e lei, inte riviste “Ladin!” che o sin daûr a recensî.

    Di segnalâ come interessant al è ancje il saç che al ven daûr, di Mario Ferruccio Belli, dedicât a “Il cûr di Ampezo dal Tirôl pes comunitâts daprûf dal Cjadovri”. Notis tiradis fûr dal Archivi comunâl di Cortina. L’autôr nus conte che, si ben tra Ampezo e Borca al esistès un confin (dal 1866 chel tra Italie e Tirôl austriac, e prime chel tra Vignesie e i dominis di Cjase d’Austrie. Ma al è ancje biel ricuardâ che sevi Ampezo che almancul une part dal Cjadovri a àn fat part dai dominis dal Patriarcjât di Aquilee), tra lis comunitâts, tra la int vadì, e je simpri esistude colaborazion e jutori intai moments intrigôs de dibisugne. No mancjave, e jere vere, massime de bande dai talians, la propagande nazionaliste e iredentiste, ma no je mai rivade a cjapâ pît. Cussì dal archivi di Ampezo Mario Ferruccio Belli al è rivât a tirâ fûr dute une rieste di vieris documents che a dan testemoneance di chestis colaborazions.

   Tra chestis colaborazions al è curiôs il fat che, tal 1869, a sostituî une maestre (probabilmentri malade) des Scuelis popolârs di Ampezo e sedi stade clamade la siore maestre Mariane De Mattia di Borca. Il decret, al sclarìs Belli, al è impuartant parcè che, in plene stagjon di contrascj politics, si clame une maestre, cjatantle no intes valadis trentinis, cemût che e jere usance, ma ben invezit in Cjadovri, o sei oltri la frontiere taliane.

    La riviste si complete cun articui di culture locâl, la publicazion di tescj di poesiis, contis e teatri e cul spazi come simpri risiervât aes recensions. Il coordenadôr de redazion, oltri che diretôr responsabil al è Ernesto Majoni Coleto, che naturalmentri al rêç la incarghe ancje di diretôr dal Istitût Culturâl Ladin de la Dolomites. (edelweiß)

,Ladins dal Friûl pag.7 - Novembar 2015

INTAI PRÂTS DE CULTURE FURLANE

Une ricercje su “I lûcs de tradizion in Friûl”

Intun libri a son contadis lis tradizions vieris e plui resintis de Furlanie

Udin – Il mês di Avrîl stât de stamparie Lithostampa di Pasian di Prât al è vignût fûr il volum “I luoghi della tradizione i Friuli”, curât di Stiefin Morandini e penç 278 pagjinis. Si trate in efiets di une racolte di saçs su lis plusôrs tradizions de nestre tiere che à an come autôrs Mareno Baccichet (“Loga il teritori furlan. La citât slargjade sul teritori ise bielzà tradizion?”; Moreno De Toni (“I lûcs de vite e de socialitât. Paîs e placis, latariis, mulins e ostariis, fontanis e lavadôrs, prats e trois”); Sabrina Tonutti (“Il Friûl dai cantîrs”); Tatiana Azzola (“Il Friûl coltivât”); Marta Pascolini (Intai spazis de mont. La malghe, un lûc di tradizion de mont furlane”); Claudio Lorenzini (“Intai lûcs dal bosc: il lavôr e la tradizion in Friûl”); Maria Teresa Corso (“In mar e in palùo: i lûcs de pescje a Maran”); Roberto Frisano (“De ostarie al auditorium: i lûcs de musiche corâl di ispirazion popolâr”); Annalisa Bonfiglioli (“De cusine popolâr ae ristorazion. Tradizion e inovazion”. Da pît po si cjate une lungje rieste di aponts visuâi, di fotografiis vadì, a colôrs, su lis diviers tradizions de Furlanie di îr e di vuê par cure di Stiefin Morandini.

    Inte introduzion dal libri Donatella Cozzi nus palese che: “Tradizion e memorie a son unidis dai fii dal timp. Al è il timp de trasmission di une gjenerazion a chê altre, il timp dal tornâ a apropriâsi e dal tornâ a inventâsi, il timp dal ûs des cjossis vieris e gnovis. Il timp, inmò, de storie dal patrimoni, che al permet di “considerâ il leam tra passât e a vignî in maniere dinamiche, di pensâlu in tiermins di un procès segnât des cjadincis propiis: a voltis lentis, a voltis plui inviadis, e no come riferiment a un tesaur di ogjets definîts une volte par dutis. Lis roturis improvisis o graduâls dai rapuarts cul passât e cul a vignî, a son ducj moments che a viodin la invenzion di poetichis patrimoniâls dispès ineditis inte lôr definizion, lis lôr sieltis e lis lôr esigjencis”. (Poulot - 2006, pp.149).

    Simpri intes pagjinis de introduzion il curadôr de opare, Stiefin Morandini, inte sô note “Oltri il folclôr in Friûl”, al sotlinie che: “O cjapi a prestit pal titul dal gno contribût chel di un libri di antropologjie a mi cjâr e curât di Pietro Clemente, juste apont: “Oltre il folklore”. L’intent che al guidave Clemente al jere chel di deliniâ une storie dai studis di etnologjie fint ae vignude de antropologjie e daûr di chest intindiment mi movarai ancje jo intes pagjinis che a vignaran daûr, ma in particolâr o cirarai di individuâ une vie dute furlane, par specializazion e risultacis, rispiet al dibatiment nazionâl. O declari fint cumò che e sarà une storie a trats pôc ortodosse, e chest parcè che tal fâsi si è zovade di contribûts che a divignivin di diviersis centis specialistichis, de ricercje academiche, ma naturalmentri ancje da ‛cjaladis dal di fûr’ che intai agns a àn scrutinât, puartât indenant ricercjis, metût jù contribûts che a inluminin la complessitât de nestre regjon. Chest al è il spirt che al à guidât la realizazion di chest volum”.

    Tra i saçs publicâts nus plâs vê iniment chel di Moreno De Toni (“Paîs e placis, latariis, mulins e ostariis, fontanis e lavadôrs, prâts e trois”), tal passaç che al trate dai “Paîs” furlans: “Dî paîs, par furlan, al significhe riclamâ une cuantitât di emozions e di imagjinis che di bessolis a dan cont de diviersitât e de pluralitât di chest ‘lûc’: in Friûl a ’nd è paîs-frazion une vore piçui, cun cuarante paisans (Cjaulis di Paulâr), paîs-confin (Tamau), paîs-citadinis ben plui grancj (Tresesin), paîs alpins in cuote (Paulâr, Lauc, Sauris, For di Voltri) e sul font val (Denemonç), inte pedemontane di Pordenon o di Glemone (Andreis, Manià, Frisanc, Clausêt), in planure dilunc lis risultivis (San Zorç di Noiâr), dongje un lât (come Cjavaç), metûts su la lagune (Maran) o pûr poiâts suntune dolce culine, cemût che dispès al sucêt di viodi cuant che si va viers i cuei di soreli jevât, tra Cormons e Cividât. A ’nd è paîs bandonâts in spiete di gnûfs abitants, che biel planc e scuasit in maniere no spietade intai ultins agns a tornin a popolâsi. Paîs logâts di cualchi forest che al puarte gnove linfe a dinamichis demografichis e relazionâls aromai strachis (Dordole, parsore Mueç) e paîs che a tornin a popolâsi di Istât cu la vignude dai emigrants e dai amants de nature (Dalès, frazion di Trasâgas) o a traviers origjinâi progjets artistics e culturâi (Topolò inte Slavie Furlane). A ’nd è paîs dulà che si va aromai dome a durmî (Tierç, frazion di Tumieç) che za fa vincj agns a jerin fis di int e cumò dome di machinis che a tornin la sere, mentri lis personis a son dispès sieradis in cjase, denant de television o dal PC”.

    Al merte in fin dite che la publicazion e je podude vignî fûr graziis ai sostegns economics de Provincie di Udin e de Fondazion de Casse di Sparagn, oltri che cul patrocini dal Ent Friûl tal Mont.

(von zercläre)

_______________________________________________________________________________________________________________________________________________

Naldini a Versuta al à presentât i libris di Pasolini

Versute di Cjasarse – Sabide stade, 10 di Otubar, a Versute di Cjasarse inte viere glesie di S. Antoni, Nico Naldini al à presentât la ristampe, par cure dal editôr Guanda, di trê volums pasolinians: “Un paîs di temporâi e primulis”, “Romans” e “Poesiis sieltis”. Si trate di trê volums che aromai a son dificii di rivâ a cjantâ, che a contribuissin no pôc, soredut i prins doi, publicâts pe prime volte tal 1993 e 1994, a puartâ la atenzion dai letôrs e studiôs su la stagjon furlane di Pasolini. Doi volums, par cure di Nico Nadini (cusin di Pasolini), che a cjapin dentri, rispetivementri, scrits in prose metûts jù tra il 1945 e il 1951, e un insiemit di prosis di un romanç lassât inedit dal autôr. Il tierç impen e je une antologjie di poesiis, curade inmò di Nico Naldini e Francesc Zambon, che indi firme purpûr la jentrade critiche. Naldini al à volût che l’incuintri si davuelzès propite in chest lûc parcè che intai agns de vuere, e in chei subite daspò, Pasolini al amave cjatâsi in cheste glesie dal Cuatricent cui amîs e i siei zovins arlêfs.

    Ancje la date sielzude e à dai riferiments significants. In fats inte gnot dal prin di Novembar dal 1975, za fa cuarante agns, alì dal Lido di Ostia al vignive sassinât Pasolini, intun mût che al scuint inmò dai aspiets che no stâts dal dut sclarîts. In chê gnot, al disè cun rabie e dolôr Alberto Moravia tal so discors di cumiât al amì, “... al fo copât un grant poete, come che indi nassin une vore di râr intun secul. (red.)

Ladins dal Friûl pag.8 – Novembar 2015

SCRITÔRS E LIBRIS IN MARILENGHE

Bepi Agostinis nus conte la “Storie de Art in Friûl”

L’autôr: o ai volût fâ un regâl ae mê int, al popul furlan

    Al è vignût fûr za fa cualchi mês un libri verementri interessant, “Storie de art in Friûl – de preistorie fin ae metât dal ’900”, realizât cun cetante passion di Bepi Agostinis. L’autôr par cheste sô fadie di no pôc cont si è zovât de consulence artistiche di un espert di gale dal setôr come bons. Zuan Carli Menis, mentri pe consulence linguistiche al à podût fâ cont su Fausto Zof. In fats in viertidure dal volum, penç 455 pagjinis, Bepi al sotlinie che: “O dedichi chest lavôr a ducj i studiôs de Art Furlane, che mi àn dât la pussibilitât di podê sgarfâ tai lôr libris, par podê meti adun chest lavôr”.

   Pieri Fontanin, president de Provincie di Udin, ent che al à sostignût in maniere impuartant la publicazion di cheste opare, inte sô jentrade nus pant che: “Bepi Agostinis al regale al Friûl une gnove perle. L’amôr pe sô tiere, la sô lenghe, la sô storie lu à puartât a cognossi une vore ben ancje la sô art. Un lavôr che Bepi al à davuelt cun precision e impegn par promovi ad in plen lis nestris lidrîs. E nas cussì “Storie de art in Friûl”, une publicazion a caratar divulgatîf che e ufrìs un panorame significant sul grant patrimoni artistic dal Friûl cun tescj e descrizions scrits ducj in marilenghe, la lenghe dal so e dal nestri cûr. Chest al è il valôr in plui di cheste ricercje: un lavôr di studi inedit su la art proponût par furlan, a conferme des tantis potenzialitâts di cheste lenghe come codiç comunicatîf di doprâ in cetantis centis, no dome inte vite di ogni dì. E la impostazion sielte di Bepi no podeve jessi che cheste. Agostinis al è un interprete sensibil de culture e de lenghe furlane: la volontât di valorizâ chestis competencis identitariis impuartantis e à vuidât la sô ativitât professionâl tal contest dal teatri e in cualchi radio locâl e vuê e je ae fonde dal so impegn pe divulgazion des oparis leterariis dai nestris autôrs”.

    Mentri l’espert de materie, bons Zuan Carli Menis, al à vût mût di sclarî cemût: “... che chest libri di Bepi Agostinis al sedi un fat impuartant pe leterature furlane parcè che, a traviers la lenghe native, si vicinisi diretementri al gjeni artistic che al è il spieli de anime di un popul! Baste lei i doi libruts scrits par furlan di Pieri Piçul, ven a stâi bons. Pieri Londar, che al à butât jù “lis lezionutis de art furlane inte lenghe furlane parcè che la marilenghe e finìs di incolorî chel mont che il frut al à scomençât a tirâ sù cjucjant il lat di sô mari” (P. Piçul, - “Ristret de storie de art furlane”, Udin, 1973). Duncje fâ la storie de art di un popul cu la sô stesse lenghe al è come contâ lis vicendis plui intimis che a movin il cûr de int”.

    Cussì Bepi Agostinis al cjape pe man il letôr e lu vuide de preistorie al 1950 ae scuvierte des bielecis dal Friûl. Storie cognossude ai plui, bielzà lete e studiade, come chê des testemoneancis romanis di Aquilee o de architeture e dai monuments langobarts di Cividât; ma ancje storie di nicje, come chê dai taiepiere di Vît di Âs e Manià che a àn dât vite a rosons e portâi unics sedi chenti che venti ator in Europe. O come la storie dai mestris intaiadôrs Tumiecins che tal 1400 no vevin parêi di ca e di là des Alps. Un viaç tal viaç parcè che des intes diviersis etis si passe ai diviers lûcs che a testemoniin il miei de art furlane.

    Ve inalore il domo di Glemone, la massime rapresentazion dal gotic in Furlanie, scomençât tal 1190, il domo di Vençon e la plêf di San Pieri parsore Zui. A son propite lis glesiis e po intun secont moment i palaçs de siorie a fâ tornâ fûr la preseositât dai nestris artiscj plui brâfs, da Zuan Francesc di Tumieç al Quaglio, da Odorì di Pordenon al Tiepolo e a Nicolau Grassi.

    Une publicazion che e fâs dai numars la sô fuarce: 455 pagjinis ilustradis da 130 fotografiis a colôrs, 112 libris consultâts e metûts dentri inte bibliografie. “No je la sempliç traduzion par furlan di une enciclopedie – al displee l’autôr -, ma un lavôr sientific che al vûl palesâ la anime de culture artistiche dal nestri teritori”.

In conclusion o podìn dî che chest al è un libri par ducj, pal popul, pe int plui sclete, ma ancje pai docents che a insegnin il furlan intes scuelis, par coinvolzi i students e fâur cussì cognossi lis tantis oparis che o vin in Friûl e che masse di lôr inmò cognossin gran. Inmò, un volum ancje insiorât di un glossari par displeâ i tiermins tecnics, voltâts par furlan, che naturalmentri pôcs di lôr a cognossin.

    O sierìn cu la citazion des peraulis dopradis inte jentrade di Lionello D’Agostini, president de Fondazion Crup che e à sostignût economichementri la publicazion: “O pandin il nestri preseament par cheste opare che, jemplant un vueit rilevant, nus da la pussibilitât di gjoldi fint insom e in mût diret, cence nissune mediazion artefate, di une part no secondarie de nestre storie milenarie, cul auguri che la passion e i tancj sacrificis dal autôr a sedin almancul in part ripaiâts dal bon acet e di une largje circolazion dal libri”.

___________________________________________________________________________________________________________

La schede: B. Agostinis, "Storie de art in Friûl - de preistorie fin ae metât dal '900", Ed. Stamparie Lithostampa, Pasian di Prât 2015, pp.455 .

“Ladins dal Friûl” Diretôr responsabil : Renzo Balzan - Reg. Tribunâl di Tumieç n. 123 dai 09.03.98

Redazion : 33028 Tierç di Tumieç - V. Dandolo16 / tel. 0433/43696 / e-mail : ladinsdalfriul@gmail.com

F.I.P. (fotocopiât in propi) a Tierç di Tumieç (Ud) V. Dandolo 12 pes Edizions “Union Scritôrs Furlans”.

La publicazion e ven spedide es Bibliotechis dal Friûl, es Istituzions Culturâls Ladinis des provinciis di Bolsan, Trent e Belun, e a ducj chei che a mandin la lôr libare contribuzion doprant il C.C. bancjari nr.19162 dal “Banco di Brescia” (Filiâl di Tumieç) - codiç IBAN: IT50H 03500 64320 0000000 19162

Chest gjornâl inte sô version online si lu cjate tal sît : http://ladinsdalfriul.blogspot.it

Publicât cul sostegn de Provincie di Udin – L.R.24/2006 art.26